ຂ່າວສານຫວຽດນາມລາຍງານວ່າ: ຫ້ອງການສະຖິຕິແຫ່ງຊາດ ອິນໂດເນເຊຍ ເຜີຍແຜ່ຂໍ້ມູນໃນວັນທີ 5 ພະຈິກ ຜ່ານມາ ວ່າ: ເສດຖະກິດ ອິນໂດເນເຊຍ ໄຕມາດທີ 3 ຂະຫຍາຍຕົວ 4,95% ເມື່ອທຽບເປັນລາຍປີ ຫຼຸດລົງຈາກລະດັບ 5,05% ໃນໄຕມາດທີ 2 ແລະ ຕໍ່າກວ່າການຄາດຄະເນ 5% ຈາກແບບສຳຫຼວດຂອງບັນດານັກວິເຄາະທີ່ຄາດຄະເນໄວ້ເລັກໜ້ອຍ.
ຂໍ້ມູນຈາກຫ້ອງການສະຖິຕິແຫ່ງຊາດ ອິນໂດເນເຊຍ ໄດ້ສະແດງໃຫ້ເຫັນວ່າ: ໃນສອງ-ສາມໄຕມາດທີ່ຜ່ານມາ ການບໍລິໂພກຂອງເອກະຊົນກວມເອົາຫຼາຍກວ່າເຄິ່ງໜຶ່ງຂອງລວມຍອດຜະລິດຕະພັນພາຍໃນ (GDP) ເພີ່ມຂຶ້ນ 4,91% ເມື່ອທຽບກັບປີກ່ອນ. ສ່ວນການສົ່ງອອກເພີ່ມຂຶ້ນ 9,09%.
ທ່ານນາງ ອາມາເລຍ ວິດຍາຊານຕິ ຫົວໜ້າຫ້ອງການສະຖິຕິແຫ່ງຊາດ ອິນໂດເນເຊຍ ກ່າວວ່າ: ການບໍລິໂພກຂອງຄົວເຮືອນໃນໄຕມາດທີ 3 ເພີ່ມຂຶ້ນຊ້າກວ່າໃນໄຕມາດທີ 2 ເປັນຜົນມາຈາກການໃຊ້ຈ່າຍກ່ຽວກັບເຄື່ອງນຸ່ງຫົ່ມ, ເກີບ ແລະ ທີ່ຢູ່ອາໄສ ຫຼຸດລົງ. ຂະແໜງການທີ່ມີການຂະຫຍາຍຕົວສູງທີ່ສຸດໃນໄຕມາດທີ 3 ແມ່ນຂະແໜງການປຸງແຕ່ງໂລຫະ ແລະ ຂະແໜງການກໍ່ສ້າງ ຊຶ່ງສອດຄ່ອງກັບໂຄງການກໍ່ສ້າງພື້ນຖານໂຄງລ່າງໃນນະຄອນຫຼວງໃໝ່ ແລະ ບ່ອນອື່ນໆ.
ເສດຖະກິດ ອິນໂດເນເຊຍ ຂະຫຍາຍຕົວ 5,05% ໃນປີ 2023 ຊຶ່ງຫຼຸດລົງຈາກລະດັບ 5,31% ໃນປີ 2022 ເນື່ອງຈາກການສົ່ງອອກທີ່ອ່ອນແອ. ໃນປີ 2024 ນີ້ ທະນາຄານກາງ ອິນໂດເນເຊຍ ຄາດວ່າຈະມີການຂະຫຍາຍຕົວຢູ່ທີ່ລະດັບ 4,7% – 5,5%.
