ພິທີເຊັນສັນຍາໂຄງການກໍ່ສ້າງເສັ້ນທາງຊົນນະບົດຢູ່ 3 ເມືອງ ຄື: ເມືອງຫົວເມືອງ, ເມືອງສົບເບົາ ແລະ ເມືອງແອດ ແຂວງ ຫົວພັນ ຈັດຂຶ້ນເມື່ອມໍ່ໆມານີ້.
ໃນນີ້ໂຄງການກໍ່ເສັ້ນທາງແຕ່ບ້ານປາຄ່າໃຕ້ ຫາ ບ້ານໂຮມກອງ ເມືອງຫົວເມືອງ ມີຄວາມຍາວ 18 ກິໂລແມັດ ໂດຍແມ່ນ ບໍລິສັດ ວັນນະວົງ ຈຳກັດ ຮ່ວມກັບ ບໍລິສັດ VLP ເປັນຜູ້ຮັບເໝົາກໍ່ສ້າງໃນມູນຄ່າ 3 ລ້ານກວ່າໂດລາສະຫະລັດ ໄລຍະການກໍ່ສ້າງ 18 ເດືອນ.
ສ່ວນໂຄງການກໍ່ສ້າງຂົວເບຕົງຍາວ 40 ແມັດ, ທາງປູຢາງ 1 ກິໂລແມັດ ແລະ ກໍ່ສ້າງວຽກພື້ນຖານຂະໜາດນ້ອຍຢູ່ເມືອງສົບເບົາ ມູນຄ່າ 3 ແສນກວ່າໂດລາ ໃຊ້ເວລາການກໍ່ສ້າງທັງໝົດ 9 ເດືອນ ແລະ ໂຄງການກໍ່ສ້າງທາງປູຢາງ ແຕ່ບ້ານນາຄຳ ຫາ ແກ້ງລິດ ເມືອງແອດ ຍາວ 5 ກວ່າກິໂລແມັດ ມູນຄ່າການກໍ່ສ້າງ 6 ແສນກວ່າໂດລາສະຫະລັດ ໄລຍະການກໍ່ສ້າງ 18 ເດືອນ ແມ່ນມອບໃຫ້ ບໍລິສັດ ພູພຽງກໍ່ສ້າງ ຈຳກັດຜູ້ດຽວ ຮ່ວມກັບ ບໍລິສັດ ເຊົ່າເທິ້ນສະໂຕນ ສຳຫຼວດ – ອອກແບບ ແລະ ກໍ່ສ້າງຈຳກັດເປັນຜູ້ຮັບເໝົາກໍ່ສ້າງ.
ລົງນາມບົດບັນທຶກສັນຍາໂຄງການກໍ່ສ້າງຄັ້ງນີ້, ຕາງໜ້າເຈົ້າຂອງໂຄງການໂດຍແມ່ນ ທ່ານ ເສີມຄໍາ ຈັນທະວົງ ຫົວໜ້າໂຄງການພັດທະນາຊົນນະບົດ ໄລຍະ 3 ແລະ 4 ຈາກກົມຂົວທາງ ກະຊວງໂຍທາທິການ ແລະຂົນສົ່ງ ຮ່ວມກັບ ຜູ້ຕາງໜ້າບັນດາບໍລິສັດຮັບເໝົາກໍ່ສ້າງ ໂດຍມີ ທ່ານ ພອນສຸກ ອິນທະວົງ ຮອງເຈົ້າແຂວງຫົວພັນ, ຫົວໜ້າພະແນກການທີ່ກ່ຽວຂ້ອງຂັ້ນແຂວງເຂົ້າຮ່ວມ.
