ກະຊວງອຸດສາຫະກໍາ ແລະ ການຄ້າ ໄດ້ຮ່ວມກັບ ບໍລິສັດ ລາວສະແຕນດາດ ຈຳກັດ ລົງນາມບົດບັນທຶກຄວາມເຂົ້າໃຈ (MOU) ກ່ຽວກັບໂຄງການສຶກສາຄວາມເປັນໄປໄດ້ໃນການຮ່ວມມືວຽກງານກວດກາ ແລະ ຢັ້ງຢືນເຄມີ ກ່ອນນໍາເຂົ້າມາໃນ ສປປ ລາວ.
ພິທີດັ່ງກ່າວຈັດຂຶ້ນໃນວັນທີ 4 ພະຈິກ 2024 ທີ່ກະຊວງ ອຄ ເຂົ້າຮ່ວມຂອງທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງ ອຄ, ການລົງນາມຂອງທ່ານ ປອ ບົວວັນ ວິລະວົງ ຫົວໜ້າຫ້ອງການກະຊວງ ອຄ ແລະ ທ່ານ ອຸທັນ ໄຕລິດທິ ປະທານບໍລິສັດ ລາວສະແຕນດາດ ຈຳກັດ ເຂົ້າຮ່ວມມີຜູ້ຕາງໜ້າຈາກ ບັນດາກົມອ້ອມຂ້າງກະຊວງ ອຄ ແລະ ຕາງໜ້າບໍລິສັດ ລາວສະແຕນດາດ ຈຳກັດ.
ທ່ານ ບຸນເຖິງ ດວງສະຫວັນໄດ້ກ່າວວ່າ: ການຮ່ວມມືວຽກງານດັ່ງກ່າວ ແມ່ນສອດຄ່ອງກັບພາລະບົດບາດຂອງກະຊວງອຸດສາຫະກຳ ແລະ ການຄ້າໃນການຕິດຕາມ ກວດກາ ແລະ ວິໄຈ ຄວາມຖືກຕ້ອງຂອງທາດເຄມີ ທີ່ນຳເຂົ້າ-ສົ່ງອອກ ເຊິ່ງຈະຊ່ອຍຊຸກຍູ້ສົ່ງເສີມໃຫ້ຜູ້ດຳເນີນທຸລະກິດກ່ຽວກັບທາດເຄມີ ເອົາໃຈໃສ່ການນຳເຂົ້າເຄມີ ໃຫ້ຖືກຕາມເປົ້າໝາຍ, ມີຄວາມປອດໄພ ແລະສອດຄ່ອງກັບກົດໝາຍ, ລະບຽບການທີ່ຈັດຕັ້ງປະຕິບັດຢູ່ ເປັນຕົ້ນ ກົດໝາຍ ວ່າດ້ວຍຄຸ້ມຄອງເຄມີ, ຂໍ້ຕົກລົງ ວ່າດ້ວຍການບໍລິການທີ່ປຶກສາຄວາມປອດໄພກ່ຽວກັບເຄມີ ແລະ ຂໍ້ຕົກລົ ງວ່າດ້ວຍການຂຶ້ນທະບຽນບັນຊີເຄມີ, ການນຳເຂົ້າ-ສົ່ງອອກ, ສົ່ງຜ່ານເຄມີ.
ຜ່ານມາຂະແໜງການອຸດສາຫະກຳ ແລະ ການຄ້າ ບໍ່ໄດ້ມີການແຕ່ງຕັ້ງພະນັກງານໄປປະຈຳຢູ່ດ່ານພາສີສາກົນ ເພື່ອກວດກາເຄມີກ່ອນການນຳເຂົ້າມາ ແຕ່ຈະກວດກາເຄມີພາຍຫຼັງທີ່ໄດ້ນຳເຄມີເຂົ້າມາແລ້ວ ເນື່ອງຈາກຍັງຂາດເຄື່ອງມືອຸປະກອນ, ພະນັກງານທີ່ມີຄວາມຊຳນານ ແລະ ຕ້ອງໄດ້ກຳນົດລາຍການເຄມີທີ່ຈະທໍາການກວດກາ ແລະ ວິໄຈ ເປັນອັນສະເພາະຈຶ່ງສາມາດປະຕິບັດໄດ້.
ການຮ່ວມມືດັ່ງກ່າວ ຈະຊ່ວຍໃຫ້ພະນັກງານ ຂະແໜງການ ອຄ ໄດ້ຮັບຍົກລະດັບຄວາມຮູ້ຄວາມສາມາດ ໃນການສຶກສາໃນການເກັບ ແລະ ວິໄຈຕົວຢ່າງເຄມີເພີ່ມຂຶ້ນ ໃນອະນາຄົດ ຫາກວຽກງານດັ່ງກ່າວມີຄວາມເຂັ້ມແຂງຂະແໜງການອຸດສາຫະກຳ ແລະ ການຄ້າ ອາດພິຈາລະນາຄົ້ນຄວ້າ ແຕ່ງຕັ້ງພະນັກງານໄປປະຈຳຢູ່ດ່ານພາສີສາກົນເພື່ອກວດກາເຄມີກ່ອນການນຳເຂົ້າມາ ຄ້າຍຄືກັບປະເທດອ້ອມຂ້າງ.
ທ່ານ ບຸນເຖິງ ດວງສະຫວັນ ໄດ້ເນັ້ນໜັກໃຫ້ ກົມອຸດສາຫະກຳ ແລະ ບໍລິສັດ ເອົາໃຈໃສ່ລົງເກັບກຳຂໍ້ມູນລະອຽດ ເພື່ອສຶກສາຄວາມເປັນໄປໄດ້ ແລະ ເປັນຂໍ້ມູນໃນການວາງແຜນກຳນົດກອບໜ້າວຽກ ແລະ ຂອບເຂດໃນການເຮັດວຽກຮ່ວມກັນ ພ້ອມທັງໃຫ້ສືກສາຂໍ້ມູນລະອຽດ ທາງດ້ານບຸກຄະລາກອນ, ເຄື່ອງມືອຸປະກອນ,ສະຖານທີ່ຮອງຮັບ, ກົດໝາຍ, ລະບຽບການ, ຜົນໄດ້, ຜົນເສຍທີ່ກ່ຽວຂ້ອງ ແລະ ໃຫ້ສຶກສາຂໍ້ມູນຂອງຕ່າງປະເທດ
ຕື່ມ ເພີ່ນມີການຈັດຕັ້ງປະຕິບັດແນວໃດ. ໃນຕອນທ້າຍ, ກໍໄດ້ສະແດງຄວາມຂອບໃຈມາຍັງທຸກພາກສ່ວນທີ່ໃຫ້ການຮ່ວມມື ແລະ ສະໜັບສະໜູນ ຕະຫຼອດມາ ແລະ ຂໍສະແດງຄວາມຊົມເຊີຍຕໍ່ການຮ່ວມມື ໃນຄັ້ງນີ້ ແລະອວຍພອນໃຫ້ການຈັດຈັດຕັ້ງປະຕິບັດປະສົບຜົນສຳເລັດ ຕາມຈຸດປະສົງທີ່ວາງໄວ້.
ທ່ານ ອຸທັນ ໄຕລິດທິ ກ່າວວ່າ ເຄມີແຕ່ລະຊະນິດ ລ້ວນແຕ່ມີປະໂຫຍດ ແລະ ໂທດ ໃນລະດັບທີ່ແຕກຕ່າງກັນ ມັນຂຶ້ນກັບການນໍາໃຊ້ ແລະ ຄຸ້ມຄອງທີ່ຖືກຕ້ອງ ຕາມຫຼັກການວິຊາການ ຈຸດປະສົງໃນການຮ່ວມມືຄື ການກວດກາ ຄວາມຖືກຕ້ອງໃນການນໍາເຂົ້າເຄມີ ຢູ່ດ່ານສາກົນ ກ່ອນນໍາເຂົ້າມາ ສປປລາວ ເພື່ອຫຼີກລ້ຽງການນໍາເຂົ້າທາດເຄມີທີ່ບໍ່ຖືກຕ້ອງຕາມກົດໝາຍ ເຊິ່ງພວກເຮົາມີຄວາມພ້ອມດ້້ານງົບປະມານ, ເຕັກນິກ, ວິຊາການ ແລະ ເຄື່ອງມືໃນການວັດແທກຕ່າງໆ ການລົງເກັບກໍາຂໍ້ມູນ ກວດກາ ເກັບໂຕຢ່າງ ການວິໄຈ ສະໜອງເຄື່ອງມືອຸປະກອນ ໃນການຕອບໂຕ້ ໃນກໍລະນີເກີດອຸບັດເຫດ ການແນະນໍາ ແລະ ຝືກອົບຮົມ ກ່ຽວກັບການຄຸ້ມຄອງເຄມີທີ່ຖືກຕ້ອງ ສືກສາບົດຮຽນພາກປະຕິບັດໃນປະເທດ ອ້ອມຂ້າງ ເວົ້າລວມແລ້ວ ຄວາມໝາຍການສືກສາຄວາມເປັນໄປໄດ້ ໃນການຮ່ວມມືວຽກງານກວດກາ ແລະ ຢັ້ງຢືນເຄມີແມ່ນ ເພື່ອເຮັດໃຫ້ວຽກງານຕີດຕາມຄຸ້ມຄອງເຄມີຖືກຈັດຕັ້ງປະຕິບັດຢ່າງ ເປັນຮູບປະທໍາຫຼາຍຂຶ້ນ.
