ສະມາຄົມຫັດຖະກຳລາວ ຈັດເວທີສົນທະນາ ພາຍໃຕ້ຫົວຂໍ້ “ການປັບປຸງເຕັກນິກການຕໍ່າຜ້າຝ້າຍ” ໃນວັນທີ 29 ຕຸລາ 2024 ສູນການຄ້າ ລາວ-ໄອເຕັກ ເປັນປະທານຮ່ວມຂອງທ່ານນາງ ຈັນເທົາ ປະຖັມມະວົງ ປະທານກິດຕິມະສັກສະມາຄົມຫັດຖະກຳລາວ ແລະ ທ່ານນາງ ສຸວິຕາ ປະເສີດ ປະທານສະມາຄົມຫັດຖະກໍາລາວ ເປັນກຽດເຂົ້າຮ່ວມຂອງ ທ່ານ ນາງ ນາລີ ສີສຸລິດ ພັນລະຍາປະທານປະເທດ ປະທານຄະນະທີ່ປຶກສາສະມາຄົມຫັດຖະກຳລາວ (ສຫລ) ມີຜູ້ປະກອບການດ້ານຫັດຖະກຳ ຜູ້ຜະລິດ ແລະ ຂະແໜງການກ່ຽວຂ້ອງ.
ທ່ານ ນາງ ສຸວິຕາ ປະເສີດ ກ່າວວ່າ ເພື່ອເປັນການປະກອບສ່ວນເຂົ້າໃນຂະບວນການອະນຸລັກຮັກສາມູນເຊື້ອຫັດຖະກຳຂອງຊາດລາວ ດ້ານການນຸ່ງຖື ການແຕ່ງກາຍ ພ້ອມທັງເປັນປຸກລະດົມຂົນຂວາຍ ແລະ ຟື້ນຟຸຄວາມນິຍົມຊົມຊອບໃຫ້ແກ່ສັງຄົມໃນການນໍາໃຊ້ຜະລິດຕະພັນຫັດຖະກຳຂອງລາວ ສ້າງທ່າແຮງໃນການຜະລິດສິນຄ້າໃນຂະແໜງແຜ່ນແພ ໃນນັ້ນແຜ່ນແພ ເຄື່ອງນຸ່ງຖືທີ່ເຮັດດ້ວຍຜ້າຝ້າຍເປັນໜຶ່ງໃນຜະລິດຕະພັນຫັດຖະກໍາຕໍ່າດ້ວຍມື ແລະ ນອນຢູ່ໃນປະເພດເຄື່ອງນຸ່ງຫົ່ມແຕ່ງກາຍທີ່ຄົນລາວນິຍົມຊົມໃຊ້ມາຕັ້ງແຕ່ບູຮານນະການ.
ເວທີສົນທະນາຄັ້ງນີ້ເປັນໂອກາດດີທີ່ສຸດໃນທ່າມກາງບັນຍາກາດຂອງງານມະຫາກໍາສີມືຫັດຖະກໍາລາວຄັ້ງທີ 23 ປະຈໍາປີ 2024 ເຊິ່ງສະມາຄົມຫັດຖະກໍາລາວໄດ້ຮັບການຮ່ວມມືສະໜັບສະໜູນທາງດ້ານວິຊາການຈາກບັນດາທ່ານ ທີ່ມີປະສົບການສູງກ່ຽວກັບວຽກງານຫັດຖະກໍາ ບັນດາທ່ານທີ່ເປັນນັກຄົ້ນ ຄວ້າ ນັກອອກແບບ ແລະ ບັນດາທ່ານທີ່ມີປະສົບການໃນການຕໍ່າ ແລະ ນຸ່ງຖືຜ້າຝ້າຍ. ນອກຈາກນີ້ໃນເວທີກໍໄດ້ແລກປ່ຽນຄວາມຮູ້ ແລະ ປະສົບການກ່ຽວກັບການຕໍ່າ ການຜະລິດແຜ່ນແພ ແລະ ເຄື່ອງນຸ່ງຫົ່ມດ້ວຍເສັ້ນຝ້າຍໃຫ້ນັບມື້ດີຂຶ້ນໃຫ້ກາຍເປັນທີ່ນິຍົມຊົມຊອບຂອງລູກຄ້າທັງພາຍໃນ ແລະ ຕ່າງປະເທດ.
ໂອກາດນີ້, ທ່ານ ນາງ ນາລີ ສີສຸລິດ ກໍໄດ້ໂອ້ລົມຕໍ່ຜູ້ເຂົ້າຮ່ວມ ເຊິ່ງທ່ານໄດ້ຍ້ອງຍໍຊົມເຊີຍຕໍ່ເອື້ອຍນ້ອງແມ່ຍິງບັນດາເຜົ່າທີ່ມີຄວາມອົດທົນ ຄວາມໃສ່ໃຈການຮຽນຮູ້ຕະຫຼອດມາ, ໃນນັ້ນມີແມ່ຍິງຈຳນວນບໍ່ໜ້ອຍທີ່ມີມູນເຊື້ອໃນການຜະລິດເຄື່ອງຫັດຖະກຳເພື່ອໃຊ້ສອຍໃນຊີວິດປະຈຳວັນ ແລະ ເປັນສິນຄ້າທີ່ເປັນເອກະລັກຂອງແຕ່ຊົນເຜົ່າ.
ປັດຈຸບັນ ຜະລິດຕະພັນຫັດຖະກຳລາວທີ່ຜະລິດດ້ວຍຜ້າຝ້າຍ ຜ້າໄໝຕ່າງໆໄດ້ກາຍເປັນສິນຄ້າສົ່ງອອກຕ່າງປະເທດຫຼາຍພໍສົມຄວນ ໄປຄຽງຄູ່ກັບຜົນງານທີ່ຍາດມາໄດ້ໃນໄລຍະຜ່ານມາຍັງມີຫຼາຍຈຸດທີ່ຕ້ອງໄດ້ພັດທະນາ ແລະ ປັບປຸງເພື່ອດຶງດູດລູກຄ້າທັງພາຍໃນ ແລະ ຕ່າງປະເທດເຊັ່ນ ການຜະລິດເສັ້ນຝ້າຍໃຫ້ຫຼາຍຂະໜາດ ( ເສັ້ນນ້ອຍ, ເສັ້ນ ໃຫຍ່ ) ເພື່ອມາຕໍ່ເປັນແພແລ້ວໃຫ້ສາມາດໃສ່ໄດ້ໃນສະພາບອາກາດໜາວ ຫຼື ຮ້ອນການເຮັດໃຫ້ແພຝ້າຍມີຄວາມນຸ້ມນວນເປັນມິດຕໍ່ຜິວໜັງ.
ພ້ອມກັນນັ້ນ, ທ່ານຍັງໄດ້ຮຽກຮ້ອງມາຍັງຜູ້ປະກອບການກໍຄືຜູ້ຜະລິດຫັດຖະກຳຜ້າແພລາວຈົ່ງພ້ອມຮັກສາມູນເຊື້ອການຕໍ່າຫູກທໍໄໝ ການຮັກສາລວດລາຍທີ່ເປັນເອກະລັກຂອງແຕ່ລະຊົນເຜົ່າ ການຍ້ອມສີທຳມະຊາດ ການອອກແບບທີ່ເປັນເອກະລັກໄປພ້ອມກັບການຮັກສາຮີດຄອງປະເພນີອັນດີງາມໂດຍສະເພາະການນຸງຖືຂອງເອື້ອຍນ້ອງແມ່ຍິງລາວໃຫ້ຢູ່ຄູ່ກັບຄົນລາວຕະຫຼອດໄປ.
