ນັບແຕ່ວັນທີ 1 ມັງກອນ ຫາ 4 ພະຈິກ 2024 ທາງລົດໄຟ ຈີນ – ລາວ ໄດ້ຂົນສົ່ງຜູ້ໂດຍສານທັງໝົດ ຈໍານວນ 3 ລ້ານເທື່ອຄົນ ທີ່ມາຈາກ 101 ປະເທດທົ່ວໂລກ ສະເລ່ຍປະມານ 10.000 ຄົນຕໍ່ມື້ ເພີ່ມຂຶ້ນ 44,4% ເມື່ອທຽບໃສ່ໄລຍະດຽວກັນຂອງປີ 2023.
ໃນນັ້ນ, ຜູ້ໂດຍສານພາຍໃນມີຈຳນວນ 2.893.000 ເທື່ອຄົນ ລວມທັງຂົນສົ່ງເຈົ້າໜ້າທີ່ພາກລັດ ແລະ ອາສາສະໝັກກູ້ໄພຟຣີ ໃນໄລຍະນ້ຳຖ້ວມ 1.136 ເທື່ອຄົນ, ອຳນວຍຄວາມສະດວກໃຫ້ແຂກນັ່ງລົດໄຟຟຣີ ໃນໄລຍະກອງປະຊຸມອາຊຽນ 368 ຄົນ ແລະ ຜູ້ໂດຍສານຂ້າມແດນມີຈໍານວນ 107.000 ເທື່ອຄົນ.
ເພື່ອເປັນການຮັບມື ແລະ ອໍານວຍຄວາມສະດວກໃຫ້ຜູ້ໂດຍສານທີ່ນັບມື້ຫຼາຍຂຶ້ນ, ທີ່ຜ່ານມາທາງລົດໄຟລາວ – ຈີນ ໄດ້ມີມາດຕະການຫຼາຍຢ່າງ ບໍ່ວ່າຈະເປັນການເພີ່ມຖ້ຽວລົດ, ຕໍ່ຂະບວນລົດ ແລະ ອື່ນໆ, ທັງໝົດເຫຼົ່ານີ້ ກໍເພື່ອອຳນວຍຄວາມສະດວກໃຫ້ແກ່ການໄປ – ມາຫາສູ່ກັນຂອງພໍ່ແມ່ປະຊາຊົນໃຫ້ມີຄວາມສະດວກສະບາຍຂຶ້ນ ແລະ ອຳນວຍຄວາມສະດວກໃຫ້ແກ່ການເປັນເຈົ້າພາບຈັດກອງປະຊຸມອາຊຽນຂອງ ສປປ ລາວ ພ້ອມທັງເປັນການສົ່ງເສີມການທ່ອງທ່ຽວໃນປີທ່ອງທ່ຽວລາວ 2024 ນີ້.
ໃນອະນາຄົດ ບໍລິສັດ ທາງລົດໄຟ ລາວ – ຈີນ ຈໍາກັດ ໄດ້ວາງແຜນນໍາເຂົ້າລົດໄຟ EMU ຂະບວນທີ 5 ເພື່ອຮອງຮັບນັກທ່ອງທ່ຽວ ແລະ ຊຸກຍູ້ການທ່ອງທ່ຽວລາວ ໃຫ້ກ້າວຂຶ້ນສູ່ອີກລະດັບໜຶ່ງໃນປີ 2025 ທີ່ໃກ້ຈະມາເຖິງນີ້.
