ກອງປະຊຸມລັດຖະມົນຕີເສດຖະກິດອາຊຽນ ແລະ ກອງປະຊຸມກ່ຽວຂ້ອງ ຄັ້ງທີ 56 ທີ່ໄດ້ດຳເນີນມາແຕ່ວັນທີ 16 ກັນຍາ ມາຮອດວັນທີ 22 ກັນຍາ 2024 ໄດ້ສຳເລັດລົງຢ່າງຈົບງາມ.
ໃນວັນທີ 22 ກັນຍາ 2024 ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທັງເປັນລັດຖະມົນຕີເສດຖະກິດອາຊຽນຂອງ ສປປ ລາວ ແລະ ທ່ານ ກາວ ກິມ ຮຸນ ( Kao Kim Hourn ) ເລຂາທິການໃຫຍ່ອາຊຽນ ໄດ້ຈັດພິທີຖະແຫຼງຂ່າວ ກ່ຽວກັບຜົນສຳເລັດຂອງກອງປະຊຸມດັ່ງກ່າວ.
ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ຖະແຫຼງບາງຕອນວ່າ: ກອງປະຊຸມລັດຖະມົນຕີອາຊຽນ ( ASEAN ECONOMIC MINISTER’S MEETING ) ແມ່ນກອງປະຊຸມປະຈຳປີຂອງບັນດາລັດຖະມົນຕີເສດຖະກິດຂອງອາຊຽນ ເພື່ອປຶກສາຫາລືແຜນວຽກເສດຖະກິດທີ່ເປັນບຸລິມະສິດຂອງປີນີ້, ກວດກາຄວາມຄືບໜ້າຂອງບັນດາຂໍ້ລິເລີ່ມດ້ານເສດຖະກິດ ພ້ອມທັງວາງທິດທາງຍຸດທະສາດສຳລັບການເຊື່ອມໂຍງເສດຖະກິດໃນພາກພື້ນ, ລັດຖະມົນຕີເສດຖະກິດອາຊຽນ ໄດ້ພົບກັບບັນດາຄູ່ຮ່ວມພັດທະນາເພື່ອທົບທວນຄືນແຜນວຽກການຮ່ວມມືທາງດ້ານເສດຖະກິດໃນປັດຈຸບັນ ແລະ ຈັດວາງບຸລິມະສິດໃຫ້ກັບຊຸມປີຕໍ່ໜ້າ. ຂ້າພະເຈົ້າຈະຂໍແຈ້ງໃຫ້ຊາບຕໍ່ກັບໝາກຜົນຂອງກອງປະຊຸມໃນອາທິດທີ່ຜ່ານມານີ້.
ຄວາມຄືບໜ້າຕໍ່ການຈັດຕັ້ງປະຕິບັດ ບັນດາແຜນວຽກເສດຖະກິດທີ່ເປັນບຸລິມະສິດນັ້ນ ເຊິ່ງເປັນຂໍ້ລິເລີ່ມຕົ້ນຕໍທາງດ້ານເສດຖະກິດອາຊຽນ ໂດຍການປະສົມປະສານເອົາຄຳຂວັນຂອງການເປັນປະທານອາຊຽນຂອງ ສປປ ລາວ ໃນປີ 2024 ນີ້: “ ອາຊຽນ ເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ” ໂດຍສະເພາະລັດຖະມົນຕີເສດຖະກິດອາຊຽນ ໄດ້ຮັບຮອງຖະແຫຼງການອາຊຽນ ວ່າດ້ວຍການເຊື່ອມຈອດຕ່ອງໂສ້ການສະໜອງ ( ASEAN Declaration on Supply Chain Connectivity ) ເຊິ່ງນີ້ເປັນສິ່ງສຳຄັນໃນສະພາບທາງດ້ານສະພາບອາກາດໃນປັດຈຸບັນ. ພ້ອມທັງເປັນການກ້າວອອກມາຈາກການແຜ່ລະບາດຂອງພະຍາດໂຄວິດ – 19 ເຊິ່ງມັນໄດ້ສະແດງໃຫ້ເຫັນຄວາມສຳຄັນຂອງການເຊື່ອມຈອດຕ່ອງໂສ້ການສະໜອງ ແລະ ຄວາມເຂັ້ມແຂງຂອງຕ່ອງໂສ້ການສະໜອງ. ຖະແຫຼງການນີ້ຈະເປັນການຢືນຢັນຄືນຄຳໝັ້ນສັນຍາຂອງອາຊຽນຄືນໃໝ່ ເພື່ອສົ່ງເສີມນະວັດຕະ ກຳ, ການແຂ່ງຂັນ ແລະ ຄວາມເຂັ້ມແຂງຂອງຕ່ອງໂສ້ການສະໜອງໃນພາກພື້ນ.
ບັນດາລັດຖະມົນຕີເສດຖະກິດ ໄດ້ຮັບຮອງເອົາຄຳແນະນຳໃນການປັບປຸງສັນຍາແຜນວຽກຂອງອາຊຽນ ວ່າດ້ວຍການຮ່ວມມືທາງດ້ານຊັບສິນທາງປັນຍາ ( ASEAN Framework Agreement on Intellectual Property Cooperation – AFAIPC ), ພວກເຮົາຄາດຫວັງວ່າການເຈລະຈາປັບປຸງສັນຍາດັ່ງກ່າວຈະສາມາດເລີ່ມຕົ້ນໄດ້ໃນປີ 2025, ພວກເຮົາຍັງຮູ້ສຶກຍິນດີຕໍ່ກັບຄວາມຄືບໜ້າອັນສຳຄັນທີ່ຈະນຳໄປສູ່ການສະຫຼຸບການເຈລະຈາປັບປຸງສັນຍາເຂດການຄ້າເສລີອາຊຽນ – ສປ ຈີນ ( ASEAN – China FTA 3.0 ) ແລະ ເປັນການຢັ້ງຢືນຄືນໃໝ່ ຕໍ່ກັບຄຳໝັ້ນສັນຍາຮ່ວມກັນກັບ ສປ ຈີນ ເພື່ອໃຫ້ສາມາດບັນລຸການສະຫຼຸບທີ່ມີເນື້ອໃນສຳຄັນຂອງການເຈລະຈາພາຍໃນປີນີ້ ເຊິ່ງຈະເປັນການຍົກລະດັບການພົວພັນທາງດ້ານເສດຖະກິດ ແລະ ການຄ້າ ລະຫວ່າງ ອາຊຽນ ແລະ ສປ ຈີນ ໄປສູ່ລະດັບທີ່ສູງຂຶ້ນ.
ໃນກອງປະຊຸມຄັ້ງນີ້ ພວກເຮົາຍັງໄດ້ປຶກສາຫາລືກັນເຖິງວິທີການທີ່ຈະປັບປຸງການຄ້າພາຍໃນອາຊຽນ ໂດຍສະເພາະຜ່ານມາດຕະການອຳນວຍຄວາມສະດວກທາງດ້ານການຄ້າ ແລະ ການຈັດຕັ້ງປະຕິບັດສັນຍາການຄ້າດ້ານສິນຄ້າຂອງອາຊຽນ ( ASEAN Trade in Goods Agreement – ATIGA ), ພວກເຮົາຄາດຫວັງວ່າການເຈລະຈາປັບປຸງສັນຍາດັ່ງກ່າວນີ້ ຈະສາມາດສຳເລັດພາຍໃນປີ 2025.
ພວກເຮົາຍັງໄດ້ປຶກສາຫາລືຕໍ່ກັບແນວທາງ ເພື່ອປັບປຸງສະພາບແວດລ້ອມການລົງທຶນໃນພາກພື້ນ, ພວກເຮົາຍິນດີຕໍ່ກັບການເລີ່ມຕົ້ນລົງນາມໃຫ້ກັບອະນຸສັນຍາລຳດັບທີ 5 ເພື່ອປັບປຸງສັນຍາການລົງທຶນຮອບດ້ານອາຊຽນ ( Fifth Protocol to Amend the ASEAN Comprehensive Investment Agreement – ACIA ) ເຊິ່ງນີ້ຈະເປັນການເພີ່ມຄວາມແນ່ນອນ ແລະ ຄວາມໂປ່ງໃສໃຫ້ກັບນັກລົງທຶນຢູ່ໃນອາຊຽນ ພ້ອມທັງເປັນການຮັບປະກັນວ່າ ສັນຍາລົງທຶນພາຍໃນອາຊຽນຈະສືບຕໍ່ມີບົດບາດ ທັງພາຍໃນ ແລະ ພາຍນອກອາຊຽນ, ພວກເຮົາຄາດວ່າສາມາດເປີດໂຕແຜນວຽກດັ່ງກ່າວຢ່າງເປັນທາງການ ໃນເວທີການລົງທຶນອາຊຽນ ໃນເດືອນຕຸລາ ປີ 2024.
ນອກເໜືອຈາກການຄ້າ ແລະ ການລົງທຶນແລ້ວ, ພວກເຮົາຍັງມີໃນຄວາມຍິນດີຕໍ່ກັບຄວາມກ້າວໜ້າໃນຂົງເຂດການຮ່ວມມືເສດຖະກິດໃໝ່ອື່ນໆ, ໃນຂົງເຂດການແຂ່ງຂັນ ພວກເຮົາຂໍຊົມເຊີຍການສະຫຼຸບສັນຍາຂອບວຽກອາຊຽນ ວ່າດ້ວຍການແຂ່ງຂັນ ( ASEAN Framework Agreement on Competition – AFAC ) ເຊິ່ງມັນເປັນການສະແດງໃຫ້ເຫັນເຖິງການຂະຫຍາຍຕົວຂອງການຮ່ວມມືໃນຂົງເຂດຕ່າງໆພາຍໃຕ້ເສດຖະກິດອາຊຽນ.
