ໜີ້ສິນສາທາລະນະຂອງອັງກິດ ໄດ້ຂຶ້ນເຖິງ 100% ຂອງ ຈີດີພີ ເປັນຄັ້ງທຳອິດໃນຮອບ 50 ກວ່າປີ, ໄດ້ສ້າງບັນຫາໜັກໜ່ວງໃຫ້ແກ່ລັດຖະບານຊຸດໃໝ່ ກັບແຜນການໃຊ້ຈ່າຍງົບປະມານ ແລະ ການເພີ່ມພາສີ.
ສຳນັກຂ່າວຕ່າງປະເທດລາຍງານວ່າ: ຫ້ອງການສະຖິຕິແຫ່ງຊາດຂອງ ອັງກິດ ເປີດເຜີຍວ່າລະດັບໜີ້ສິນສາທາລະນະຂອງສະຫະຣາຊະອານາຈັກ ( ອັງກິດ ) ໄດ້ລື່ນກາຍ 100% ຂອງຍອດຜະລິດຕະພັນພາຍໃນ ( GDP ) ເປັນຄັ້ງທຳອິດໃນປະຫວັດສາດສະໄໝໃໝ່ ຫຼື ສູງສຸດນັບແຕ່ຊຸມປີ 1960 ທີ່ສະພາບການເງິນຂອງປະເທດຊຸດໂຊມໜັກ ຫຼັງຈາກສົງຄາມໂລກ ຄັ້ງທີ 2.
ໜີ້ສາທາລະນະສຸດທິຂອງອັງກິດ ບໍ່ລວມໜີ້ທະນາຄານຂອງລັດ ເພີ່ມຂຶ້ນສູ່ລະດັບ 99,3% ໃນເດືອນກໍລະກົດ ສູງສຸດນັບຕັ້ງແຕ່ເລີ່ມມີການເກັບກຳຂໍ້ມູນລາຍເດືອນໃນປີ 1993 ເຊິ່ງກໍ່ໃຫ້ເກີດບັນຫາສໍາລັບລັດຖະມົນຕີການເງິນ ກັບແຜນງົບປະມານ ແລະ ແຜນການໃຊ້ຈ່າຍງົບປະມານ ແລະ ແຜນພາສີຂອງລັດຖະບານຊຸດໃໝ່.
ໜີ້ສາທາລະນະຂອງອັງກິດ ໄດ້ເພີ່ມຂຶ້ນໃນໄລຍະວິກິດການທາງດ້ານການເງິນຂອງໂລກ ແລະ ເພີ່ມຂຶ້ນອີກໃນໄລຍະການລະບາດໂຄວິດ – 19. ໃນຂະນະດຽວກັນ, ການເຕີບໂຕດ້ານເສດຖະກິດນັບມື້ອ່ອນແອລົງ ສົ່ງຜົນໃຫ້ໜີ້ສິນສາທາລະນະເພີ່ມຂຶ້ນ ເມື່ອທຽບກັບ GDP ຂອງປະເທດ.
ໃນເດືອນສິງຫາ ລັດຖະບານໄດ້ກູ້ຢືມເງິນ 13,7 ຕື້ປອນ ເຊິ່ງຫຼາຍກວ່າເດືອນສິງຫາປີຜ່ານມາ 3,3 ຕື້ປອນ ແລະ ຄາດວ່າມີການຂາດດຸນງົບປະມານຫຼາຍເຖິງ 12,4 ຕື້ປອນ.
