ທີມຊາດລາວ ຮຸ່ນອາຍຸບໍ່ເກີນ 20 ປີ ລົງສະໜາມແຂ່ງຂັນຄົບ 3 ນັດຊະນະ 1 ແລະ ເສຍ 2 ນັດ ຂອງກຸ່ມ G ທີ່ ສປປ ລາວ ເປັນເຈົ້າພາບ ບໍ່ໄດ້ໄປຕໍ່ໃນການແຂ່ງຂັນບານເຕະ ຊີງແຊັມອາຊີ U20 ຮອບຄັດເລືອກ 2025 ( AFC U20 ASIAN CUP 2025 Qualifiers ).
ສປປ ລາວ ໄດ້ຮັບກຽດເປັນເຈົ້າພາບກຸ່ມ G ປະກອບມີ : ອີຣານ, ມົງໂກລີ, ອິນເດຍ ແລະ ສປປ ລາວ ( ເຈົ້າພາບ ) ໂດຍຜົນງານຂອງ ຢູ 20 ລາວ ລົງສະໜາມນັດທໍາອິດເສຍໃຫ້ກັບ ອີຣານ 0-8, ນັດທີ 2 ຊະນະ ມົງໂກລີ 6-0 ແລະ ນັດທີ 3 ເສຍໃຫ້ ອິນເດຍ 0-2 ມີ 3 ຄະແນນຢູ່ອັນດັບທີ 3 ຂອງຕາຕະລາງຕົກຮອບໄປ, ສ່ວນ ອີຣານ ມີ 9 ຄະແນນເປັນຕົວແທນ 1 ດຽວຈາກກຸ່ມ H ທີ່ຜ່ານເຂົ້າຮອບສຸດທ້າຍໄດ້ສໍາເລັດ ຂະນະທີ່ ອິນເດຍ ມີ 6 ຄະແນນ ແຕ່ບໍ່ດີພໍທີ່ຈະຕິດອັນດັບ 2 ດີທີ່ສຸດເນື່ອງຈາກມີຜົນປະຕູໄດ້ເສຍ +5 ແຕ່ທີມອັນດັບ 2 ທີ່ດີທີ່ສຸດທີມທີ 5 ເປັນ ຈໍແດນ ມີ 6 ຄະແນນກັບຜົນປະຕູໄດ້ເສຍເຖິງ +8.
ສໍາລັບ ລາຍການນີ້ຈະຄັດເອົາອັນດັບທີ 1 ຂອງແຕ່ລະກຸ່ມ A-J ຜ່ານເຂົ້າຮອບສຸດທ້າຍໄປ, ສ່ວນອັນດັບທີ 2 ຂອງກຸ່ມຈະເອົາພຽງ 5 ທີມທີ່ດີທີ່ສຸດ ເຊິ່ງປັດຈຸບັນໄດ້ທີມຜ່ານເຂົ້າຮອບສຸດທ້າຍ 16 ທີມດັ່ງນີ້:
1. ສປ ຈີນ ເຈົ້າພາບ
2. ຊີເຣຍ ແຊັມກຸ່ມ A ຈາກຮອບຄັດເລືອກ
3.ອຸດສະເບກິດສະຖານ ແຊັມກຸ່ມ B ຈາກຮອບຄັດເລືອກ
4. ສ ເກົາຫຼີ ແຊັມກຸ່ມ C ຈາກຮອບຄັດເລືອກ
5. ອາຣັບບີ ຊາອຸດິດ ແຊັມກຸ່ມ D ຈາກຮອບຄັດເລືອກ
6. ສປປ ເກົາຫຼີ ແຊັມກຸ່ມ E ຈາກຮອບຄັດເລືອກ
7.ອິນໂດເນເຊຍ ແຊັມກຸ່ມ F ຈາກຮອບຄັດເລືອກ
8.ອີຣານ ແຊັມກຸ່ມ G ຈາກຮອບຄັດເລືອກ
9. ອີຣັກ ແຊັມກຸ່ມ H ຈາກຮອບຄັດເລືອກ
10. ຍີ່ປຸ່ນ ແຊັມກຸ່ມ I ຈາກຮອບຄັດເລືອກ
11. ກາຕ້າ ແຊັມກຸ່ມ J ຈາກຮອບຄັດເລືອກ
12. ເຢເມນ ທີມອັນດັບ 2 ທີ່ດີທີ່ສຸດ ຈາກຮອບຄັດເລືອກ
13. ກຽກກິດສະຖານ ທີມອັນດັບ 2 ທີ່ດີທີ່ສຸດທີມທີ 2 ຈາກຮອບຄັດເລືອກ
14. ອົດສະຕຣາລີ ທີມອັນດັບ 2 ທີ່ດີທີ່ສຸດທີມທີ 3 ຈາກຮອບຄັດເລືອກ
15. ໄທ ທີມອັນດັບ 2 ທີ່ດີທີ່ສຸດທີມທີ 4 ຈາກຮອບຄັດເລືອກ
16. ຈໍແດນ ທີມອັນດັບ 2 ທີ່ດີທີ່ສຸດທີມທີ 5 ຈາກຮອບຄັດເລືອກ
ຂ່າວ-ຮູບ: Larh Creators
