ພິທີເປີດຫຼັກສູດ ສາຂາວິຊາ ເມຄາໂຕຣນິກ ແລະ ການຄ້າເອເລັກໂຕຣນິກ ຂອງສູດຝຶກອົບຮົມວິຊາການລາວ-ຈີນ ( CHUYI ACADEMY ) ພ້ອມທັງຈັດພິທີສະຫຼຸບສົກຮຽນ 2023-2024 ແລະ ສະເຫຼີມສະຫຼອງວັນຄູ່ແຫ່ງຊາດຄົບຮອບ 30 ປີ ( 1994-2024 ) ຈັດຂຶ້ນໃນຕອນເຊົ້າຂອງວັນທີ 7 ພະຈິກ 2024 ທີ່ສະຖາບັນພັດທະນາອາຊີວະສຶກສາ. ໃຫ້ກຽດເຂົ້າຮ່ວມ ທ່ານ ຮສ ປອ ບຸນເສັງ ຄຳມູນຕີ ຜູ້ອຳນວຍການສະຖາບັນພັດທະນາອາຊີວະສຶກສາ ( ສພອ ), ທ່ານ Wang Qingguo ຮອງອະທິການບໍດີ ວິທະຍາໄລພົນລະເຮືອນຊາງຊາ ສປ ຈີນ; ພ້ອມດ້ວຍອໍານວຍການ, ຮອງອໍານວຍການ ແລະ ຕາງໜ້າຈາກ ວິທະຍາໄລເຕັກນິກລາວ-ເຢຍລະມັນ, ວິທະຍາໄລເຕັກນິກປາກປ່າສັກ ແລະ ວິທະຍາໄລອ້ອມຂ້າງ ພ້ອມດ້ວຍບັນດາຄູ່ອາຈານ ແລະ ນັກສຶກສາເຂົ້າຮ່ວມຢ່າງພ້ອມພຽງ.
ທ່ານ Wang Qingguo ຮອງອະທິການບໍດີ ວິທະຍາໄລພົນລະເຮືອນຊາງຊາ ສປ ຈີນ ກ່າວວ່າ: ວິທະຍາໄລພົນລະເຮືອນຊາງຊາ ສປ ຈີນ ໄດ້ຮ່ວມກັບວິທະຍາໄລເຕັກນິກ ລາວ-ເຢຍລະມັນ ປະເທດລາວ ສ້າງຕັ້ງຄະນະຝຶກອົບຮົມວິຊາການລາວ-ຈີນ (Chuyi Academy) ສາຂາວິຊາເມຄາໂຕຣນິກ, ໄດ້ຮ່ວມກັບວິທະຍາໄລເຕັກນິກ ປາກປ່າສັກ ສ້າງຕັ້ງຄະນະຝຶກອົບຮົມວິຊາການລາວ-ຈີນ (Chuyi Academy) ສາຂາວິຊາການຄ້າເອເລັກໂຕຣນິກ, ຮ່ວມກັນດໍາເນີນການສຶກສາທາງວິຊາການທັງສອງປະເທດແລະ ສະຖານທີ່ “2+1”, ກາຍເປັນສະຖານີເຕັກໂນໂລຊີໃນ “ໜຶ່ງແລວໜຶ່ງເສັ້ນທາງ”, ໄດ້ສ້າງຂົວເຊື່ອມຕໍ່ດ້ານການແລກປ່ຽນວັດທະນະທໍາ ສອງປະເທດຈີນ-ລາວ, ສະໜອງໂອກາດທີ່ຫຼາຍຂຶ້ນກວ່າເກົ່າ ໃນການແລກປ່ຽນແລະຮໍ່າຮຽນໃຫ້ແກ່ບັນດາໄວໜຸ່ມຂອງສອງປະເທດ.
ຂະນະດຽວກັນ ທ່ານ ສຸລິຍາ ປ່າໄຊ ຜູ້ອໍານວຍການ ວິທະຍາໄລ ເຕັກນິກລາວ-ເຢຍລະມັນ ກ່າວວ່າ: ວິທະຍາໄລ ເຕັກນິກລາວ-ເຢຍລະມັນ ເປັນວິທະໄຍທໍາອິດຂອງ ສປປ ລາວ ທີ່ໄດ້ເປີດຫຼັກສູດ ເມຄາໂຕຣນິກ ເປັນຊຸດທໍາອິດ ໂດຍການສະໜັບສະໜູນຂອງ ວິທະຍາໄລ ພົນລະເຮືອນ ຊາງຊາ ສປ ຈີນ ໄດ້ຮັບການອະນຸມັດຈາກ ກະຊວງສຶກສາທິການ ແລະ ກີລາ ໃນວັນທີ 12 ມີນາ 2024 ໃນນັ້ນລວມມີ 156 ໜ່ວຍກິດ, ມີ 4720 ຊົ່ວໂມງ ( ລວມພາສາຈີນ ).
ທ້າວ ເສກສັນ ປັນຍາອຸດົມ ຕາງໜ້ານັກສຶກສາຈາກ ວິທະຍາໄລ ເຕັກນິກລາວ-ເຢຍລະມັນ ກ່າວວ່າ: ການໄດ້ຮັບທຶນການສຶກສາຄັ້ງນີ້ ເໝືອນກັບການເປີດປະຕູບານໃໝ່ໃຫ້ກັບພວກນ້ອງ ເພື່ອກ້າວເຂົ້າສູ່ໂລກຂອງວິຊາການທີ່ພວກນ້ອງເອງມີຄວາມຝັນຢາກສຶກສາຄົ້ນຄວ້າ. ເມຄາໂຕຣນິກ ເປັນສາຂາວິຊາທີ່ມີຄວາມສໍາຄັນຫຼາຍໃນຍຸກສະໄໝປັດຈຸບັນ ເພາະມັນເປັນການຮວບຮວມເອົາວິຊາການດ້ານວິສະວະກໍາເຄື່ອງກົນຈັກ, ວິສະວະກໍາໄຟຟ້າ ແລະ ວິທະຍາສາດຄອມພິວເຕີເຂົ້າດ້ວຍການ ເພື່ອສ້າງສັນເຕັກໂນໂລຊີໃໝ່ໆ ທີ່ຈະມາປ່ຽນແປງໂລກຂອງພວກເຮົາ ແລະ ບໍ່ທັນມີສະຖາບັນໃດເປີດການຮຽນການສອນ ສາຂານີ້ມາກ່ອນໃນປະເທດລາວ.
ນອກນັ້ນ, ພິທີດັ່ງກ່າວ ຍັງໄດ້ມີການຈັດພິທີສະຫຼຸບສົກຮຽນ 2023-2024 ແລະ ສະເຫຼີມສະຫຼອງວັນຄູ່ແຫ່ງຊາດຄົບຮອບ 30 ປີ ( 1994-2024 ) ນັກສືຶກສາມອບຂອງຂວັນໃຫ້ກັບຄູບາອາຈານ ແລະ ຍັງມີການມອບໃບຍ້ອງຍໍໃຫ້ກັບບັນດາຄູອາຈານອີກດ້ວຍ.
