ໃນໄລຍະເດືອນ 10 ຂອງປີ 2024 ເຈົ້າໜ້າທີ່ການຄ້າຂອງລາວ ແມ່ນໄດ້ເຮັດໜ້າທີ່ຂອງຕົນຢ່າງເປັນປົກກະຕິໃນການຕິດຕາມກວດກາການຄ້າຂາຍຕາມທ້ອງຕະຫຼາດ ຊຶ່ງເຫັນວ່າສິນຄ້າສ່ວນໃຫຍ່ແມ່ນໄດ້ດຳເນີນການຢ່າງຖືກຕ້ອງຕາມລະບຽບກົດໝາຍຂອງບ້ານເມືອງ ແຕ່ຍັງມີຈຳນວນໜຶ່ງທີ່ລະເມີດລິຂະສິດ.
ຄະນະເຈົ້າໜ້າທີ່ການຄ້າ ກົມແຂ່ງຂັນທາງທຸລະກິດ ແລະ ກວດກາການຄ້າ ກະຊວງອຸດສາຫະກຳ ແລະ ການຄ້າ ໄດ້ໃຫ້ຮູ້ວ່າ ໃນໄລຍະ 10 ເດືອນຂອງປີ 2024 ນີ້ ເຈົ້າໜ້າທີ່ການຄ້າແມ່ນໄດ້ລົງຕິດຕາມ, ກວດກາ ການນຳເຂົ້າ ແລະ ຈຳໜ່າຍສິນຄ້ານອກລະບົບ, ສິນຄ້າບໍ່ຕິດສະຫຼາດເປັນພາສາລາວ ຢູ່ບັນດາຕະຫຼາດ ແລະ ຮ້ານຊຸບເປີ້ມາແກັດ ຈຳນວນໜຶ່ງ ຢູ່ນະຄອນຫຼວງວຽງຈັນ ເຊິ່ງໄດ້ພົບເຫັນວ່າ ບັນດາຮ້ານຈຳນວນໜຶ່ງຍັງມີການຈຳໜ່າຍສິນຄ້າ ລັກລອບນຳເຂົ້າມາຈາກຕ່າງປະເທດ ແລະ ລະເມີດລິຂະສິດຂອງບັນດາບໍລິສັດ ທີ່ໄດ້ຈົດທະບຽນນຳເຂົ້າຖືກຕ້ອງຕາມກົດໝາຍ ແລະ ລະບຽບການ ເປັນຕົ້ນແມ່ນສິນຄ້າປະເພດ ນ້ຳປາ, ນ້ຳສະອິວ, ປະເພດໝີ່, ນ້ຳມັນພືດ, ນ້ຳຊັອດ ແລະ ອື່ນໆ…
ເຊິ່ງຄະນະເຈົ້າໜ້າທີ່ການຄ້າ ໄດ້ເຮັດບົດບັນທຶກກ່າວເຕືອນ ໄວ້ເປັນຫຼັກຖານ ພ້ອມທັງກຳນົດໃຫ້ເວລາ 30 ວັນ ນັບແຕ່ມື້ເຮັດບົດບັນທຶກໃຫ້ປັບປຸງແກ້ໄຂ ແລະ ຫັນເຂົ້າສູ່ລະບຽບການຢ່າງຖືກຕ້ອງ.
ນອກຈາກປະເພດສິນຄ້າບໍລິໂພກ ອຸປະໂພກແລ້ວ ຍັງມີສິນຄ້າລອກຮຽນແບບ ລະເມີດເຄື່ອງໝາຍກາຍຄ້າ ສິນຄ້າປະເພດເຄື່ອງສໍາອາງ, ເຄື່ອງດື່ມປະເພດຕ່າງໆ, ອາຫານບໍາລຸງສຸຂະພາບທີ່ນໍາເຂົ້າບໍ່ຖຶກຕ້ອງໂດຍບໍ່ໄດ້ຮັບອະນຸຍາດຈາກພາກສ່ວນກ່ຽວຂ້ອງ.
ມັນຈະສົ່ງຜົນສະທ້ອນເຖິງຜູ້ບໍລິໂພກໂດຍກົງທາງດ້ານສຸຂະພາບ ແລະ ຊັບສິນ.
