ອາທິດແລ້ວນີ້ ຢູ່ແຂວງສະຫວັນນະເຂດ ບັນດານັກທຸລະກິດ ແລະ ຜູ້ປະກອບການຕ່າງໆພາຍໃນແຂວງ ທີ່ມີຄວາມສົນໃຈ ໄດ້ເຂົ້າຮ່ວມໃນກອງປະຊຸມສຳມະນາກ່ຽວກັບການປູກໝາກຖົ່ວລຽນເປັນສິນຄ້າ ໂດຍການເປັນປະທານຮ່ວມ ຂອງທ່ານ ດຣ ສຸພັນ ແກ້ວມີໄຊ ອະດີດ ເຈົ້າແຂວງສະຫວັນນະເຂດສະໄໝທີ VIII ແລະທ່ານ ສຸບິນ ຫຼວງດ້ວງ ຮັກສາການ ຫົວໜ້າພະແນກກະສິກຳ ແລະ ປ່າໄມ້ແຂວງ.
ພາຍຫຼັງຄະນະປະທານ ກ່າວມີຄຳເຫັນໂອ້ລົມ ແລະ ເປີດກອງປະຊຸມຢ່າງເປັນທາງ ການແລ້ວ, ຊ່ຽວຊານດ້ານ ການປູກຖົ່ວລຽນກໍ່ໄດ້ຂຶ້ນນຳ ສະເໜີໃຫ້ຄວາມເຂົ້າໃຈກ່ຽວກັບໝາກຖົ່ວລຽນ ແລະການ ປູກໝາກຖົ່ວລຽນເປັນສິນຄ້າ ຕໍ່ຈາກນັ້ນ, ກໍ່ໄດ້ມີການນຳສະ ເໜີກ່ຽວກັບການລົງທຶນປູກ ໝາກຖົ່ວລຽນ, ການເຂົ້າເຖິງ ແຫຼ່ງທຶນ ແລະການເຂົ້າເຖິງຕະ ຫຼາດ ເພື່ອສ້າງຄວາມຮັບຮູ້ ແລະເຂົ້າໃຈເລິກເຊິ່ງຕໍ່ກັບການ ປູກໝາກຖົ່ວລຽນເປັນສິນຄ້າຢູ່ ແຂວງສະຫວັນນະເຂດ ເຊິ່ງຈະ ເປັນອີກທ່າແຮງ ສຳຄັນໜຶ່ງ ເຮັດໃຫ້ຂະບວນການຜະລິດ ກະສິກຳເປັນສິນຄ້າພາຍໃນ ແຂວງມີການຂະຫຍາຍຕົວ ແລະກາຍເປັນຜະລິດຕະພັນໃໝ່ ຂອງແຂວງສະຫວັນນະເຂດ ໃນຕໍ່ໜ້າ.
ໝາກຖົ່ວລຽນ ເປັນໝາກໄມ້ຊະນິດໜຶ່ງທີ່ຄົນນິຍົມ ຊົມຊອບ ແລະມີລາຄາສູງສົມຄວນ ເຊິ່ງໄລຍະຜ່ານມາ, ໝາກ ໄມ້ຊະນິດດັ່ງກ່າວແມ່ນໄດ້ ມີການນຳເຂົ້າຈາກພາຍໃນ ແລະຕ່າງປະເທດ, ແຕ່ຖ້າຫາກວ່າ ມີການປູກໝາກຖົ່ວລຽນຢູ່ ພາຍໃນແຂວງຫຼາຍຂຶ້ນກໍ່່ຈະຊ່ວຍຫຼຸດຜ່ອນການນຳ ເຂົ້າໝາກໄມ້ຊະນິດນີ້ ທັງເປັນການເສີມສ້າງລາຍຮັບໃຫ້ປະຊາຊົນທ້ອງຖິ່ນກໍ່ຄືຜູ້ລົງທຶນປູກໝາກຖົ່ວລຽນອີກດ້ວຍ.
ໂອກາດນີ້, ພາຍຫຼັງທີ່ສຳເລັດກອງປະຊຸມສຳມະນາ, ບັນດາທ່ານທີ່ເຂົ້າຮ່ວມຍັງໄດ້ ເດີນທາງໄປເບິ່ງສວນໝາກຖົ່ວລຽນຂອງທ່ານ ສຸພັນ ແກ້ວມີໄຊ ທີ່ບ້ານໂພນສິມ ແລະ ສວນປູກໝາກຖົ່ວລຽນຂອງ ທ່ານ ສົມຈິດ ທີ່ບ້ານສົມສະອາດ ນະຄອນໄກສອນພົມວິຫານນຳອີກ.
