ແຂວງບໍລິຄໍາໄຊ ແລະ ນະຄອນຫຼວງວຽງຈັນ(ນວ) ໄດ້ນໍາກອງກະຖິນມະຫາສາມັກຄີ ໄປທອດຖວາຍຢູ່ວັດພຣະບາດດານສູງ ບ້ານນາຍາງ ເມືອງນາຊາຍທອງ ນະຄອນຫລວງວຽງຈັນ ໃນລະຫວ່າງ ວັນທີ 8-9 ພະຈິກ 2024
ໂດຍການເປັນເຈົ້າພາບ-ເຈົ້າສັດທາຂອງ ທ່ານ ສອນທະນູ ທໍາມະວົງ ເຈົ້າແຂວງບໍລິຄໍາໄຊ ພ້ອມດ້ວຍຄອບຄົວ ແລະ ເຈົ້າພາບເຈົ້າສັດທາຈາກແຂວງບໍລິຄໍາໄຊ, ນະຄອນຫຼວງວຽງຈັນ ໃຫ້ກຽດຮັບກອງກະຖິນໂດຍພະອາຈານ ທອງເສີມ ສີບຸນເຮືອງ ເຈົ້າອະທິການວັດພຣະບາດດານສູງ,
ມີ ທ່ານ ເລັດ ໄຊຍະພອນ ປະທານສູນກາງສະຫະພັນກໍາມະບານລາວ, ທ່ານ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ, ທ່ານ ນາງ ອິນລາວັນ ແກ້ວບຸນພັນ ຮອງປະທານສູນກາງແນວງລາວສ້າງຊາດ ແລະ ມ່ວນຊົນເຂົ້າຮ່ວມຢ່າງຫລວງຫລາຍ.
ງານບຸນກະຖິນມະຫາສາມັກຄີໃນຄັ້ງນີ້, ກົງກັບມື້ຂຶ້ນ 8 ຄໍ່າ ເດືອນ 12 ພສ 2067, ວັນທີ 8 ພະຈິກເປັນມື້ຫາກຫາກະກຽມ ແລະ ວັນທີ 9 ພະຈິກ ເປັນມື້ທອດຖວາຍກະຖິນ ເຊິ່ງໄດ້ມີພິທີແຫ່ ແຕ່ຈຸດ ຮູບປັ້ນທ້າວເວດສຸວັນ ຫາ ສາລາວັດດັ່ງກ່າວ.
ພະອາຈານ ທອງເສີມ ສີບຸນເຮືອງ ເຈົ້າອະທິການວັດພຣະບາດດານສູງ ໄດ້ໃຫ້ວ່າ: ບຸນກະຖິນເປັນບຸນໜຶ່ງໃນຮີດສິບສອງ ຄອງສິບສີ່ ປະເພນີລາວ ເພື່ອເປັນການສົ່ງເສີມພຸດທະປະເພນີ, ເປັນການສົ່ງເສີມຄວາມສາມັກຄີ ພາຍໃນຊຸມຊົນ, ເປັນການສ້າງກຸສົນ ແລະ ອື່ນໆ.
ການຈັດບຸນກະຖິນມະຫາສາມັກຄີ ໃນປີນີ້, ເປັນການລະດົມທຶນເພື່ອສ້າງສາພັດທະນາ ວັດພຣະບາດດານສູງ ໂດຍສະເພາະ ແມ່ນສ້າງກຸດຕິ ແລະ ສ້າງສາລາ ເພື່ອຮອງຮັບອອກຕົນຍາດຍົມ ເຂົ້າມາປະຕິບັດທໍາໃນວັດດັ່ງກ່າວ ໃຫ້ມີຄວາມສະດວກສະບາຍ, ທັງເປັນການປະກອບສ່ວນ ສ້າງວັດແຫ່ງນີ້ ເປັນສະຖານທີ່ທ່ອງທ່ຽວທາງວັດທະນາທໍາໃນອະນາຄົດ ເຊິ່ງກອງກະຖິນມະຫາສາມັກຄີ ໄດ້ຮັບກຽດເປັນເຈົ້າພາບຈາກ ທ່ານ ສອນທະນູ ທໍາມະວົງ ເຈົ້າແຂວງບໍລິຄໍາໄຊ ແລະ ການນໍາພັກ-ລັດ, ເຈົ້າພາບເຈົ້າສັດທາຈາກແຂວງບໍລິຄໍາໄຊ ແລະ ນະຄອນຫລວງວຽງຈັນ.
ໂອກາດນີ້, ທ່ານ ສອນທະນູ ທໍາມະວົງ ຍັງໄດ້ສະແດງຄວາມດີໃຈ ທີ່ເຫັນມວນຊົນໃນນະຄອນຫລວງວຽງຈັນ ຫລັ່ງໄຫລກັນເຂົ້າມາຮ່ວມບຸນກະຖິນມະຫາສາມັກຄີໃນຄັ້ງນີ້ຢ່າງຫລວງຫລາຍ, ພ້ອມທັງສະແດງຄວາມຂອບ ໃຈ ຕໍ່ມວນຊົນທີ່ໄດ້ພ້ອມກັນຖວາຍວັດຖຸປັດໄຈ ດ້ວຍຄວາມເຕັມໃຈ ເພື່ອປະກອບສ່ວນເຂົ້າໃນການສ້າງສາພັດ ທະນາວັດພຣະບາດດານສູງ
ກາຍເປັນສະຖານທີ່ທ່ອງທ່ຽວທາງພຸດທະສາສະໜາ ເຮັດໃຫ້ງານບຸນໃນຄັ້ງນີ້ ດຳເນີນໄປດ້ວຍຜົນສຳເລັດ, ຮັກສາໄດ້ວັດທະນະທຳ, ຮີດຄອງປະເພນີອັນດີງາມ ຂອງຊາດລາວເຮົາ, ທັງຮັກສາໄດ້ຄວາມເປັນລະບຽບຮຽບຮ້ອຍ, ສະຫງົບ ແລະ ປອດໄພ.
