ບໍລິສັດ ເບທາໂກ ຈຳກັດ ມະຫາຊົນ ຫຼື “BTG” ເປີດໂຕໂຮງງານຫົວອາຫານສັດແຫ່ງທຳອິດຂອງ ສປປ ລາວ ພາຍໃຕ້ງົບລົງທຶນກວ່າ 650 ລ້ານບາດ ນຳເຕັກໂນໂລຊີທີ່ທັນສະໄຫມມາໃຊ້ໃນການຜະລິດຫົວອາຫານສັດ ແລະ ບໍລິຫານຊັບພະຍາກອນດ້ວຍກຳລັງການຜະລິດ 108.000 ໂຕນຕໍ່ປີ ມຸ່ງສ້າງຜະລິດຕະພັນຄຸນນະພາບຕັ້ງແຕ່ຕົ້ນນ້ຳ ຮອງຮັບຄວາມຕ້ອງການທີ່ຂະຫຍາຍຕົວຢ່າງຕໍ່ເນື່ອງ ແລະ ເພີ່ມປະສິດທິພາບການບໍລິຫານຈັດການຕົ້ນທຶນ ຫຼຸດຜ່ອນການນຳເຂົ້າຫົວອາຫານສັດຈາກປະເທດໄທ ມຸ່ງພັດທະນາຄຸນນະພາບຊີວິດຂອງຜູ້ຄົນ ດ້ວຍອາຫານທີ່ດີ ແລະ ຮ່ວມຂັບເຄື່ອນເສດຖະກິດຂອງ ສປປ ລາວ ໃຫ້ເຕີບໃຫຍ່ໄປດ້ວຍກັນຢ່າງຍືນຍົງ
ທ່ານ ວໍຣະວຸດ ວານິດກຸນບໍດີ ປະທານເຈົ້າໜ້າທີ່ປະຕິບັດການ ກຸ່ມທຸລະກິດຕ່າງປະເທດ ບໍລິສັດ ເບທາໂກ ຈຳກັດ ມະຫາຊົນ ຫຼື “BTG” ເປີດເຜີຍວ່າ: ເບທາໂກໃນຖານະຜູ້ປະກອບທຸລະກິດອາຫານ ແລະ ກະສິກຳ-ອຸດສາຫະກຳຄົບວົງຈອນຊັ້ນນຳລະດັບສາກົນ ເພື່ອການບໍລິໂພກໃນປະເທດ ແລະ ສົ່ງອອກໄປກວ່າ 20 ປະເທດທົ່ວໂລກ ລວມເຖິງການລົງທຶນໃນປະເທດເພື່ອນບ້ານທັງ ມຽນມາ, ລາວ ແລະ ກຳປູເຈຍ ໂດຍກຸ່ມທຸລະກິດຕ່າງປະເທດມຸ່ງເນັ້ນການເພີ່ມປະລິມານຜົນຜະລິດດ້ວຍການເພີ່ມປະສິດທິພາບການຜະລິດຜ່ານການນຳເຕັກໂນໂລຊີທີ່ທັນສະໄຫມມາໃຊ້ ເພື່ອໃຫ້ໄດ້ຜົນຜະລິດທີ່ດີມີຄຸນນະພາບ ທັງຍັງບໍລິຫານຈັດການຕົ້ນທຶນໄດ້ດີຍິ່ງຂຶ້ນ, ເທື່ອນີ້ຈຶ່ງເດີນໜ້າລົງທຶນກວ່າ 650 ລ້ານບາດ ສ້າງໂຮງງານຜະລິດຫົວອາຫານສັດເບທາໂກແຫ່ງທຳອິດໃນ ສປປ ລາວ ທີ່ມີການນຳໃຊ້ເຕັກໂນໂລຊີ ແລະ ນະວັດຕະກຳທີ່ທັນສະໄຫມມາໃຊ້ໃນການຜະລິດຫົວອາຫານສັດ ແລະ ໄດ້ມີການເປີດໂຮງງານຜະລິດຫົວອາຫານສັດແຫ່ງນີ້ຢ່າງເປັນທາງການໂດຍໄດ້ຮັບກຽດຈາກ
1. ທ່ານ ສີປະໄພ ໄຊສົງຄາມ ຫົວໜ້າຫ້ອງການ ກະຊວງກະສິກຳ ແລະ ປ່າໄມ້
2. ທ່ານ ບຸນຍອດ ຈັນທະວອນ ຫົວໜ້າຫ້ອງການ ກະຊວງແຮງງານ ແລະ ສະຫວັດດິການສັງຄົມ
3. ທ່ານ ນາງ ຈິລັດສະຍາ ພີລານົນ ອຸປະທູດທ່ານ ສະຖານເອກອັກຄະຣາຊາທູດ ແຫ່ງ ຮາດຊະອານາຈັກໄທ
4. ທ່ານ ວະສິດ ແຕ້ໄພສິດພົງ ປະທານຜູ້ອຳນວຍການໃຫຍ່ ເຄືອເບທາໂກ
5. ທ່ານ ວໍຣະວຸດ ວະນິດກຸນບໍດີ ປະທານຜູ້ອຳນວຍການກຸ່ມທຸລະກິດຕ່າງປະເທດ ເຄືອເບທາໂກ.
6. ທ່ານ ສຸລະເຊດ ທອງບຸນລ້ອມ ຮອງຜູ້ຈັດການໃຫຍ່ ໂຮງງານ ຫົວອາຫານສັດ ເບທາໂກ ລາວ
ສໍາລັບ ໂຮງງານຫົວອາຫານສັດ ເບທາໂກ ລາວ ນັບເປັນອີກໜຶ່ງໂຮງງານຫົວອາຫານສັດໃນຕ່າງປະເທດຂອງບໍລິສັດ ສາມາດຜະລິດຫົວອາຫານສັດໄດ້ຫຼາກຫຼາຍຊະນິດທັງ ໝູ, ໄກ່ໄຂ່ ແລະ ໄກ່ຊີ້ນ ໂດຍນຳໃຊ້ເຕັກໂນໂລຊີການຜະລິດທີ່ທັນສະໄຫມມາຍົກລະດັບຈັດການຫຼາກຫຼາຍດ້ານໄດ້ແກ່:
1. ລະບົບ SCADA (Supervisory Control and Data Acquisition) ແລະ ລະບົບ SAP ນຳມາໃຊ້ໃນການຈັດການວັດຖຸດິບ ແລະ ຜະລິດຫົວອາຫານສັດ ເພື່ອຍົກລະດັບການຜະລິດໃຫ້ມີຄວາມຖືກຕ້ອງຫຼາຍຂຶ້ນ
2. ລະບົບການບໍລິຫານຈັດການໂຮງງານເພື່ອຄວບຄຸມ ແລະ ລາຍງານຜົນຜະລິດ (Smart Dashboard)
3. ລະບົບການຜະລິດຫົວອາຫານສັດ ແລະ ການໃຊ້ສານປະສົມລ່ວງໜ້າ (Smart Premix)
4. ລະບົບການບັນຈຸຫົວອາຫານສັດທີ່ທັນສະໄຫມ (Smart Bagging)
5. ລະບົບການຈັດການຖານຂໍ້ມູນຜົນວິເຄາະວັດຖຸດິບຫົວອາຫານສັດເພື່ອການຄວບຄຸມຄຸນນະພາບ (Best LIMS – Laboratory Information Management System)
6. ລະບົບການກຳຈັດຝຸ່ນ ແລະ ກິ່ນ (Jet Filter) ເພື່ອຫຼຸດຜ່ອນຜົນກະທົບຕໍ່ສັງຄົມ ແລະ ສິ່ງແວດລ້ອມໂດຍການລົງທຶນໂຮງງານຫົວອາຫານສັດເບທາໂກ ລາວ ແຫ່ງນີ້ຄາດວ່າຈະຊ່ວຍເພີ່ມປະສິດທິພາບການຜະລິດອາຫານສັດທີ່ມີຄຸນນະພາບ ແລະ ປອດໄພ ທັງຍັງເປັນການສົ່ງເສີມການໃຊ້ວັດຖຸດິບຫົວອາຫານສັດໃນ ສປປ ລາວ ແລະ ເປັນສ່ວນໜຶ່ງໃນການຂັບເຄື່ອນເສດຖະກິດຂອງປະເທດ ແລະ ສ້າງຄວາມໄດ້ປຽບທາງການແຂ່ງຂັນອີກດ້ວຍ
ປະຈຸບັນໂຮງງານຫົວອາຫານສັດເບທາໂກ ລາວ ມີອັດຕາການເດີນເຄື່ອງຢູ່ທີ່ 70% ຂອງການຜະລິດລວມ ແລະ ຄາດວ່າຈະຜະລິດເຕັມກຳລັງ 100% ຫຼື 108,000ໂຕນພາຍໃນປີ 2025 ອີກຍັງມີແຜນຂະຫຍາຍກຳລັງການຜະລິດເປັນ 144,000 ໂຕນຕໍ່ປີ ໃນປີ 2027ເພື່ອຮອງຮັບການຂະຫຍາຍການຜະລິດປະຊຸສັດ ແລະ ອາຫານໃຫ້ຄອບຄຸມທັງ ສປປ ລາວ ແລະ ສົ່ງອອກໃຫ້ກັບຟາມກະສິກອນເຄືອຂ່າຍເບທາໂກໃນພື້ນທີ່ພາກອີສານຕອນກາງຂອງປະເທດໄທ
ເບທາໂກ ເຊື່ອວ່າໂຮງງານອາຫານສັດແຫ່ງນີ້ຈະຍົກລະດັບລະບົບຕ່ອງໂສ້ການສະໜອງດ້ານອາຫານຂອງ ສປປ ລາວ ທັງໃນດ້ານເສດຖະກິດ, ສັງຄົມ ແລະ ສິ່ງແວດລ້ອມ ດ້ວຍການສົ່ງມອບອາຫານທີ່ມີຄຸນນະພາບ ແລະ ຄວາມປອດໄພສູງ ດ້ວຍການຜະລິດທີ່ຍືນຍົງ ທັງຍັງສ້າງງານສ້າງອາຊີບໃຫ້ກັບຄົນໃນທ້ອງຖິ່ນເຊິ່ງຈະເຮັດໃຫ້ຜູ້ຄົນໃນ ສປປ ລາວ ມີທາງເລືອກໃຫ້ການບໍລິໂພກອາຫານທີ່ດີ ມີຄຸນນະພາບຖືວ່າເປັນສ່ວນໜຶ່ງໃນການຮ່ວມພັດທະນາ ແລະ ປັບປຸງລະບົບກະເສດອຸດສາຫະກຳ ແລະ ອາຫານໃນ ສປປ ລາວ ໃຫ້ມີມາດຕະຖານການຜະລິດໃນລະດັບສາກົນ ແລະ ປອດໄພຕໍ່ຜູ້ບໍລິໂພກ ຕະຫຼອດຈົນເປັນຖານການຜະລິດ ແລະ ສົ່ງອອກໄປຍັງຕ່າງປະເທດໃນອານາຄົດຕໍ່ໄປ.
