ສຳນັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ສຈນກ), ກະຊວງອຸດສາຫະກຳ ແລະ ການຄ້າ(ອຄ) ຈັດກອງປະຊຸມຮ່ວມກັບ ອົງການຜະລິດຕພາບແຫ່ງອາຊີ Asian ໃນຫົວຂໍ້: ຊຸມຊົນໄດ້ຮັບຜົນປະໂຫຍດຈາກການເພີ່ມຜະລິດຕະພາບ “Conference on Productivity Gainsharing for Rural Development” ຂຶ້ນຢູ່ທີ່ໂຮງແຮມລາວພລາຊາ, ນະຄອນຫຼວງວຽງຈັນ ເປັນປະທານ ຂອງ ທ່ານ ມະໄລທອງ ກົມມະສິດ, ລັດຖະມົນຕີກະ ຊວງ ອຄ, ມີຜູ້ເຂົ້າຮ່ວມທັງໝົດ ຈຳນວນ 130 ທ່ານ ຈາກ 18 ປະເທດປະເທດສະມາຊິກ APO ລວມທັງ ສປປ ລາວ.
ຈຸດປະສົງຂອງການຈັດກອງປະຊຸມດັ່ງກ່າວ ແມ່ນເພື່ອສ້າງຄວາມເຂົ້າໃຈໃຫ້ເລີກເຊີ່ງ ກ່ຽວກັບການແບ່ງປັນຜົນປະໂຫຍດ ຈາກການເພີ່ມຜະລິດຕະພາບທີ່ມີປະສິດທິຜົນ, ຄົ້ນຄ້ວາວິທີການແບ່ງປັນຜົນປະໂຫຍດເພື່ອການພັດທະນາຊຸມຊົນ. ພ້ອມນີ້ ກໍເພື່ອຖອດຖອນບົດຮຽນຈາກບັນດາປະເທດສະມາຊິກ APO ດ້ວຍກັນ ໃນການຈັດຕັ້ງປະຕິບັດ ວຽກງານຜະລິດຕະພາບທີ່ໄດ້ຮັບຜົນສຳເລັດສູງ ແນ່ໃສ່ນຳເອົາຜົນໄດ້ຮັບຈາກກອງປະຊຸມຄັ້ງນີ້ ໄປນຳໃຊ້ເຂົ້າໃນ ວຽກງານ ພັດທະນາຊົນນະບົດແບບຢືນຍົງ ແລະ ກວ້າງຂວາງ.
ໃນກອງປະຊຸມ ມີບັນດາຜູ້ຊ່ຽວຊານຈາກປະເທດສະມາຊິກ APO ຜູ້ທີ່ມີຄວາມຮູ້ກ່ຽວກັບນະໂຍບາຍ ແລະ ມີປະສົບການໃນການຈັດຕັ້ງປະຕິບັດຕົວຈິງ ກ່ຽວວຽກງານການຊຸກຍູ້ສົ່ງເສີມການເພີ່ມຜະລິດຕະພາບຢູ່ຊຸມຊົນ ໂດຍໄດ້ລົງເລີກປຶກສາຫາລື, ແລກປ່ຽນຄວາມຄິດເຫັນ, ແລກປ່ຽນປະສົບກ່ຽວກັບ ການນໍາໃຊ້ຮູບແບບແນວຄວາມຄິດທີ່ທັນສະໄໝ ແລະ ວີທີການແບ່ງປັນຜົນໄດ້ຮັບຈາກການເພີ່ມຜະລິດຕະພາບທີ່ສາມາດນໍາໃຊ້ເຂົ້າໃນການພັດທະນາຊົນນະບົດ ແລະ ໄດ້ຮຽນຮູ້ວິທີການສົ່ງເສີມວຽກງານເພີ່ມຜະລິດຕະພາບໃຫ້ແທດເໝາະກັບສະພາບການຕົວຈິງຂອງພວກເຂົາໃນປະຈຸບັນ ແລະ ອານາຄົດ.
ທ່ານ ມະໄລທອງ ກົມມະສິດ, ລັດຖະມົນຕີກະ ຊວງ ອຄ ກ່າວເປີດກອງປະຊຸມ ສະແດງຄວາມຕ້ອງຮັບ ແລະ ໄດ້ເນັ້ນໃຫ້ເຫັນເຖິງຄວາມສຳຄັນຂອງການຈັດຕັ້ງປະຕິບັດວຽກງານຜະລິດຕະພາບຢູ່ ສປປ ລາວ ເຊິ່ງລັດຖະບານໄດ້ຖືເປັນວຽກໜຶ່ງທີ່ສຳຄັນ ເຊິ່ງໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX (2021-2025) ຂອງ ສປປ ລາວ ໄດ້ກຳນົດແຈ້ງກ່ຽວກັບວຽກງານການເພີ່ມຜະລິດຕະພາບ, ເຕັກໂນໂລຊີ ແລະ ນະວັດຕະກຳ ເພື່ອຍົກລະດັບປະສິດຕິພາບການຜະລິດ ແລະ ເຮັດໃຫ້ມີສິນຄ້າທີ່ມີຄຸນນະພາບສູງຂຶ້ນ
ໃນເດືອນ ເມສາ 2024 ນີ້ ລັດຖະບານ ສປປ ລາວ ໄດ້ຮັບຮອງເອົາ ແຜນແມ່ບົດຜະລິດຕະພາບແຫ່ງຊາດ ເຖິງ ປີ 2030 ແລະ ປະຈຸບັນກຳລັງກະ ກຽມຈັດຕັ້ງຜັນຂະຫຍາຍ.
ກອງປະຊຸມໃນຄັ້ງນີ້ ຖືເປັນກິດຈະກຳໜຶ່ງທີ່ສຳຄັນ ໃນການຈັດຕັ້ງຜັນຂະຫຍາຍ ແຜນແມ່ບົດຜະລິດຕະພາບແຫ່ງ ຊາດ ເພື່ອໃຫ້ໄດ້ຮັບຜົນປະໂຫຍດສູງສຸດຈາກການເພີ່ມຜະລິດຕະພາບ, ສ້າງຄວາມສາມາດໃນການແຂ່ງຂັນຂອງສິນຄ້າລາວ ໃຫ້ສາມາດສົ່ງອອກສູ່ຕະຫຼາດ ພາກພື້ນ ແລະ ສາກົນ ພ້ອມທັງຍົກລະດັບຜະລິດຕະພາບແຮງງານໃຫ້ໃກ້ຄຽງ ແລະ ໄລ່ທັນບັນດາປະເທດອາຊຽນ ແລະ ປະເທດສະມາຊິກ APO ໃນຕໍ່ໜ້າ.
