ເປີດຮັບສະໝັກຢ່າງເປັນທາງການສໍາລັບເວທີ ນາງສາວລາວ ປະຈຳປີ 2024 ( Miss Laos 2024 ) ເວທີປະກວດແຫ່ງກຽດຕິຍົດ ແລະ ຄວາມພາກພູມໃຈຂອງ ແມ່ຍິງລາວ, ຊະນະເລີດໄດ້ຮັບເງິນລາງວັນໄປເຖິງ 200 ກວ່າລ້ານກີບ ເລິີ່ມເປີດໃຫ້ສາວໆສະໝັກຕັ້ງແຕ່ມື້ນີ້ ໄປຈົນເຖິງວັນທີ 1 ພະຈິກ 2024.
ທ່ານ ປັນຍາ ເພັງວິໃນຍາ, ປະທານໂຄງການປະກວດ ນາງສາວລາວ ແລະ ປະທານ ບໍລິສັດ ຄົມປັນຍາ ເອັນເຕີເທນເມັນ ອີເວັ້ນແອນ ອໍແກໄນເຊີ ຈໍາກັດ ໄດ້ກ່າວໃນພິທີຖະແຫຼ່ງຂ່າວ ເມື່ອທ້າຍອາທິດທີ່ຜ່ານມາວ່າ: ຈຸດປະສົງໃນການຈັດໂຄງການປະກວດໃນປີນີ້ ເພື່ອສືບຕໍ່ການເປັນເວທີທີ່ແນໃສ່ ການສົ່ງເສີມດ້ານວັດທະນະທໍາ, ຮີດຄອງປະເພນີ ແລະ ການນຸ່ງຖື ຂອງແມ່ຍິງລາວ ອັນເປັນເອກະລັກຂອງລາວ ໃຫ້ຢູ່ຄູ່ກັບຄົນລາວຕະຫຼອດໄປ ແລະ ຍັງເປັນເວທີ ທີ່ເປີດໂອກາດໃຫ້ແມ່ຍິງລາວ ໄດ້ສະແດງຄວາມສາມາດ, ກ້າຄິດກ້າສະແດງອອກ ບົນພື້ນຖານຂອງແມ່ຍິງລາວສະໄໝໃໝ່ ລວມທັງເປັນເວທີ ທີ່ສະໜັບສະໜູນ ຄົນລາວໃນທຸກໆດ້ານ ບໍ່ວ່າຈະເປັນດ້ານເສດຖະກິດ, ດ້ານວັດທະນະທໍາ, ດ້ານສັງຄົມ, ດ້ານການສຶກສາ, ດ້ານກະສິກຳ, ດ້ານສາທາລະນະສຸກ, ດ້ານທ່ອງທ່ຽວ ແລະ ໃນດ້ານອື່ນໆ.
ໃນປີນີ້ ຍັງເປັນວາລະສໍາຄັນທີ່ໂຄງການປະກວດໄດ້ສືບຕໍ່ ແນວຄວາມຄິດ “ ຕຳນານແຫ່ງຄວາມງາມຂອງແມ່ຍິງລາວ ” ເໝືອນດັ່ງ “ ລາຍນາກ ” ໂດຍການໃຊ້ລາຍນາກລາວທີ່ໄດ້ຮັບການຍ້ອງຍໍຂຶ້ນເປັນມໍລະດົກທາງວັດທະນະທຳ ເຂົ້າມາໃຊ້ໃນການອອກແບບເຄື່ອງນຸ່ງຖື, ຮູບແບບການສະແດງຕ່າງໆຂອງການປະກວດ ເພື່ອປຽບເໝືອນການສື່ເຖິງຄວາມງາມຂອງແມ່ຍິງລາວທີ່ເປັນເອກະລັກສະເພາະ ທີ່ຢູ່ຄຽງຂ້າງກັບທໍານຽນປະເພນີລາວມາແຕ່ດົນນານ ພິເສດ ໃນໄລຍະທີ່ຜ່ານມາທາງກອງປະກວດ ໄດ້ເຂົ້າເປັນສ່ວນໜຶ່ງເປັນໃນການເປັນສູນກາງຊ່ວຍເຫຼືອສັງຄົມທີ່ຜ່ານມາບໍ່ວ່າຈະເປັນ ເຫດໄພພິບັດນໍ້າຖ້ວມ ທີ່ແຂວງຫຼວງນໍ້າທາ ແລະ ໂຄງການຊ່ວຍເຫຼືອອື່ນໆອີກດ້ວຍ ”.
ສຳລັບ ແມ່ຍິງລາວທ່ານໃດສົນໃຈ ສາມາດສະໝັກໄດ້ເລີຍຕັ້ງແຕ່ມື້ນີ້ ຈົນເຖິງ 01 ພະຈິກ 2024 ໂດຍທາງຝ່າຍຈັດເວທີປະກວດຈະຄັດເອົາ 40 ນາງສາວ ທີ່ຜ່ານເຂົ້າຮອບຄັດເລືອກຮອບທໍາອິດ ແລະ ເປີດຕົວໃນວັນທີ 22 ພະຈິກ 2024 ເພື່ອເຂົ້າຮ່ວມກອງປະກວດ ແລະ ເກັບຕົວທັງນະຄອນຫຼວງວຽງຈັນ ແລະ ປາກເຊ ຈົນຮອດຮອບຕັດສິນໃນວັນທີ 6 ທັນວາ 2024.
ພິເສດເງິນລາງວັນປີນີ້ຂອງເວທີ ນາງສາວລາວ 2024 ມູນຄ່າລວມເຖິງ 700.000.000 ກີບ ໂດຍສະເພາະ ຊະນະເລີດ ນາງສາວລາວ ປະຈໍາປີ 2024 ໄດ້ຮັບມົງກຸດອັງຊົງກຽດ ພ້ອມເງິນລາງວັນ 220.000.000 ກີບ, ຮອງຊະນະເລີດອັນດັບ 1 ໄດ້ຮັບເງິນລາງວັນ 100.000.000 ກີບ ແລະ ຮອງຊະນະເລີດອັນດັບ 2, 3, 4 ໄດ້ຮັບລາງວັນລະ 50.000.000 ກີບ.
ຂ່າວ: Larh Creators ; ຮູບ: ເມລີ ດວງປິຊາວົງ + MISS LAOS ນາງສາວລາວ
