ພິທີມອບ – ຮັບທຶນສະໜັບສະໜູນກຸ່ມຜູ້ຜະລິດກະສິກໍາຂະໜາດນ້ອຍໃຫ້ກຸ່ມຜະລິດກະສິກໍາເປັນສິນຄ້າໃນຈໍານວນ 3 ບ້ານ ຄື: ບ້ານຜັກອີຕູ່,ບ້ານນາວາງທົ່ງ ແລະ ບ້ານກຸດຈັບ ເມືອງໜອງບົກ ແຂວງ ຄໍາມ່ວນ ມີຂຶ້ນເມື່ອບໍ່ໆມານີ້ ເຊິ່ງຈັດໂດຍໂຄງການສົ່ງເສີມລະບົບຕ່ອງໂສ້ຜະລິດກະສິກໍາເປັນສິນຄ້າທີ່ເປັນມິດຕໍ່ສິ່ງແວດລ້ອມ ຫຼື ( ຄສກສ ) ກົມສົ່ງເສີມກະສິກໍາ ແລະ ສະຫະກອນ ຫຼື ( ກສກສ ) ແລະ ພະແນກກະສິກໍາ ແລະ ປ່າໄມ້ແຂວງຄໍມ່ວນໂດຍໄດ້ຮັບທຶນຊ່ວຍເຫຼືອລ້າຈາກທະນາຄານພັດທະນາອາຊີ (ADB).
ເຂົ້າຮ່ວມໃນພິທີຂອງທ່ານ ຄໍາມອນ ພົມພິພັກ ຮອງເຈົ້າເມືອງໜອງບົກ , ທ່ານ ນາງ ດາລຸນນີ ໄຊຍະບຸດ ຮອງຫົວ ໜ້າພະແນກກະສິກໍາ ແລະ ປ່າໄມ້ແຂວງ ( ຜູ້ຊີ້ນໍາໂຄງການຂັ້ນແຂວງ ), ທ່ານ ພັນໄຊ ອີງໄຊ ຮອງຫົວໜ້າກົມສົ່ງເສີມກະສິກໍາ ແລະ ສະຫະກອນ ກະຊວງກະສິກຳ ແລະປ່າໄມ້; ມີຫົວໜ້າໂຄງການ ຄສກສ ຂັ້ນສູນກາງ, ຜູ້ປະສານງານໂຄງການຂັ້ນແຂວງ, ຂັ້ນເມືອງ ແລະ ສະມາຊິກພາຍໃນກຸ່ມການຜະລິດເຂົ້າຮ່ວມ.
ເມືອງໜອງບົກ ປະກອບມີກຸ່ມການຜະລິດກະສິກຳປູກເຂົ້າເປັນສິນຄ້າລວມທັງໝົດ 22 ກຸ່ມ, ມີສະມາຊິກລວມທັງໝົດ 474 ຄອບຄົວ ມີເນື້ອທີ່ລວມທັງໝົດ 987,52 ເຮັກຕາ,ໃນນັ້ນມີກຸ່ມຜະລິດເມັດພັນລຸ້ນ 3 ມີ 4 ກຸ່ມ ມີຈຳນວນສະມາຊິກ 59 ຄອບຄົວ, ມີເນື້ອທີ່ 81,03 ເຮັກຕາ, ໃນກຸ່ມເປົ້າໝາຍຂອງໂຄງການເມືອງມີ 3 ກຸ່ມທີ່ຂຽນແຜນສະເໜີຂໍທຶນ SFS ພ້ອມທັງໄດ້ປະກອບສ່ວນ ທຶນສົມທົບ 10% ຕາມເງື່ອນໄຂຢ່າງຄົບຖ້ວນ.
ທັງ 3 ກຸ່ມແມ່ນໄດ້ຮັບການສ້າງຕັ້ງຈາກຫ້ອງການກະສິກຳ ແລະ ປ່າໄມ້ ເມືອງໜອງບົກ. ສະເພາະ 3 ກຸ່ມທີ່ໄດ້ຮັບທຶນ SFS ໃນນັ້ນ ກຸ່ມຜະລິດແນວພັນເຂົ້າລຸ້ນ 3 ບ້ານ ຜັກອີ່ຕູ່ມີສະມາຊິກທັງໝົດ 12 ຄອບຄົວ, ມີເນື້ອທີ່ທຳການຜະລິດ 11,63 ເຮັກຕາໄດ້ຮັບການອະນຸມັດຈາກ ADB ໃຫ້ສະໜອງທຶນ SFS ຈໍານວນ 12.000 ໂດລາສະຫະລັດ .
ກຸ່ມຜະລິດແນວພັນເຂົ້າລຸ້ນ 3 ບ້ານ ກຸດຈັບມີສະມາຊິກທັງໝົດ 20 ຄອບຄົວ ມີເນື້ອທີ່ທຳການຜະລິດ 40,9 ເຮັກຕາໄດ້ຮັບທຶນ 20.000 ໂດລາສະຫະລັດ .
ກຸ່ມຜະລິດແນວພັນເຂົ້າລຸ້ນ 3 ບ້ານ ນາວາງທົ່ງມີສະມາຊິກທັງໝົດ 21 ຄອບຄົວ ມີເນື້ອທີ່ທຳການຜະລິດ 21,5 ເຮັກຕາໄດ້ຮັບທຶນ 21.000 ໂດລາສະຫະລັດ .
ລວມຈຳນວນເງິນທີ່ນໍາໄປມອບໃຫ້ 3 ກຸ່ມດັ່ງກ່າວມີທັງໝົດ 1.167 ລ້ານກວ່າກີບ ຫຼື ເທົ່າກັບ 53.000 ໂດລາສະຫະລັດ .
ພາຍຫຼັງສໍາເລັດພິທີມອບ-ຮັບທຶນ SFS ໃຫ້ແກ່ 3 ກຸ່ມຜະລິດແນວພັນເຂົ້າລຸ້ນ 3 ແລ້ວທາງຄະນະຊີ້ນໍາໂຄງການຈາກສູນກາງ,ຂັ້ນແຂວງ ແລະ ຂັ້ນເມືອງກໍໄດ້ລົງຕິດຕາມເບິ່ງໂຄງການທົດລອງລ້ຽງກຸ້ງໃນນາເຂົ້າຢູ່ບ້ານສອງເໝືອງໂດຍໄດ້ຮັບການຊ່ວຍເຫຼືອລ້າຈາກແຂວງກາເມົາ ສສ ຫວຽດນາມຕື່ມອີກ .
