ລົດຍົນຖືເປັນອຸດສາຫະກຳຫົວໃຈຂອງເຢຍລະມັນ ເພາະກວມເອົາ5%ຂອງຈີດີພີປະເທດ ທັງເປັນສິນຄ້າສົ່ງອອກອັນດັບ1 ເຊິ່ງໄລຍະຜ່ານມາ ໄດ້ເພິ່ງພາແກັສທໍາມະຊາດຈາກຣັດເຊຍ ກວມເອົາຫຼາຍກວ່າ55% ໃນປີ2021 ແຕ່ຄວາມຂັດແຍ່ງລະ ຫວ່າງຣັດເຊຍ ກັບ ອູແກຣນ ເຮັດໃຫ້ເຢຍລະມັນ ຢຸດການຊື້ແກ໊ສ ທຳມະຊາດຈາກຣັດເຊຍ ໄປຈັດຫາແຫຼ່ງໃໝ່ທີ່ລາຄາແພງຫຼາຍ ເຊິ່ງກະທົບຕໍ່ພາກອຸດສາຫະກໍາຂອງປະເທດຢ່າງຮ້າຍແຮງ.
ສິ່ງດັ່ງກ່າວກຳລັງເປັນສັນຍານເຕືອນຕໍ່ ເຢຍລະມັນ ເສດຖະກິດໃຫຍ່ອັນດັບ1ຂອງສະຫະພາບເອີຣົບ ເຖິງວ່າໃນໄຕມາດ 3 ຂອງປີນີ້ ເສດຖະກິດຈະຂະຫຍາຍຕົວໄດ້0,2% ແຕ່ເຫດການທີ່ Volkswagen ຜູ້ຜະລິດລົດຍົນໃຫຍ່ອັນດັບ 1 ຂອງເຢຍລະມັນ ປະກາດປິດໂຮງງານບໍ່ໍຕໍ່າກວ່າ 3 ແຫ່ງໃນປະເທດ ແລະ ອາດປົດພະນັກງານນັບໝື່ນຄົນ ກໍເຮັດໃຫ້ບັນດານັກວິເຄາະຄາດຄະເນເຖິງເສດຖະກິດຂາລົງຂອງເຢຍລະມັນ.
ອຸດສາຫະກຳລົດຍົນຂອງເຢຍລະມັນ ກວມເອົາ 5% ຂອງຈີດີພີປະເທດ ແລະ ໄດ້ຈ້າງງານເກືອບ800.000ຄົນ ເຊິ່ງ 37% ເຮັດວຽກໃນ Volkswagen ແລະ ລົດຄືສິນຄ້າສົ່ງອອກອັນດັບ1 ຂອງປະເທດ ສ້າງລາຍໄດ້ຫຼາຍເຖິງ 149 ຕື້ໂດລາສະຫະລັດ.
ຂະນະທີ່ກອງທຶນເງິນຕາສາກົນ ຫຼື IMF ໄດ້ເຕືອນວ່າຫາກເຢຍລະມັນບໍ່ສາມາດເພີ່ມຜະລິດຕະພາບໄດ້ ເສດຖະກິດຂອງປະເທດຈະເຕີບໂຕໄດ້ພຽງ 0,7% ຕໍ່ປີເທົ່ານັ້ນ ເຊິ່ງເປັນອັດຕາຕໍ່າກວ່າກ່ອນເກີດໂຄວິດລະບາດເຖິງເຄິ່ງໜຶ່ງ.
ປັດໄຈສຳຄັນທີ່ກະທົບຕໍ່ພາກອຸດສາຫະກຳຂອງເຢຍລະມັນ ແມ່ນມາຈາກພະລັງງານທີ່ມີລາຄາສູງຂຶ້ນ ຫຼັງຈາກທີ່ເຢຍລະມັນພະຍາຍາມຫຼຸດການນຳເຂົ້າແກັສທຳມະຊາດຈາດຮັດເຊຍລົງເລື້ອຍໆ ແຕ່ນັ້ນໄດ້້ເລັ່ງໃຫ້ຄ່າຄອງຊີບຊອງປະເທດພຸ່ງຂຶ້ນ ແລະ ຍັງເຮັດໃຫ້ຕົ້ນທຶນອຸດສາຫະກຳສູງຂຶ້ນ ຈົນຍາກທີ່ຈະແຂ່ງຂັນກັບຕ່າງຊາດໄດ້.
