ຂໍ້ດີຂອງການປູກດອກມະລິ ແມ່ນປູກເທື່ອດຽວ ສາມາດເກັບດອກຂາຍ ຫຼື ໃຊ້ໄປຕະຫຼອດ ແລະ ຖ້າບົວລະບັດດີໆ ຕົ້ນດອກມະລິຈະອອກດອກໄດ້ເຖິງ 10 ປີ, ສ່ວນຫຼາຍຄົນຈະປູກແບບຊໍາງ່າ ເຊິ່ງເປັນວິທີທີ່ງ່າຍ ແລະ ໄວ.
■ ມີຂັ້ນຕອນດັ່ງນີ້:
- ກຽມເອົາຊາຍປະສົມກັບຂີ້ເທົ່າຈູດແກບ ໃນອັດຕາເທົ່າກັນ ລົງໄປໃນກະຖັງ ຈາກນັ້ນກໍຫົດນໍ້າໃຫ້ຊຸ່ມ.
- ການກຽມງ່າແນວພັນ ແມ່ນຈະໃຊ້ງ່າອ່າວແກ່ ຕັດໃຫ້ມີຄວາມຍາວປະມານ 4 ນິ້ວ ຫຼື ມີຂໍ້ຢ່າງໜ້ອຍ 3 ຂໍ້, ການຕັດງ່າຄວນຕັດໃຫ້ໃກ້ຂໍ້ ພ້ອມລິໃບສ່ວນລຸ່ມອອກ ເຫຼືອໃບຄູ່ເທິງ 1 ຄູ່, ຕັດໃບອອກໃຫ້ເຫຼືອພຽງ ½ ໃບ ເພື່ອຫຼຸດການຄາຍນໍ້າ ຖ້າຕ້ອງການເລັ່ງຮາກຄວນນຳງ່າໄປຈຸ່ມຮໍໂມນເລັ່ງຮາກກ່ອນ.
- ນຳງ່າມະລິທີ່ກຽມໄວ້ໄປປັກຊໍາລົງໃນຖັງດິນທີ່ກຽມໄວ້ ໂດຍປັກລຽນເປັນແຖວ ໃຫ້ມີໄລຍະຫ່າງແຖວລະງ່າ 2×2 ນິ້ວ ຈາກນັ້ນຫົດນໍ້າຕາມທັນທີ.
- ຮັກສາຄວາມຊຸ່ມຊື່ນຂອງດິນໃຫ້ຄົງທີ່ ໂດຍນຳເອົາກະຖັງທີ່ຊໍາໄປວາງໄວ້ໃນຖົງພາສຕິກຂະໜາດໃຫຍ່ ຈາກນັ້ນມັດປາກຖົງໃຫ້ແໜ້ນ (ມັດໃຫ້ສູງ) ນຳໄປມັດໃສ່ສິ່ງໃດໜຶ່ງຄໍ້າໄວ້ ເພື່ອບໍ່ໃຫ້ປາກຖົງທັບງ່າຊໍາແລ້ວໄປໄວ້ໃນບ່ອນຮົ່ມ ແລ້ວງ່າປັກຊໍາຈະອອກຮາກພາຍໃນ 3 ອາທິດ ແຕ່ຖ້າເປັນຕົ້ນມະລິຊ້ອນຈະໃຊ້ເວລາ 1 ເດືອນ.
- ຫຼັງງ່າຊໍາອອກຮາກແລ້ວໃຫ້ນໍາໄປລ້ຽງຕໍ່ໃນຖົງຂະໜາດ 2×3 ນິ້ວ ໂດຍໃສ່ດິນ (ຖົງດຳເພາະພັນເບ້ຍ) ໂດຍດິນໃຫ້ໃສ່ໄຍໝາກພ້າວ ແລະ ປຸ໋ຍຄອກ ອັດຕາ 3:1:1 ຈົນຕົ້ນມະລິແຂງແຮງດີ ຈຶ່ງນຳໄປປູກລົງພື້ນດິນທີ່ຈະປູກ.
ໃນກໍລະນີທີ່ຕ້ອງການຂະຫຍາຍພັນເພື່ອເປັນການຄ້າ ໃຫ້ປັກຊໍາໃນພາຊະນະທີ່ໄວ້ໃນຮົ່ມເຊັ່ນ: ເຮືອນເພາະຊໍາ, ຂະໜາດຂອງພາຊະນະອາດຈະໃຊ້ກວ້າງ 1 ແມັດ, ຍາວ 20 ເມັດ, ສູງ 80 ຊັງຕີແມັດ ຫຼື ຂະໜາດອື່ນກໍໄດ້ຕາມຄວາມເໝາະສົມ, ໃຊ້ຂີ້ແກບດຳເປັນວັດສະດຸປັກຊຸມ ໂດຍໃສ່ລົງພາຊະນະປະມານ 50 ຊັງຕີແມັດ, ໄລຍະຫ່າງຂອງງ່າທີ່ປັກປະມານ 2 ນິ້ວ, ຫ່າງແຖວລະ 2 ນິ້ວ, ເມື່ອຊໍາແລ້ວ ໃຫ້ໃຊ້ພາສຕິກປິດພາຊະນະໃຫ້ດີ ປະໄວ້ 3 ອາທິດ ງ່າຕົ້ນດອກມະລິ ຈະອອກຮາກປະມານ 90% ຂອງຕົ້ນງ່າທັງໝົດ. ເມື່ອຕົ້ນມະລິອອກຮາກແລ້ວໃຫ້ສັງເກດຄວາມສົມບູນຂອງຮາກແລ້ວຈຶ່ງຍ້າຍໄປປູກໃນພື້ນທີ່ໜານ ເຊິ່ງວິທີເພາະງ່າແບບນີ້ສາມາດເພາະໄດ້ເທື່ອລະຈຳນວນຫຼາຍ ແລະ ເປີເຊັນອອກຮາກກໍຈະສູງອີກ.
farmlandthai
