ໃນວັນທີ 30 ຕຸລາ 2024 ຜ່ານມານີ້, ທີ່ພະແນກການເງິນແຂວງຄໍາມ່ວນ, ໄດ້ຈັດພິທີປະກາດການຈັດຕັ້ງພະນັກງນນໍາພາ-ຄຸ້ມຄອງພາສີ ປະຈໍາແຂວງຄໍາມ່ວນ; ໂດຍການເຂົ້າຮ່ວມຂອງທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງໆຄໍາມ່ວນ,ມີທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານ ກະຊວງການເງິນ, ທ່ານ ພູເຂົາຄໍາ ວັນນະວົງໄຊ ຫົວໜ້າກົມພາສີ ກະຊວງການເງິນ, ມີຫົວໜ້າພະແນກ, ຮອງພະແນກການອ້ອມຂ້າງແຂວງ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.
ໃນພິທີ, ທ່ານ ພູວັນ ໄຊຍະວົງ ຫົວໜ້າພະແນກຄຸ້ມຄອງພະນັກງານ ກົມຈັດຕັ້ງ ແລະ ພະນັກງານ ກະຊວງການເງິນ, ໄດ້ຜ່ານຂໍ້ຕົກລົງຂອງກະຊວງການເງິນ ສະບັບເລກທີ 2843/ກງ ແລະ ຂໍ້ຕົກລົງສະບັບເລກທີ 2844/ກງ,ລົງວັນທີ 28 ຕຸລາ 2024 ວ່າດ້ວຍການຍົກຍ້າຍ ແລະ ແຕ່ງຕັ້ງ: ທ່ານ ພູເມືອງ ແກ້ວຈັນທະລາ ຫົວໜ້າພະສີປະຈໍາ ແຂວງຄໍາມ່ວນ ໄປຮັບໜ້າທີ່ໃໝ່ຢູ່ຕ່າງແຂວງ; ແຕ່ງຕັ້ງ: ທ່ານ ວິລະປະຊາ ຫຼວງອາມາດ ຮອງຫົວໜ້າພາສີ ປະຈໍາແຂວງຄໍາມ່ວນ ເປັນຫົວໜ້າພາສີປະຈໍາແຂວງຄໍາມ່ວນ ແລະ ໃຫ້ປະຕິບັດເງິນອຸດໜູນຕໍາແໜ່ງບໍລິຫານປະເພດ 4 ຕາມດໍາລັດຂອງນາຍົກລັດຖະມົນຕີ ສະບັບ ເລກທີ 203/ລບ,ລົງວັນທີ 4 ກໍລະກົດ 2017 ນັບແຕ່ງວດ I ປີ 2025 ເປັນຕົ້ນໄປ; ເປັນກຽດມອບຂໍ້ຕົກລົງໃຫ້ບັນດາທ່ານທີ່ໄດ້ຮັບການແຕ່ງຕັ້ງໃນຄັ້ງນີ້ໂດຍທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານກະຊວງການເງິນ.
ໃນໂອກາດນີ້, ທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາ ແລະ ສະແດງຄວາມຊົມຕໍ່ຜົນງານການເຄື່ອນໄຫວຂອງວຽກງານພາສີປະຈໍາແຂວງໃນໄລຍະຜ່ານມາ, ເຊິ່ງໄດ້ປະກອບສ່ວນອັນສໍາຄັນເຂົ້າ ໃນການພັດທະນາເສດຖະກິດ-ສັງຄົມຂອງຊາດ ໂດຍສະເພາະກໍ່ຄືແຂວງຄໍາມ່ວນ, ພ້ອມທັງຮຽກຮ້ອງມາຍັງບັນດາທ່ານທີ່ໄດຮັບການແຕ່ງຕັ້ງມອບໝາຍໜ້າທີ່ຈົ່ງໄດ້ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງ, ຍົກສູງຄວາມສາມັກຄີພາຍໃນໝູ່ຄະນະໃຫ້ໜັກແໜ້ນ, ມີຄວາມເປັນເອກະພາບກັນສູງທາງດ້ານການ ເມືອງ, ແນວຄິດ ແລະ ການຈັດຕັ້ງ,ເສີມຂະຫຍາຍປະຊາທິປະໄຕພາຍໃນພັກໃຫ້ເລິກເຊິ່ງເຖິງຖອງ ແລະ ນໍາພາດ້ານວຽກງານວິຊາສະເພາະໃຫ້ໄດ້ຮັບການເຄື່ອນໄຫວຢ່າງຕໍ່ເນື່ອງບົນພື້ນຖານປະຕິບັດຕາມພາລະບົດບາດ, ໜ້າທີ່ ແລະ ລະບຽບກົດໝາຍວາງອອກ, ໂດຍຕິດພັນກັບການປະຕິບັດຂະບວນການແຂ່ງຂັນຮັກຊາດ ແລະ ພັດທະນາໃຫ້ໄດ້ຮັບຜົນສໍາເລັັດທີ່ດີ.
ແຫຼ່ງຂ່າວແຈ້ງຮູ້ຕື່ມອີກວ່າ: ໃນວັນທີ 31 ຕຸລາ 2024 ນີ້, ທີ່ພະແນກການເງິນແຂວງສະຫວັນນະເຂດ, ໄດ້ຈັດພິທີປະກາດການຈັດຕັ້ງພະນັກງານນໍາພາ-ຄຸ້ມຄອງພາສີປະຈໍາແຂວງສະຫວັນນະເຂດ, ໂດຍການເຂົ້າຮ່ວມໃນພິທີຂອງທ່ານ ພູວັງ ເກດແກ້ວພົມພອນ ຮອງເລຂາພັກແຂວງ, ຜູ້ຊີ້ນຳວຽກງານການເມືອງ-ແນວຄິດ, ມີທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານ ກະຊວງການເງິນ, ພ້ອມຂະແໜງການກ່ຽວຂ້ອງເຂົ້າຮ່ວມ.
ໃນພິທີ, ທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານກະຊວງການເງິນ ໄດ້ຜ່ານຂໍ້ຕົກລົງ ຂອງລັດຖະມົນຕີກະຊວງການເງິນ ສະບັບເລກທີ 2845/ກງ ແລະ ຂໍ້ຕົກລົງ ສະບັບເລກທີ 2846/ກງ, ລົງວັນທີ 28 ຕຸລາ 2024 ວ່າດ້ວຍການຕົກລົງຍົກຍ້າຍ ແລະ ແຕ່ງຕັ້ງ: ທ່ານ ພົມມະຈັກ ສີພັນດອນ ຫົວໜ້າພາສີ ປະຈໍາ ແຂວງສະຫວັນນະເຂດ ໄປຮັບໜ້າທີ່ໃໝ່ຢູ່ກົມພາສີ ກະຊວງການເງິນ.
ແຕ່ງຕັ້ງ: ທ່ານ ບຸນເພັງ ເຂັມມາລາ ຫົວໜ້າພາສີປະຈຳແຂວງຈຳປາສັກ ເປັນຫົວໜ້າພາສີປະຈໍາແຂວງສະຫວັນນະເຂດ; ເປັນກຽດມອບຂໍ້ຕົກລົງ ໃຫ້ບັນດາທ່ານທີ່ໄດ້ຮັບການແຕ່ງຕັ້ງໃນຄັ້ງນີ້ໂດຍທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານ ກະຊວງການເງິນ.
