ໃນວັນທີ 8 ພະຈິກ2024 ທະນາຄານການຄ້າຕ່າງປະເທດລາວ ມະຫາຊົນ ໄດ້ຈັດພິທີສະເຫຼີມສະຫຼອງວັນຫັນເປັນທຸລະກິດ ຄົບຮອບ 35 ປີ ຂຶ້ນ ຢູ່ທີ່ຫໍປະຊຸມແຫ່ງຊາດ, ເຂົ້າຮ່ວມຂອງທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ທ່ານ ສັນຕິພາບ ພົມວິຫານ ລັດຖະມົນຕີກະຊວງ ການເງິນ, ທ່ານ ນາງ ຂັນແກ້ວ ຫຼ້າມະນີເງົາ ຮອງຜູ້ວ່າການທະນາຄານແຫ່ງ ສປປ ລາວ, ມີຄະນະສະພາບໍລິຫານ ທຄຕລ, ຫົວໜ້າກົມ ຈາກ ທຫລ ແລະ ກະຊວງກ່ຽວຂ້ອງ, ລູກຄ້າ ແລະ ພະນັກງານ ຂອງ ທຄຕລ ເຂົ້າຮ່ວມຢ່າງພ້ອມພຽງ.
ທ່ານ ນາງ ສາຍສະໝອນ ຈັນທະຈັກ ຜູ້ອໍານວຍການ ທຄຕລ ກ່າວວ່າ: ທຄຕລ ໄດ້ຫັນເປັນທຸລະກິດ ໃນວັນທີ 1 ພະຈິກ 1989 ແລະ ກ້າວເຂົ້າສູ່ການດຳເນີນທຸລະກິດແບບເຕັມຮູບແບບ ໂດຍມີການໄລ່ລຽງທຸລະກິດ ແລະ ກຸ້ມຕົນເອງດ້ານການເງິນ. ໃນທ້າຍປີ 2010 ທຄຕລ ໄດ້ຫັນປ່ຽນຮູບແບບການດໍາເນີນທຸລະກິດ ໄປເປັນທະນາຄານມະຫາຊົນ ແລະ ຈົດທະບຽນໃນຕະຫຼາດຫຼັກຊັບລາວ, ໂຄງສ້າງການຖືຮຸ້ນປະຈຸບັນຂອງ ທຄຕລ ປະກອບມີ: ລັດຖະບານ (ກະຊວງການເງິນ) ຖືຮຸ້ນ 60%, ຄູ່ຮ່ວມຍຸດທະສາດ ຖືຮຸ້ນ 10%, ຜູ້ລົງທຶນພາຍໃນ ແລະ ຕ່າງປະເທດ ຖືຮຸ້ນ 30%.
ຕະຫຼອດໄລຍະ 35 ປີ ແຫ່ງຄວາມເຊື່ອໝັ້ນ ແລະ ເຕີບໃຫຍ່ຢ່າງໝັ້ນຄົງ, ທຄຕລ ໄດ້ຮັບການປັບປຸງໃຫ້ມີຄວາມເຂັ້ມແຂງໃນທຸກໆດ້ານ ນັບແຕ່ລະບົບການຄຸ້ມຄອງບໍລິຫານ ຈົນເຖິງການພັດທະນາການບໍລິການລູກຄ້າ. ປະຈຸບັນ ທຄຕລ ມີທັງໝົດ 11 ພະແນກ, 3 ສູນ, 20 ສາຂາ,113 ໜ່ວຍບໍລິການ ແລະ ຫ້ອງແລກປ່ຽນ, ມີຕູ້ ATM ຫຼາຍກວ່າ 500 ໜ່ວຍ, ຕູ້ຮັບຝາກເງິນ ຫຼາຍກວ່າ 70 ໜ່ວຍ ແລະ ຕົວແທນ BCOME ຫຼາຍກວ່າ 690 ຕົວແທນ ໃນຂອບເຂດທົ່ວປະເທດ ແລະ ມີບໍລິສັດຮ່ວມທຶນ ຈຳນວນ 6 ແຫ່ງ. ທຄຕລ ໄດ້ເອົາໃຈໃສ່ປັບປຸງ ແລະ ພັດທະນາລະບົບບໍລິການຢ່າງຕໍ່ເນື່ອງ ໂດຍນໍາໃຊ້ເທັກໂນໂລຊີໃຫມ່ທີ່ທັນສະໄໝເຂົ້າໃນການບໍລິການ ເພື່ອເຮັດໃຫ້ລູກຄ້າມີຄວາມສະດວກສະບາຍຍິ່ງຂຶ້ນເມື່ອເຂົ້າມາໃຊ້ບໍລິການໃນທະນາຄານ. ພ້ອມນັ້ນ, ຍັງໄດ້ສຸມໃສ່ການພັດທະນາບັນດາຜະລິດຕະພັນຕ່າງໆ ໃຫ້ມີຄວາມຫຼາກຫຼາຍ ເພື່ອຕອບສະໜອງຄວາມຕ້ອງການຂອງລູກຄ້າ ໃນໄລຍະໃໝ່. ພິເສດ ທຄຕລ ໄດ້ພັດທະນາຜະລິດຕະພັນອີເລັກໂທນິກ ເປັນຕົ້ນແມ່ນແອັບ BCEL One ເຊິ່ງໄດ້ຮັບຄວາມນິຍົມທີ່ສຸດໃນເວລານີ້. ນອກຈາກນັ້ນ, ທຄຕລ ໄດ້ເອົາໃຈໃສ່ປັບປຸງລະບົບໄອທີໃຫ້ມີຄວາມທັນສະໄໝ ແລະ ປອດໄພ ຢູ່ຕະຫຼອດເວລາ ເຊິ່ງໄດ້ພັດທະນາຍົກລະດັບລະບົບໂປຼແກຣມ Core Banking ເປັນແຕ່ລະໄລຍະ ເຊິ່ງລະບົບທີ່ນໍາໃຊ້ຢູ່ໃນປະຈຸບັນ ແມ່ນລະບົບທີ່ມີຄວາມທັນສະ ໄໝທີ່ສຸດ ໃນ ສປປ ລາວ.
ໃນໄລຍະ 35 ປີ ແຫ່ງການເຕີບໃຫຍ່ຂະຫຍາຍຕົວ ທຄຕລ ດໍາເນີນທຸລະກິດປະສົບຜົນສຳເລັດເປັນກ້າວໆມາ ຕົວເລກກຳໄລມີທ່າອ່ຽງເພີ່ມຂຶ້ນໃນແຕ່ລະປີ ເຊິ່ງຖືໄດ້ວ່າ ທຄຕລ ເປັນໜຶ່ງໃນລັດວະສາຫະກິດ ທີ່ມີປະສິດທິຜົນສູງສົມຄວນ. ທຄຕລ ບໍ່ພຽງແຕ່ເນັ້ນໃສ່ປະສິດທິພາບ ແລະ ປະສິດທິຜົນໃນການດຳເນີນທຸລະກິດພຽງຢ່າງດຽວເທົ່ານັ້ນ, ທຄຕລ ຍັງໄດ້ໃຫ້ຄວາມສຳຄັນໃນວຽກງານຊ່ວຍເຫຼືອສັງຄົມຢ່າງແຂງແຮງ ໂດຍໄດ້ນຳໃຊ້ເຄື່ອງມືທີ່ທັນສະໄໝເຂົ້າມາຊ່ວຍຄື BCEL OneHeart. ຄຽງຄູ່ກັນນັ້ນ, ຍັງໄດ້ປະຕິບັດພັນທະໃຫ້ແກ່ງົບປະມານຂອງລັດ ໂດຍສະເພາະແມ່ນການມອບພັນທະອາກອນ ແລະ ຈ່າຍເງິນປັນຜົນ ຢ່າງຄົບຖ້ວນ, ຖືກຕ້ອງ ແລະ ເປັນປົກກະຕິ.
ໃນພິທີຍັງໄດ້ ທຄຕລ ຍັງໄດ້ເປີດໂຕຜະລິດຕະພັນໃໝ່ One Bank ເພື່ອບໍລິການລູກຄ້າໃນຍຸກດິຈິຕອນ ໃຫ້ມີຄວາມທັນສະໄໝ ຍິ່ງຂຶ້ນ.
ໃນພິທີດັ່ງກ່າວ ທ່ານ ຜູ້ອຳນວຍການ ທຄຕລ ຕາງໜ້າໃຫ້ຄະນະຜູ້ບໍລິຫານງານ ແລະ ພະນັກງານທັງໝົດ ຍັງໄດ້ຮຽກຮ້ອງມາຍັງການນຳພັກ-ລັດ ແລະ ບັນດາລູກຄ້າຂອງ ທຄຕລ ທຸກໆທ່ານ ທັງພາກລັດ ແລະ ເອກະຊົນ, ທັງພາຍໃນ ແລະ ຕ່າງປະເທດ ຈົ່ງສືບຕໍ່ໃຫ້ການສະໜັບສະໜູນຮອບດ້ານຕໍ່ ທຄຕລ ໃຫ້ມີຄວາມເຕີບໃຫຍ່ເຂັ້ມແຂງ, ໝັ້ນຄົງຍິ່ງໆຂຶ້ນໄປ.
