ຄືດັ່ງທີ່ພວກເຮົາເຫັນມາຢ່າງຕໍ່ເນື່ອງ ທຸກຄັ້ງທີ່ເກີດໄພພິບັດກໍ່ຈະມີການສູນເສຍຕາມມາ ພື້ນຖານໂຄງລ່າງບໍ່ວ່າຈະເປັນຖະໜົນຫົນທາງ, ໄຟຟ້ານ້ຳປະປາ ກໍ່ລ້ວນແຕ່ໄດ້ຮັບຜົນກະທົບ ໝາຍເຖິງຕ້ອງຈົກເງິນ ເພື່ອປົວແປງຟື້ນຟູບາງບ່ອນເສຍເງິນຫຼາຍກວ່າລົງທຶນໃໝ່ດ້ວຍຊ້ຳໄປ.
ອີງຕາມຂ່າວຈາກແຂວງຫົວພັນລາຍລານ ໃນກາງເດືອນສິງຫາ – ທ້າຍເດືອນ ກັນຍາ 2024 ນີ້ ໄດ້ມີຝົນຕົກໜັກຕິດຕໍ່ກັນຫຼາຍວັນ ເຊີ່ງໄດ້ເຮັດໃຫ້ບັນດາເສັ້ນທາງຄົມມະນາຄົມພາຍໃນແຂວງຫົວພັນຖືກຜົນກະທົບຈາກໄພພິບັດທໍາມະຊາດ ໂດຍສະເພາະແມ່ນ 9 ເມືອງຂອງແຂວງ ຄື: ເມືອງຊໍາເໜືອ, ເມືອງຮ້ຽມ, ເມືອງຊ່ອນ,ເມືອງຫົວເມືອງ, ເມືອງຊໍາໃຕ້, ເມືອງກວັນ, ເມືອງສົບເບົາ, ເມືອງແອດ ແລະ ເມືອງວຽງໄຊ ເຮັດໃຫ້ບາງເສັ້ນທາງເປ່ເພ ແລະ ຖືກຕັດຂາດ ເປັນຕົ້ນແມ່ນ ດິນຫຍຸບ, ດິນເຊາະເຈື່ອນ, ຕົ້ນໄມ້ຫັກທັບຖົມເສັ້ນທາງ, ເສັ້ນທາງທີ່ຖືກຜົນກະທົບທັງໝົດ 34 ເສັ້ນ, ມີ 1 ພັນ 9 ຮ້ອຍກວ່າກິໂລແມັດ.
ໃນນີ້ ເສັ້ນທາງຫຼວງຂອງແຂວງ 9 ເສັ້ນເສຍຫາຍ 576 ກິໂລແມັດ, ທາງຫຼວງເມືອງ 10 ເສັ້ນ 538 ກິໂລແມັດ, ເສັ້ນທາງຊົນນະບົດ 5 ເສັ້ນ 227 ກິໂລແມັດ, ເສັ້ນທາງຕົວເມືອງ 1 ເສັ້ນ 60 ກວ່າກິໂລແມັດ, ນອກຈານີ້ຍັງມີຂົວອູ່ 3 ຈຸດ ແລະ ລະບົບນໍ້າປະປາເມືອງຊ່ອນ ເປ່ເພ ເຊິ່ງມີຜົນເສຍຫາຍທັງໝົດ 53 ຕື້ 9 ຮ້ອຍລ້ານກວ່າກີບ , ມາຮອດປະຈຸບັນນີ້ພາກສ່ວນທີ່ກ່ຽວຂ້ອງຂັ້ນແຂວງສົມທົບກັບພາກສ່ວນທີ່ກ່ຽວຂ້ອງຂັ້ນເມືອງໄດ້ເອົາໃຈໃສ່ເລັ່ງແກ້ໄຂສຸກເສີນແຕ່ລະເສັ້ນທາງສໍາເລັດແລ້ວຈໍນວນໜື່ງ ເພື່ອເຮັດໃຫ້ການສັນຈອນໄປມາແຕ່ລະເສັ້ນທາງໃຫ້ມີຄວາມສະດວກ.
ຂ່າວ: ແຂວງຫົວພັນ
