ວາງຮາງໄຂ່ໄວ້ບ່ອນສອກຫຼີກ, ມືດເລັກນ້ອຍ ແລະ ຮອງດ້ວຍຂີ້ຕອກ, ເຟືອງ ຫຼື ຫຍ້າແຫ້ງອື່ນໆ, ໃຫ້ເປັດແມ່ຟັກໄຂ່ 15 ໜ່ວຍຕໍ່ຮັງ. ເປັດເທບໃຊ້ ເວລາຟັກ 25 ວັນ, ເປັດກາບໃຊ້ເວລາຟັກ 25-30 ວັນ, ເປັດຄວນໄດ້ຫຼິ້ນນໍ້າໃນເວລາຟັກໄຂ່, ເມື່ອແມ່ເປັດຟັກໄຂ່ແຕກແລ້ວໃຫ້ນໍາເອົາຮອກໄຂ່ໄປຕາກແດດຢ່າງໜ້ອຍ 3 ແດດສ່ວນວັດສະດຸຮອງພື້ນໃຫ້ນໍາໄປຈູດຖິ້ມ, ປະສົມຢາວິຕາມິນ (ໄວຕາເອນ) ແລະ ຂໍເຕຕຣາຊິລີນ ຫຼື ຊັ້ນຟາມິດໃຫ້ເປັດນ້ອຍໄດ້ກິນຕະຫຼອດໄລຍະ 15 ວັນທຳອິດ.
■ໃຫ້ຫົວອາຫານໄລຍະ 21-30 ວັນ ຖ້າບໍ່ມີໃຫ້ໃຊ້ຂີ້ກະເດືອນ, ປາແກ້ວ, ຫອຍ (ໜຶ່ງ)ກອຍປະສົມກັບຮໍາ ແລະ ເຂົ້າປຽນຖ້າຢາກເກັບໄວ້ດົນໃຫ້ໜຶ້ງ ແລະ ຕາກແດດໃຫ້ແຫ້ງ ດີ, ເກັບໄວ້ບ່ອນທີ່ແຫ້ງສາມາດເກັບໄວ້ໄດ້ເຖິງ 6 ເດືອນ ສ່ວນເປືອກຫອຍແມ່ນທຸບໃຫ້ມຸ່ນໆກ່ອນ ແລະ ໃຫ້ກິນຈົນເປັດອາຍຸໄດ້ 3 ເດືອນ.
■ຂໍ້ຄວນລະວັງ: ໃຫ້ເປັດນ້ອຍໄດ້ຮັບຄວາມອົບອຸ່ນຢ່າງພຽງພໍໃນໄລຍະ 10-15 ວັນຫ້າມບໍ່ໃຫ້ເປັດນ້ອຍຫຼິ້ນນໍ້າຫຼາຍຈະເຮັດໃຫ້ເປັດເປັນປອດບວມ.
■ເຮັດແນວໃດຈຶ່ງຈະລ້ຽງເປັດໃຫ້ເປັນສິນຄ້າໄດ້ ?
ຄອກເປັດຕ້ອງເຮັດເປັນລ໋ອກ, ລ໋ອກລະ 10 ໂຕ ແລະ ບໍ່ໃຫ້ເປັດເຄື່ອນເໜັງຫຼາຍເພາະຈະເປັນການສິ້ນເປືອງພະລັງງານເປັດຈະກິນຫຼາຍ ແລະ ນານໃຫຍ່.
- ວິທີການລ້ຽງ.
ເປັດ 1-3 ອາທິດໃຫ້ເກືອຫົວອາຫານສົດ, ເປັດ 4-5 ອາທິດ ໃຫ້ເກືອຫົວອາຫານປົນຮໍາ ດ້ວຍອັດຕາຮໍາ 1 ຖ້ວຍ, ຫົວອາຫານ 2 ຖ້ວຍ, ເປັດ 6-7 ອາທິດ ໃຫ້ເກືອຫົວອາຫານປົນຮໍາເຄິ່ງຕໍ່ເຄິ່ງ, ອາທິດທີ 8 ໃຫ້ເກືອຫົວອາຫານສົດ ແລະ ຂາຍອອກໝົດຄອກເລີຍ.
- ການນໍາໃຊ້ຫົວອາຫານ: ໃຫ້ຫົວອາຫານໝູລາຄາຖືກກວ່າ ແລະ ເປັດຈະໃຫຍ່ໄວ, ຖ້າໃຊ້ຫົວອາຫານລາວກໍ່ໃຫ້ໃຊ້ແຕ່ຫົວອາຫານລາວຕະຫຼອດ ຖ້າເກືອສັບກັນ ກັບ ຫົວອາຫານໄທເປັດຈະນານໃຫຍ່ ແລະ ມັກຕີກັນ, ຫົວອາຫານໄທ 1 ເປົາ (ເບີ 441) ຕໍ່ເປັດ 10 ໂຕ ສາມາດກຸ້ມໄດ້ 8 ອາທິດ, ໃຫ້ອາຫານເປັນປະຈຳ ບໍ່ໃຫ້ປົນນໍ້າ ແລະ ປ່ຽນນໍ້າເລື້ອຍໆເປັດຈະໄດ້ກິນນໍ້າສະອາດ ແລະ ໃຫຍ່ໄວ.
■ການນໍາໃຊ້ນໍ້າສະກັດຊີວະພາບຈາກຢາພື້ນເມືອງ.
- ຊອຍຜັກຊະນິດຕ່າງໆໃຫ້ມຸ່ນໃນຂະໜາດເທົ່າກັນຖ້າເປັນຜັກຂະ, ເຄືອເຂົາຮໍ, ໃບກະເດົາ, ໃບຂີ້ເຫຼັກ ແລະ ໃບກະຖິນຍິ່ງດີ.
- ຜັກ ຫຼື ສະໝຸນໄພຕ່າງໆ 3 ກິໂລ ປະສົມກັບກາກນໍ້າຕານ ຫຼື ນໍ້າອ້ອຍ 1 ລິດແລ້ວໝັກໄວ້ໃນຖັງທີ່ມີຝາປິດເປັນຢ່າງດີໝັກໄວ້ຢ່າງໜ້ອຍ 7 ມື້ (ຫຼາຍກວ່ານີ້ຍິ່ງດີ) ແລ້ວຕ້ອງເອົານໍ້າຫົວເຊື້ອ.
- ກາກນ້ຳຕານ ຫຼື ນ້ຳອ້ອຍ 1 ລິດ ປະສົມກັບນໍ້າ 10 ລິດ ແລະ ນໍ້າຫົວເຊື້ອດັ່ງກ່າວ 1 ລິດ ໃສ່ຖັງປິດຝາໄວ້ໃຫ້ແຈບດີ ແລະ ປະໄວ້ຢ່າງໜ້ອຍ 3 ມື້ (ຫຼາຍກວ່ານີ້ຍິ່ງເປັນການດີ) ຈະໄດ້ນໍ້າສະກັດຊີວະພາບ.
- ເອົານໍ້າສະກັດຊີວະພາບດັ່ງກ່າວ 1 ບ່ວງແກງຕໍ່ນ້ຳ 1 ລິດ ໃຫ້ເປັດກິນ ຫຼື ປົນອາຫານທຸກໆມື້ ຈະຊ່ວຍໃຫ້ເປັດກິນອາຫານດີ, ແຂງແຮງ, ໃຫຍ່ໄວ ແລະ ປ້ອງກັນພະຍາດໄດ້ອີກດ້ວຍ.
ນອກຈາກສັກວັກຊີນປ້ອງກັນແລ້ວຈະຕ້ອງມີການປ້ອງກັນການເກີດພະຍາດຂອງສະຖານທີ່ ແລະ ຄອກອີກດ້ວຍເຊັ່ນ: ການສີດນໍ້າສະກັດຊີວະພາບສາມາດຂັບໄລແມງໄມ້ ແລະ ດັບກິ່ນໄດ້ດີ, ນໍ້າສະກັດຊີວະພາບປະສົມກັບນໍ້າສີດ ຫຼື ຫົດພື້ນຄອກທີ່ປູດ້ວຍແກບອາທິດລະຄັ້ງ ເພື່ອຂ້າເຊື້ອ ແລະ ດັບກິ່ນ, ແກບຢູ່ພື້ນສາມາດນຳໄປເຮັດຝຸ່ນບົ່ມ ຫຼື ໃສ່ຜົນລະປູກຊະນິດຕ່າງໆໄດ້, ໃນປີໜຶ່ງບໍ່ຄວນລ້ຽງເປັດໃສ່ຄອກດັ່ງກ່າວຢ່າງໜ້ອຍ 3-4 ອາທິດ ເພື່ອທຳການຂ້າເຊື້ອ.
[ຂໍ້ມູນ: ຂ່າວສານກະສິກຳ, ປ່າໄມ້ ແລະ ພັດທະນາ ຊົນນະບົດ]
