ວັນທີ 23 ກັນຍາ 2024, ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກີລາ ພ້ອມດ້ວຍ ທ່ານ ບິລາລ ດູຣານິ ຜູ້ຕາງໜ້າຈາກອົງການຢູນິເຊັບ ປະຈຳ ສປປ ລາວ ພ້ອມດ້ວຍຄະນະ ໄດ້ຮ່ວມກັນລົງຢ້ຽມຢາມບັນດາໂຮງຮຽນໃນເມືອງຫຼວງນ້ຳທາ ແຂວງຫຼວງນ້ຳທາ ທີ່ໄດ້ຮັບຜົນກະທົບຈາກໄພນ້ຳຖ້ວມ.
ການລົງຢ້ຽມຢາມຄັ້ງນີ້ ຄະນະຜູ້ແທນໄດ້ພົບປະກັບບັນດານັກຮຽນ, ຄູ ແລະ ຜູ້ບໍລິຫານໃນແຂວງ; ໃນລະຫວ່າງການຢ້ຽມຢາມຄະນະຜູ້ແທນດັ່ງກ່າວ ຍັງໄດ້ມອບອຸປະກອນດ້ານການສຶກສາ ແລະ ອຸປະກອນດ້ານນໍ້າ, ສຸຂາພິບານ ແລະ ສຸຂະນາໄມ ໃຫ້ແກ່ບັນດາໂຮງຮຽນທີ່ໄດ້ຮັບຜົນກະທົບ ເຊິ່ງອົງການຢູນິເຊັບ ປະຈຳ ສປປ ລາວ ກໍຍັງໄດ້ໃຫ້ຄຳໝັ້ນສັນຍາໃນການສືບຕໍ່ສະໜອງການສະໜັບສະໜູນໃຫ້ຜູ້ທີ່ໄດ້ຮັບຜົນກະທົບຕື່ມອີກ.
ທ່ານ ພຸດ ສິມມາລາວົງ ໄດ້ເນັ້ນໜັກເຖິງຄວາມເອົາໃຈໃສ່ຂອງລັດຖະບານ ແຫ່ງ ສປປ ລາວ ກໍຄືກະຊວງສຶກສາທິການ ແລະ ກີລາ, ໃນການຮັບປະກັນການຮຽນຢ່າງຕໍ່ເນື່ອງ ໃນເວລາເກີດເຫດສຸກເສີນ; ທ່ານລັດຖະມົນຕີ ກະຊວງສຶກສາທິການ ກ່າວວ່າ: ” ການສຶກສາແມ່ນມີຄວາມສຳຄັນຫຼາຍ ໃນການປົດລັອກທ່າແຮງຂອງເດັກນ້ອຍລາວຂອງພວກເຮົາ. ດັ່ງນັ້ນ, ພວກເຮົາບໍ່ອາດສາມາດປ່ອຍໃຫ້ເຫດການສຸກເສີນໃດໆ ເຮັດໃຫ້ການສຶກສາຂອງພວກເຂົາຢຸດຊະງັກໄດ້ “.
“ ກະຊວງສຶກສາທິການ ແລະ ກີລາ ໄດ້ເອົາໃຈໃສ່ທຸກຄວາມພະຍາຍາມ ເພື່ອຫຼຸດຜ່ອນຜົນກະທົບຈາກໄພນໍ້າຖ້ວມ ຕໍ່ກັບໂຮງຮຽນຢູ່ແຂວງ ຫຼວງນ້ຳທາ ແລະ ບັນດາເມືອງ ແລະ ແຂວງອື່ນໆທີ່ໄດ້ຮັບຜົນກະທົບເຊັ່ນດຽວກັນ. ພວກເຮົາພວມເຮັດວຽກຢ່າງໃກ້ຊິດກັບຄູ່ຮ່ວມພັດທະນາຂອງພວກເຮົາ ເຊັ່ນ ອົງການຢູນິເຊັບ ເພື່ອສະໜອງອຸປະກອນທີ່ຈໍາເປັນ ລວມທັງອຸປະກອນການຮຽນ – ການສອນ ແລະ ການຊ່ວຍເຫຼືອທາງດ້ານຈິດໃຈ ເພື່ອຊ່ວຍໃຫ້ນັກຮຽນ ແລະ ຄູ – ອາຈານ ສາມາດເອົາຊະນະເຫດການອັນທ້າທາຍນີ້ “.
ອົງການຢູນິເຊັບ ແມ່ນໜຶ່ງໃນບັນດາອົງການທຳອິດທີ່ໄດ້ສະໜອງການຊ່ວຍເຫຼືອຕໍ່ກັບເຫດການໄພນໍ້າຖ້ວມທີ່ເກີດຂຶ້ນຢູ່ໃນ ສປປ ລາວ ໃນເດືອນນີ້. ກ່ອນໜ້ານີ້ ອົງການຢູນິເຊັບ ກໍຍັງໄດ້ມອບອຸປະກອນດ້ານນໍ້າ, ສຸຂາພິບານ ແລະ ສຸຂະນາໄມ ເພື່ອເປັນການຊ່ວຍເຫຼືອບັນເທົາທຸກໃນຂັ້ນເບື້ອງຕົ້ນ ໃຫ້ແກ່ຄອບຄົວທີ່ໄດ້ຮັບຜົນກະທົບ ເປັນຕົ້ນແມ່ນ: ຢາເມັດຄະລໍລີນ ສຳລັບຂ້າເຊື້ອໃນນ້ຳດື່ມ, ສະບູ, ຄຸ ແລະ ໂອຕັກນໍ້າ, ຜ້າອະນາໄມແມ່ຍິງ ແລະ ອື່ນໆ.
ທ່ານ ບິລາລ ດູຣານິ ຜູ້ຕາງໜ້າຈາກອົງການຢູນິເຊັບ ປະຈຳ ສປປ ລາວ ກໍໄດ້ກ່າວຢ້ຳຄືນຄຳໝັ້ນສັນຍາຂອງອົງການຢູນິເຊັບ ທີ່ຈະໃຫ້ການຊ່ວຍເຫຼືອແກ່ຊຸມຊົນທີ່ໄດ້ຮັບຜົນກະທົບຈາກໄພນ້ຳຖ້ວມ; ທ່ານໄດ້ກ່າວວ່າ: “ ອົງການຢູນິເຊັບ ພ້ອມທີ່ຈະໃຫ້ການສະໜັບສະໜູນແກ່ກະຊວງສຶກສາທິການ ແລະ ກີລາ ເພື່ອຟື້ນຟູການສຶກສາຂອງເດັກນ້ອຍ ທີ່ໄດ້ຮັບຜົນກະທົບຈາກໄພນໍ້າຖ້ວມ ແລະ ເພື່ອຊ່ວຍໃຫ້ຊຸມຊົນທີ່ຖືກຜົນກະທົບຈາກໄພນ້ຳຖ້ວມໃຫ້ຟື້ນຕົວຄືນຢ່າງໄວ ”.
” ອົງການພວກເຮົາເຊື່ອວ່າ ການສຶກສາເປັນຄືເຊືອກຊູຊີບ ສໍາລັບເດັກນ້ອຍໃນເວລາສຸກເສີນ ແລະ ພວກເຮົາຢືນຢັນທີ່ຈະສືບຕໍ່ເຮັດວຽກ ເພື່ອຮັບປະກັນວ່າໂຮງຮຽນ, ຄູ – ອາຈານ ແລະ ເດັກນ້ອຍນັກຮຽນທຸກຄົນ ຈະສາມາດເຂົ້າເຖິງອຸປະກອນທີ່ຈໍາເປັນ ເພື່ອສືບຕໍ່ກິດຈະກໍາການຮຽນ – ການສອນ “.
