W.I.G NAGA LAOS ສະໂມສອນບານເຕະເຍົາວະຊົນລາວ ພ້ອມຈໍານວນ 12 ນ້ອງ ພ້ອມດ້ວຍຄະນະນໍາ ໄດ້ອອກເດີນທາງດ້ວຍສາຍການບິນສາກົນ ວັດໄຕ ໃນຕອນເຊົ້າຂອງວັນທີ 1 ຕຸລາ 2024 ເພື່ອເຂົ້າຮ່ວມການແຂ່ງຂັນບານເຕະລາຍການ The Flying Sports Elite ທີ່ ສປ ຈີນ ລະຫວ່າງວັນທີ 1-7 ຕຸລາ 2024 ທີ່ ສປ ຈີນ.
ທ່ານ ວຽງໄຊ ວິໄລກຸນ ປະທານສະໂມສອນ W.I.G NAGA LAOS ລາຍງານວ່າ: ທັບນັກກີລາ W.I.G NAGA LAOS ໄດ້ຖືກເຊີນໃຫ້ເຂົ້າຮ່ວມແຂ່ງຂັນບານເຕະເຍົາວະຊົນລາຍການ The Flying Sports Elite ທີ່ ສປ ຈີນ ໃນລະຫວ່າງວັນທີ 01/10/2024 ຫາ 07/10/2024 ເຊີ່ງການແຂ່ງຂັນຄັ້ງນີ້ແມ່ນມີ ຄວາມສໍາຄັນຫຼາຍ ໃນປະຫວັດສາດລາວທີ່ນັກກິລາ U10 ຂອງລາວທີ່ຖືກເຊີນເຂົ້າຮ່ວມການແຂ່ງຂັນໃນຄັ້ງນີ້ ໂດຍຕອນເຊົ້າມື້ນີ້ວັນທີ 10 ຕຸລາ 2024 ໄດ້ອອກທາງການຢ່າງເປັນທາງການ.
“ ສໍາລັບ ຄູຝຶກ ແລະ ນັກກິລາທຸກ ຄົນຈຶ່ງໄດ້ທຸ້ມເທທຸກຄວາມສາມາດເຂົ້າໃນການຝຶກຊ້ອມ ປະຈຸບັນນີ້ແມ່ນເຫັນໄດ້ວ່ານັກກິລາທີ່ຈະເດີນທາງໄປ ຮ່ວມການແຂ່ງຂັນໃນຄັ້ງນີ້ແມ່ນໄດ້ມີການພັດທະນາຂຶ້ນຫຼາຍກວ່າເກົ່າ ເຊິ່ງໃນການຝຶກຊ້ອມທີ່ຜ່ານມາທາງ ສະໂມສອນ W.L.G NAGA LAOS ເອງກະຂໍຂອບໃຈນໍາອົງການຈັດຕັ້ງພັກລັດ, ການນໍາ, ບໍລິສັດຕ່າງໆ, ພໍ່ ແມ່ປະຊາຊົນ ທີ່ສະໜັບສະໜູນ ແລະ ເຝົ້າຕິດຕາມການພັດທະນາຂອງນັກກິລາຢ່າງໃກ້ຊິດ ປະຈຸບັນນີ້ທາງ ສະໂມສອນ ຄູຝຶກ ແລະ ນັກກິລາແມ່ນມີຄວາມພ້ອມເຕັມທີ່ໃນການໄປຮ່ວມການແຂ່ງຂັນ ໂດຍທີ່ທຸກຄົນ ແມ່ນໄດ້ຕັ້ງເປົ້າ ໝາຍໃນການແຂ່ງຂັນໃນຄັ້ງນີ້ເພື່ອຍາດເອົາແຊັມມາເປັນຂອງຂວັນໃຫ້ແກ່ ປະເທດຊາດ ” ປະທານສະໂມສອນ W.I.G NAGA LAOS ກ່າວ.
ສໍາລັບ W.I.G NAGA LAOS ເປັນສະໂມສອນບານເຕະເຍົາວະຊົນລາວ ທີ່ຜົນງານໂດດເດັ່ນ ເຂົ້າຮ່ວມແຂ່ງຂັນລາຍການໃດກໍເກືອບວ່າໄດ້ແຊັມທຸກລາຍການ ໂດຍສະເພາະໃນທ້າຍປີ 2023 ສ້າງປະຫວັດສາດຄວ້າແຊັມລາຍການ TAR ຮອບຄັດເລືອກໃນຮຸ່ນອາຍຸບໍ່ເກີນ 10 ປີ ທີ່ປະເທດໄທ ເຮັດໃຫ້ໄດ້ສິດໄປແຂ່ງຂັນຮອບສຸດທ້າຍທີ່ປະເທດແອັດສະປາຍ ສາມາດຍາດໄດ້ອັນດັບ 22 ຈາກ 50 ສະໂມສອນທົ່ວໂລກເຂົ້າຮ່ວມຊີງໄຊ.
