ໂຮງໝໍ ຫຼັກໄຊ ( Luckxay Hospital ) ມອບຊຸດຊ້ອມ ແລະ ຊຸດແຂ່ງຂັນໃຫ້ກັບ ສະປິຣິດ ອະຄາເດມີ ( Spirit Academy ) ສະໂມສອນບານເຕະເຍົາວະຊົນ ເພື່ອນໍາໃຊ້ເຂົ້າຮ່ວມແຂ່ງຂັນລາຍການທັງພາຍໃນ ແລະ ຕ່າງປະເທດ ໂດຍສະເພາະລາຍການ Dream Cup 2024 ທີ່ Jecheon ສ. ເກົາຫຼີ ລະຫວ່າງວັນທີ 22-24 ພະຈິກ 2024.
ໃນຕອນເຊົ້າຂອງວັນທີ 3 ພະຈິກ 2024 ທີ່ສະໜາມບານເຕະຫຍ້າທຽມ ກົມພະລາ ຫຼັກ 5 ບ້ານຈອມມະນີ, ເມືອງໄຊເສດຖາ, ນະຄອນຫຼວງວຽງຈັນ ໄດ້ມີພິທີມອບເຄື່ອງ ໃຫ້ກຽດມອບໂດຍ ທ່ານ ດຣ. ທັດສະພອນ ພັນທຸວົງ ຕາງໜ້າໂຮງໝໍ ຫຼັກໄຊ ແລະ ໃຫ້ກຽດຮັບໂດຍ ທ່ານ ນາງ ມະນີຈັນ ແກ້ວລະຄອນ ຜູ້ບໍລິຫານຂອງສະໂມສອນ Spirit Academy ໂດຍມີຄະນະຄູຝຶກ, ນັກກີລາ ແລະ ພໍ່ແມ່ຜູ້ປົກຄອງເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ ທ່ານ ດຣ. ທັດສະພອນ ພັນທຸວົງ ຕາງໜ້າໂຮງໝໍ ຫຼັກໄຊ ໃຫ້ສໍາພາດວ່າ: ໂຮງໝໍ ຫຼັກໄຊ ເປັນໂຮງໝໍເອກະຊົນແຫ່ງໜຶ່ງ ທີ່ຕັ້ງຢູ່ບ້ານຊ້າງຄູ້ ເມືອງໄຊທານີ ນະຄອນຫຼວງວຽງຈັນ ໄດ້ເປັນສ່ວນໜຶ່ງໃນການສະໜັບສະໜູນສະໂມສອນບານເຕະເຍົາວະຊົນລາວ ໂດຍສະເພາະແມ່ນສະໂມສອນ Spirit Academy ເພື່ອສົ່ງເສີມໃຫ້ເດັກນ້ອຍຫັນມາຫຼິ້ນກີລາເຮັດໃຫ້ສຸຂະພາບແຂງແຮງ, ໃຊ້ເວລາຫວ່າງໃຫ້ເປັນປະໂຫຍດ ຫ່າງໄກຈາກສິ່ງເສບຕິດ ແລະ ສົ່ງເສີມໃຫ້ເດັກນ້ອຍມີສຸຂະພາບຈິດທີ່ດີ ເຂົ້າສູ່ສັງຄົມແຕ່ໄວເດັກຜ່ານກີລາບານເຕະ ລວມທັງຍັງເປັນການສ້າງໂອກາດໃຫ້ກັບເດັກນ້ອຍພັດທະການເປັນນັກເຕະ ເພື່ອກ້າວສູ່ອາຊີບໃນອະນາຄົດ.
ຂະນະດຽວກັນ ທ່ານ ນາງ ມະນີຈັນ ແກ້ວລະຄອນ ຜູ້ບໍລິຫານຂອງສະໂມສອນ Spirit Academy ກ່າວວ່າ: ສະໂມສອນ Spirit Academy ເປັນສະໂມສອນສ້າງຂຶ້ນມາໃໝ່ ເພື່ອອີກແຮງໃນການພັດທະນານັກເຕະເຍົາວະຊົນລາວ ເຊິ່ງມື້ນີ້ເປັນມື້ພິເສດເພາະທາງ ໂຮງໝໍ ຫຼັກໄຊ ໄດ້ມອບເຄື່ອງກີລາເປັນຕົ້ນແມ່ນຊຸດແຂ່ງ ແລະ ຊຸດຊ້ອມ ໃນປີນີ້ຫຼາຍກວ່າ 50 ຊຸດ ເພື່ອນໍາໃຊ້ເຂົ້າຮ່ວມການແຂ່ງຂັນ ໂດຍສະເພາະລາຍການມິດຕະພາບລາວ-ໄທ ທີ່ແຂວງໜອງຄາຍ ປະເທດໄທ ພວກເຮົາກໍສາມາດຍາດໄດ້ແຊັມ 2 ຮຸ່ນ ແລະ ຕໍ່ມາເຂົ້າຮ່ວມແຂ່ງຂັນກັບທີມ ໄຊເສດຖາ ກໍສາມາດຍາດໄດ້ເອົາແຊັມ 2 ຮຸ່ນ ຖືເປັນວ່າຊຸດເຮັງໆຈາກໂຮງໝໍຫຼັກໄຊ. ນອກຈາກນັ້ນ ທາງໂຮງໝໍຫຼັກໄຊ ຍັງໄດ້ປະກອບສ່ວນຊ່ວຍເຫຼືອຜູ້ປະສົບໄພນໍ້າຖ້ວມທີ່ແຂວງຫຼວງນໍ້າທາ ທີ່ຜ່ານມາເປັນ ຜ້າຮົ່ມ, ນໍ້າດື່ມ, ມຸ້ງ, ໝອນ, ສາດ ແລະ ອື່ນໆ ລວມທັງຍັງອຸປະຖໍ້າຊ່ວຍເດັກນ້ອຍທາງ Spirit Academy ໄປຮ່ວມໃນການຈັດກິດຈະກໍາກ່ຽວກັບເດັກນ້ອຍໂຮງຮຽນພິການຫູ ແລະ ລາຍການອື່ນໆ.
“ ພິເສດພວກເຮົາຈະນໍາໃຊ້ຊຸດການສະໜັບສະໜູນຈາກ ໂຮງໝໍ ຫຼັກໄຊ ເຂົ້າຮ່ວມການແຂ່ງຂັນລາຍການທີ່ ສ. ເກົາຫຼີ ໃນຮຸ່ນອາຍຸບໍ່ເກີນ 12 ປີ ທ້າຍເດືອນພະຈິກ 2024 ເຊິ່ງພວກເຮົາໄດ້ຮັບເຊີນຈາກທາງເຈົ້າພາບ ແລະ ປັດຈຸບັນພວກເຮົາກໍກະກຽມຄວາມພ້ອມທຸກດ້ານ ແລະ ກໍານົດອອກເດີນທາງໃນວັນທີ 20 ພະຈິກ 2024 ເພື່ອເຂົ້າຮ່ວມລາຍການອັນຊົງກຽດນີ້. ນອກນັ້ນ ຫຼັງຈາກກັບມາພວກເຮົາຈະມີການຈັດການແຂ່ງຂັນບານເຕະເຍົາວະຊົນ ໃນທ້າຍປີ 2024 ເພື່ອລະດົມທຶນຊ່ວຍສູນຄົນພິການ ແລະ ສູນຟື້ນຟູຢາເສບຕິດ ” ທ່ານ ນາງ ມະນີຈັນ ແກ້ວລະຄອນ ຜູ້ບໍລິຫານຂອງສະໂມສອນ Spirit Academy ກ່າວ.
ຂ່າວ-ຮູບຈາກ: Larh Creators
