ເຂົ້າລາວເປັນທີ່ຍອມຮັບຂອງຕະຫຼາດສາກົນເທື່ອລະກ້າວ ຫຼັງຜູ້ປະກອບການຕັດສິນໃຈຍົກລະດັບເຄື່ອງມືການຜະລິດຈົນທຽບທັນຕ່າງປະເທດ ລ້າສຸດ ບໍລິສັດຈໍາປາຫອມການຄ້າ ໄດ້ມອບສົ່ງເຂົ້າລາວ 19 ໂຕນ ຫຼື 1 ຕູ້ຄອນເທັນເນີ້ ໄປຂາຍຢູ່ປະເທດສະຫະລັດອາເມລິກາ ແລະ ຖືເປັນປະເທດທີ 3 ທີ່ບໍລິສັດດັ່ງກ່າວ ນໍາເຂົ້າໄປຂາຍ.
ທ່ານ ນາງ ບຸນຮຽງ ພົມມີໄຊ ເປັນຮອງປະທານສະມາຄົມທຸລະກິດກະສິກໍາລາວ ຜູ້ຊີ້ນໍາວຽກປູກເຂົ້າ, ທັງເປັນຮອງປະທານສະພາການຄ້າເມືອງໄຊທານີ, ປະທານບໍລິສັດຈໍາປາຫອມການຄ້າ ຂາອອກ ຂາເຂົ້າ ໄດ້ກ່າວວ່າ: ຂ້າພະເຈົ້າໃນນາມຜູ້ປະກອບການ ສະແດງຄວາມຂອບໃຈມາຍັງການຈັດຕັ້ງພາກລັດທຸກຂະແໜງການທີ່ອໍານວຍຄວມສະດວກ ໃນການສົ່ງເສີມ ແລະ ພັດທະນາ ຂະແໜງການປູກເຂົ້າຕະຫຼອດມາ.
ການສົ່ງເຂົ້າໄປ ຂາຍຢູ່ປະເທດສະຫະລັດອາເມລິກາຄັ້ງນີ້ ເປັນຜົນມາຈາກໃນໄລຍະຜ່ານມາໄດ້ມີໂອກາດໄປປະເທດສະຫະລັດອາເມລິກາ ແລະ ໄດ້ເຫັນ ທ່າແຮງ ແລະ ໂອກາດດ້ານການຕະຫຼາດ ແລະ ໄດ້ປືກສາຫາລືກັບທ່ານ ຈອນ ໄມມູນດົກ ປະທານ ບໍລິສັດ ເຈເຈອິນເຕີພາຍ ເຊິ່ງໄດ້ມີການເຊັນສັນຍາຮ່ວມມືກັນ ໃນວັນທີ 28 ພະຈິກ ໃນປີຜ່ານມາ ແລະ ໄດ້ມີການດໍາເນີນການດ້ານເອກະສານ ຈົນສໍາເລັດ100% ແລະ ຈັດພິທີສົ່ງເຂົ້າໄປໃນຄັ້ງນີ້.
ທ່ານກ່າວວ່າ: ຖືວ່າເປັນໂອກາດດີ ແລະ ເປັນບາດກ້າວສໍາຄັນ ເພາະວ່າເຂົ້າທີ່ສົ່ງໄປແມ່ນກາຈໍາປາຫອມ ແບຣນຂອງຂ້າພະເຈົ້າເອງ ແລະ ຫວັງຢ່າງຍິ່ງວ່າໃນອະນາຄົດ ກໍຈະມີຫຼາຍໆແບຣນຂອງເຂົ້າລາວຈະອອກໄປຈໍາໜ່າຍຢູ່ຕ່າງປະເທດເຊັ່ນກັນ.
ສໍາລັບເຂົ້າທີ່ຈະສົ່ງໄປຄັ້ງນີ້ ມີ 3 ປະເພດຄື ເຂົ້າໜຽວໄກ່ນ້ອຍ, ເຂົ້າໜຽວ ແລະ ເຂົ້າຈ້າວ ເຊິ່ງເປັນການສົ່ງໄປຄັ້ງທໍາອິດ ຈໍານວນ 1 ຕູ້ຄອນເທັນເນີ ປະມານ19 ໂຕນ.
ຂໍຝາກເຖິງພີ່ນ້ອງຊາວລາວທີ່ອາໄສຢູ່ຕ່າງປະເທດ ໂດຍສະເພາະປະເທດສະຫະລັດອາເມລິກາ ຂໍໃຫ້ສະໜັບສະໜູນ ຜະລິດຕະພັນລາວເຮົາ ເຊິ່ງບໍລິສັດຈໍາປາຫອມເປັນຜູ້ບຸກເບີກຕະຫຼາດໄປກ່ອນ ໃນຕໍ່ໜ້າ ຄິດວ່າຈະມີ ຫຼາຍແບຣນທີ່ຈະສົ່ງໄປຕື່ມອີກ ຊ່ວຍໃຫ້ສິນຄ້າຕີຕະຫຼາດໄດ້ ເຮັດໃຫ້ຊາວນາລາວເຮົາມີການຜະລິດທີ່ດີ ແລະ ມີລາຍຮັບເພີ່ມຂຶ້ນ. ສ່ວນເບື້ອງ ບໍລິສັດກໍຈະປັບປຸງ ພັດທະນາຕົນເອງເຕັມທີ່ ດ້ານຄຸນນະພາບໃຫ້ດີຂຶ້ນເລື້ອຍໆ ຮອງຮັບໂອກ່າດທາງຕະຫຼາດທີ່ຈະເຂົ້າມາເພີ່ມຂຶ້ນ.
ໃນໄລຍະຜ່ານມາ ເຂົ້າກາຈໍາປາຫອມ ຂອງລາວໄດ້ສົ່ງໄປປະເທດ ບຽວຢ້ຽມ(ແບນຊິກ) ແລະ ປະເທດຝຣັງ ແມ່ນໄດ້ຮັບຄວາມນິຍົມສູງ ແລະ ຖືວ່າໄດ້ຮັບການນ້ອງຍໍຊົມເຊີຍວ່າເຂົ້າລາວແຊບອ່ອນນຸ້ນ ແລະ ຄຸນນະພາບດີ.
ພິທີດັ່ງກ່າວຈັດຂຶ້ນວັນທີ 5 ພະຈິກ 2024 ທີ່ບໍລິສັດຈໍາປາຫອມການຄ້າ ຂາອອກ – ຂາເຂົ້າຈໍາກັດຜູ້ດຽວ ບ້ານດອນໜູນ ເມືອງໄຊທານີ ນະຄອນຫຼວງວຽງຈັນ ເຂົ້າຮ່ວມຂອງທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ ກະຊວງ ອຸດສາຫະກໍາ ແລະ ການຄ້າ, ທ່ານ ວຽງຄໍາ ສີຫາໂຄດ ເຈົ້າເມືອງໄຊທານີ, ທ່ານ ນາງ ວັນມະນີ ພີມມະສານ ທ່ານຫົວໜ້າພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ ພ້ອມດ້ວຍການນໍາຂະແໜງການກ່ຽວຂ້ອງເຂົ້າຮ່ວມ.
