ໃນວັນທີ 06 ພະຈິກ 2024 ກະຊວງການເງິນ, ໄດ້ຈັດພິທີຈັດຕັ້ງປະຕິບັດດຳເນີນການສະສາງລົດຂອງລັດໃຫ້ພະນັກງານບໍານານ ຂອງກະຊວງແຮງງານ ແລະ ສະຫວັດດີການສັງຄົມ ຈໍານວນ 23 ຄັນ ທີ່ໄດ້ນໍາໃຊ້ລົດຂອງລັດ; ໂດຍມີຄະນະຮັບຜິດຊອບສະສາງລົດຂອງລັດ, ພະນັກງານບໍານານ ແລະ ບັນດາພາກສ່ວນທີ່ກ່ຽວຂ້ອງເຂົ້າຮ່ວມ.
ການສະສາງລົດຂອງລັດໃຫ້ພະນັກງານບໍານານ (ລົດທີ່ນໍາໃຊ້ແລ້ວ) ຄັ້ງນີ້ໂດຍອີງຕາມຂໍ້ຕົກລົງຂອງນາຍົກລັດ ຖະມົນຕີ ສະບັບເລກທີ 169/ນຍ, ລົງວັນທີ 28 ທັນວາ 2023 ວ່າດ້ວຍການສະສາງລົດຂອງລັດ
ໃນໂອກາດດັ່ງກ່າວນີ້ ທ່ານ ສົມບູນ ແກ່ນປະເສີດ ຮອງຫົວໜ້າກົມຄຸ້ມຄອງຊັບສິນແຫ່ງລັດ ໄດ້ຂຶ້ນຜ່ານຂໍ້ຕົກລົງ ທີ່ກ່ຽວຂ້ອງກັບການສະສາງລົດຂອງລັດ ຈຳນວນໜຶ່ງໃຫ້ແກ່ພະນັກງານບຳນານທີ່ເຂົ້າຮ່ວມໃນຄັ້ງນີ້ ຈາກນັ້ນຄະນະຮັບຜິດຊອບ, ໄດ້ກວດກາເບີ່ງສະພາບລົດຕົວຈິງ ແລະ ດຳເນີນການປົດປ້າຍທະບຽນລົດລັດອອກ, ຕີລາຄາມູນຄ່າລົດແຕ່ລະຄັນຕົວຈິງທີ່ຍັງເຫຼືອ, ເພື່ອປະກອບເອກະສານສັນຍາຊື້-ຂາຍ, ຈົດທະບຽນ ແລະ ມອບເງິນເຂົ້າງົບປະມານແຫ່ງລັດຄົບຖ້ວນແລ້ວລົບລ້າງອອກຈາກບັນຊີຊັບສິນຂອງລັດ, ເພື່ອປ່ຽນປ້າຍທະບຽນເປັນຂອງບຸກຄົນຕາມລະບຽບຫຼັກການ.
