ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ ໄດ້ເປີດເວທີສົນທະນາສາກົນສັງຄົມນິຍົມຄັ້ງທີ່ XI ພາຍໃຕ້ຫົວຂໍ້: “ລັດທິມາກໃນສັດຕະວັດທີ່ XXI ໄດ້ຈັດຂຶ້ນໃນວັນທີ 8 ພະຈິກ 2024 ທີ່ ໂຮງແຮມແລນມາກ ເປັນປະທານຮ່ວມຂອງ ສະຫາຍ ປອ ກອງແກ້ວ ໄຊສົງຄາມ ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ, ສະຫາຍ ຮສ. ປອ. ຕະ ມິງ ຕວັນ ຮອງປະທານ ສະຖາບັນດິດ ວິທະຍາສາດສັງຄົມ ສ.ສ. ຫວຽດນາມ ແລະ ສະຫາຍ ສຈ. ເສີນ ຈື້ກາງ ຮອງຫົວໜ້າສະຖາບັນຄົ້ນຄວ້າລັດທິມາກ ສະຖາບັນວິທະຍາສາດສັງຄົມຈີນ ເຂົ້າຮ່ວມ ມີການນຳຂັ້ນສູງ ຂອງບັນດາກະຊວງ ແລະ ຂະແໜງການກ່ຽວຈຳນວນໜຶ່ງຂອງ ສ.ປ.ປ. ລາວ, ມີສະຫາຍເອກອັກຄະລັດຖະທູດຜູ້ມີອຳນາດເຕັມ ແຫ່ງ ສ. ກູບາ ປະຈຳ ສ ປປ ລາວ, ຜູ້ຕາງໜ້າ ສະຖານທູດ ແຫ່ງ ສສ ຫວຽດນາມ, ຜູ້ຕາງໜ້າຈາກສະຖານທູດ ສປປ ເກົາຫຼີ ແລະ ຜູ້ມີບັນດານັກຄົ້ນຄວ້າ, ນັກວິທະຍາສາດ, ຄູອາຈານ ຈາກສະຖາບັນຄົ້ນຄວ້າ ແລະ ສະຖາບັນການສຶກສາຂັ້ນສູງ ຂອງ ສປປ ລາວ ເຂົ້າຮ່ວມ.
ເວທີສົນທະນາສາກົນສັງຄົມນິຍົມຄັ້ງນິ້ ໄດ້ດຳເນີນໄປເປັນເວລາ 1 ວັນເຕັມ ໂດຍໄດ້ຮັບຟັງ ການສະ ເໜີ ບົດວິທະຍາສາດທີ່ກ່ຽວຂ້ອງທັງໝົດ 23 ບົດ, ຈາກວິທະຍາກອນຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດລາວ, ສະຖາບັນດິດວິທະຍາສາດສັງຄົມ ສ.ສ. ຫວຽດນາມ ແລະ ສະຖາບັນວິທະຍາສາດສັງຄົມຈີນ, ໃນເວທີສົນທະນາ ນັກຄົ້ນຄວ້າ, ນັກວິທະຍາສາດ ໄດ້ປະກອບຄຳຄິດຄຳເຫັນ ແລະ ແລກປ່ຽນທັດສະນະເຊິ່ງກັນ ແລະ ກັນ ກ່ຽວກັບ “ສັງຄົມນິຍົມ”. ໂດຍໄດ້ແບ່ງອອກເປັນ 3 ວາລະໃຫຍ່ຄື: ວາລະທີ (1) “ທິດສະດີສັງຄົມນິຍົມທັນສະໄໝຕໍ່ການພັດທະນາແບບກົມກຽວ ແລະ ຍືນຍົງ”. ວາລະທີ (2) “ພືດຕິກຳ ກ່ຽວກັບສັງຄົມນິຍົມທັນສະໄໝ ກັບການພັດທະນາແບບກົມກຽວ ແລະ ຍືນຍົງ” ແລະ ວາລະທີ (3) ໄດ້ຮັບຟັງການສະເໜີ ບົດວິທະຍາສາດ, ສົນທະນາປຶກສາຫາລື ແລະ ແລກປ່ຽນຄຳຄິດຄຳເຫັນ ເຊິ່ງກັນ ແລະ ກັນ ກ່ຽວກັບ “ການຮ່ວມມື ເພື່ອການພັດທະນາແບບກົມກຽວ ແລະ ຍືນຍົງ”.
ໃນຕອນທ້າຍຂອງເວທີສົນທະນາ ທ່ານ ປອ. ກອງແກ້ວ ໄຊສົງຄາມ ໄດ້ຕາງໜ້າ ຄະນະປະທານເວທີສົນທະນາ ໄດ້ສະຫຼຸບສັງລວມເນື້ອໃນຈິດໃຈ ແລະ ຄຳຄິດຄຳເຫັນ ກ່ຽວກັບເວທີສົນທະນາສາກົນສັງຄົມນິຍົມ ພາຍໃຕ້ຫົວຂໍ້ “ທິດສະດີມາກໃນສັດຕະວັດທີ XXI” ໂດຍຫຍໍ້ຄື: (1) ທິດສະດີມາກ ມີຄວາມສໍາຄັນໃນປະຫວັດສາດຂອງສັງຄົມມະນຸດ, ຍັງມີຊີວິດຊີວາ ແລະ ຮຸ່ງເຮືອງເຫຼືອງເຫຼື້ອມໃນສັດຕະວັດທີ່ XXI, ຫຼາຍປະເທດ, ຫຼາຍພັກການເມືອງ ແລະ ຫຼາຍຂະບວນການເຄື່ອໄຫວທາງການເມືອງ, ເສດຖະກິດ ແລະ ສັງຄົມ ຍັງໝູນໃຊ້ ທິດສະດີດັ່ງກ່າວ ເປັນເຂັມຊີ້ທິດເຍືອງທາງ ໃຫ້ແກ່ການເຄື່ອນໄຫວຂອງຕົນ, (2) ພັກ ແລະ ລັດຖະບານ ຂອງ ສປປ ລາວ, ສ.ສ. ຫວຽດນາມ ແລະ ສປ. ຈີນ ໄດ້ໝູນໃຊ້ ທິດສະດີມາກ ເປັນທວນໄຟອັນໃສແຈ້ງ ແລະ ເປັນເຂັມຊີ້ທິດເຍື່ອງທາງ ໃນການປົກປັກຮັກສາ ແລະ ສ້າງສາ-ພັດທະນາປະເທດຊາດຂອງຕົນ ເພື່ອກ້າວຂຶ້ນ ສັງຄົມນິຍົມ ເທື່ອລະກ້າວ ຕາມສະພາບຈຸດພິເສດ, ຄຸນຫຼັກສະນະ ແລະ ສີສັນຂອງຕົນ ແລະ (3) ມີແຕ່ການພັດທະນາກຳລັງການຜະລິດໃຫ້ກ້າວໜ້າ, ຂະຫຍາຍຕົວ, ທັນສະໄໝ ແລະ ມີປະສິດທິພາບສູງຂຶ້ນເລີ້ອຍໆ ແລະ ສູງກວ່າກວ່າ ໃນລະບອບທຶນນິຍົມເທົ່ານັ້ນ ຈິ່ງຈະເປັນການສ້າງປະຖົມປັດໄຈ ຫຼື ເງື່ອນໄຂໃຫ້ພວກເຮົາ ກ້າວຂຶ້ນສູ່ສັງຄົມນິຍົມໄດ້.
