1 ພະຈິກ 2024 ນີ້ ຢູ່ເມືອງນາຊາຍທອງ ນະຄອນຫຼວງວຽງຈັນໄດ້ມີພິທີເປີດໂຄງການກໍ່ສ້າງຟາມລ້ຽງງົວຕົວແບບທີ່ທັນສະໄໝ ຂອງບໍລິສັດຮ່ວມທຶນກະສິກໍາຄົບວົງຈອນ ຈໍາກັດ ທີ່ຟາມງົວຕົວແບບໃນຂອບເຂດ ບ້ານຖໍ້າ ເມືອງ ນາຊາຍທອງ ນະຄອນຫຼວງວຽງຈັນ, ໂດຍການເຂົ້າຮ່ວມເປັນປະທານຂອງ ສະຫາຍ ພົນຈັດຕະວາ ວົງສັກ ສີພັນດອນ ຮອງຫົວໜ້າກົມໃຫຍ່ພະລາທິການກອງທັບ, ມີ ທ່ານ ນາງ ຄອນສະຫວັນ ແສງວິໄລ ອໍານວຍການ ບໍລິສັດຮ່ວມທືນກະສິກໍາຄົບວົງຈອນ ຈໍາກັດພ້ອມພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ຄອນສະຫວັນ ແສງວິໄລ ອໍານວຍການ ບໍລິສັດຮ່ວມທຶນກະສິກໍາຄົບວົງຈອນ ຈໍາກັດ ໄດ້ລາຍງານວ່າ: ບໍລິສັດມີທີ່ຕັ້ງສໍານັກງານຫ້ອງການໃຫຍ່ຕັ້ງຢູ່ ເຂດເສດຖະກິດພິເສດບຶງທາດຫຼວງ ເມືອງ ໄຊເສດຖາ ນະຄອງຫຼວງວຽງຈັນ ເຊິ່ງຟາມຕັ້ງຢູ່ເຂດ ບ້ານ ຖໍ້າ, ເມືອງນາຊາຍທອງ, ນະຄອນຫຼວງວຽງຈັນ, ຟາມລ້ຽງງົວຕົວແບບບ້ານ ຖໍ້າ ມີເນື້ອທີ່ 87 ເຮັກຕາ ຂຶ້ນກັບກົມຜະລິດ-ກະສິກຳ ກົມໃຫຍ່ພະລາທິການກອງທັບ ຮ່ວມກັບ ບໍລິສັດ ສາງຈ່ຽງ ການລົງທຶນລາວ ຈຳກັດຜູ້ດຽວ ຮ່ວມກັນສ້າງຕັ້ງເປັນ ບໍລິສັດຮ່ວມທຶນກະສິກຳຄົບວົງຈອນ ຈຳກັດ, ບົນພື້ນຖານ ການຕົກລົງເຫັນດີຂອງກະຊວງປ້ອງກັນປະເທດ.
ຈຸດປະສົງໃນການຮ່ວມດໍາເນີນທຸລະກິດກ່ຽວກັບການຜະລິດ ກະສິກຳໂດຍສະເພາະແມ່ນການລ້ຽງສັດໃຫຍ່ ເປັນຕົ້ນ ງົວ ແລະ ຄວາຍ ຈໍາຫນ່າຍໄປ ສປ ຈີນ ແລະ ສົ່ງເສີມການລ້ຽງພາຍໃນປະເທດ.
ບໍລິສັດໄດ້ສຸມໃສ່ການກະກຽມດ້ານສະບຽງອາຫານພື້ນຖານ ເຊັ່ນ: ກຽມພື້ນທີ່ປູກຫຍ້າ ໃຫ້ສາມາດຮອງຮັບ ການລ້ຽງງົວໂດຍສະເພາະໃນຟາມ ມີພື້ນທີ່ປູກຫຍ້າ 50 ເຮັກຕາ; ໂດຍກຳນົດເອົາຫຍ້າເນເປຍປາກຊ່ອງ 1 ແລະ ຫຍ້າຈຸນຊາວເປັນພື້ນຖານໃຫ້ແກ່ການຂະຫຍາຍທົ່ງຫຍ້າ; ນໍາງົວທອມເຂົ້າມາທົດລອງກ່ອນໃນຟາມ ນໍາໃຊ້ສ່ວນປະສົມອາຫານປະເພດຕ່າງໆຕາມສູດອາຫານ TMR ແລະ ເກັບກຳຂໍ້ມູນການເກືອ, ການເພີ່ມນໍ້າໜັກຂອງງົວທອມທີ່ເພີ່ມຂຶ້ນໃນແຕ່ລະເດືອນ.
ຈໍານວນງົວ ມີຂາຍອອກເປັນງົວຢືນຈໍານວນໜຶ່ງ ແລະ ນໍາໄປຂາຍເປັນຊີ້ນ ຈໍານວນໜຶ່ງ, ປັດຈຸບັນມີງົວ 282 ໂຕ, ເປັນງົວພໍ່ພັນ 4 ໂຕ, ແມ່ພັນ 113 ໂຕ, ງົວ ທອມ 92 ແລະ ງົວນ້ອຍ 50 ໂຕ.
ຈາກການກຽມຄວາມພ້ອມດ້ານຕ່າງໆປັດຈຸບັນ, ບໍລິສັດແມ່ນກຳໄດ້ທິດທາງການຕະຫລາດ, ການຄັດ ແລະ ເລືອກສາຍພັນງົວທີ່ໃຫ້ຜົນຕອບແທນດ້ານເສດຖະກິດ, ການກຳນົດສູດອາຫານ, ການຕິດຕາມສຸຂະພາບ ຫຼື ສະຫວັດດີການຂອງສັດ; ບໍລິສັດຈຶ່ງພ້ອມແລ້ວທີ່ຈະຜະລິດງົວຢ່າງຈິງຈັງ, ໂດຍອີງໃສ່ພື້ນທີ່ ແລະ ອາຫານສັດທີ່ມີ ພ້ອມມີແຜນການສົ່ງເສີມການເກັບຊື້ ຕາມແຜນການກະກຽມຄວາມພ້ອມການຜະລິດງົວຂອງບໍລິສັດ.
ຂອບໃຈຂ່າວຈາກ: ວິທະຍຸກອງທັບ
