ແຕ່ວັນທີ 18 ກໍລະກົດ ຫາ ວັນທີ 24 ກັນຍາ 2024 ສປປ ລາວ ໄດ້ຮັບຜົນກະທົບຈາກອຸທົກກະໄພ ລວມທັງໝົດມີ 125 ເມືອງ, ປະຊາຊົນຖືກຜົນກະທົບ 200.169 ຄົນ, ເສຍຊີວິດ 10 ຄົນ; ເຮືອນໄດ້ຮັບຄວາມເສຍຫາຍ 969 ຫຼັງ, ໃນນີ້ເສຍຫາຍ 100% ຈໍານວນ 137 ຫຼັງ, ເນື້ອທີ່ທໍາການຜະລິດຖືກກະທົບ 29.659 ເຮັກຕາ, ເສັ້ນທາງ 272 ເສັ້ນ ແລະ ອື່ນໆອີກ ລວມຄວາມເສຍຫາຍເບື້ອງຕົ້ນ 720 ຕື້ກວ່າກີບ.
ໃນວັນທີ 24 ກັນຍາ 2024 ຢູ່ຫ້ອງປະຊຸມກະຊວງປ້ອງກັນປະເທດ ໄດ້ຈັດກອງປະຊຸມປຶກສາຫາລື ກ່ຽວກັບການແກ້ໄຂໄພພິບັດນໍ້າຖ້ວມ ຢູ່ບັນດາແຂວງໃນລາວ ໂດຍການເປັນປະທານຂອງ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ, ມີບັນດາຄະນະກໍາມະການຄຸ້ມຄອງໄພພິບັດກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ບັນດາກະຊວງທີ່ກ່ຽວຂ້ອງເຂົ້າຮ່ວມ.
ທ່ານ ວົງຄໍາ ພັນທະນຸວົງ ຫົວໜ້າກອງເລຂາ ຄະນະກຳມະການຄຸ້ມຄອງໄພພິບັດຂັ້ນສູນກາງ ໄດ້ລາຍງານສະພາບລວມຂອງໄພພິບັດ ແລະ ການຕອບໂຕ້ສຸກເສີນ ປີ 2024 ເຊິ່ງນັບແຕ່ວັນທີ 18 ກໍລະກົດ 2024 ມາຮອດປັດຈຸບັນ ສປປ ລາວ ໄດ້ຮັບຜົນກະທົບຈາກພາຍຸ 4 ຫົວ ຄື: ພາຍຸດີເປຣຊັນ, ພາຍຸໝູນເຂດຮ້ອນ ພຣະພິຣຸນ, ພາຍຸໄດ້ຝຸ່ນ ຢາກິ, ພາຍຸຊູລິກ ເຊິ່ງລວມມີ 15 ແຂວງ ທີ່ຖືກຜົນກະທົບ ຄື: ນະຄອນຫຼວງວຽງຈັນ, ແຂວງຫຼວງນໍ້າທາ, ຜົ້ງສາລີ, ສາລະວັນ, ຄໍາມ່ວນ, ຫຼວງພະບາງ, ຊຽງຂວາງ, ຫົວພັນ, ເຊກອງ, ວຽງຈັນ, ບໍ່ແກ້ວ, ໄຊຍະບູລີ, ບໍລິຄຳໄຊ, ໄຊສົມບູນ ແລະ ແຂວງອຸດົມໄຊ.
ໂດຍອີງຕາມຂໍ້ມູນທີ່ຄະນະກຳມະການຄຸ້ມຄອງໄພພິບັດຂັ້ນແຂວງ ລາຍງານຜົນກະທົບວ່າ: ຮອດວັນທີ 24 ກັນຍາ 2024 ລວມທັງໝົດມີ 125 ເມືອງ, 1.337 ບ້ານ, 50.889 ຄອບຄົວ, ປະຊາຊົນຖືກຜົນກະທົບ 200.169 ຄົນ ( ຍິງ 83.268 ຄົນ ), ເສຍຊີວິດ 10 ຄົນ, ສູນຫາຍ 2 ຄົນ, ເຮືອນໄດ້ຮັບຄວາມເສຍຫາຍ 969 ຫຼັງ, ໃນນີ້ ເສຍຫາຍ 100% ຈໍານວນ 137 ຫຼັງ, ເສຍຫາຍບາງສ່ວນ 832 ຫຼັງ, ເນື້ອທີ່ທໍາການຜະລິດຖືກກະທົບ 29.659,39 ເຮັກຕາ, ຊົນລະປະທານ 125 ແຫ່ງ, ໜອງປາ 697 ໜອງ, ສັດໃຫຍ່ ແລະ ສັດປີກ ຈໍານວນ 11.866 ໂຕ; ເສັ້ນທາງ 272 ເສັ້ນ, ຂົວ 14 ແຫ່ງ, ໂຮງຮຽນ 79 ຫຼັງ, ໂຮງໝໍແຂວງ 1 ແຫ່ງ, ສຸກສາລາ 13 ແຫ່ງ, ນໍ້າລິນ 37 ແຫ່ງ, ເສົາໄຟຟ້າ 312 ເສົາ, ລະບົບນໍ້າປະປາ 6 ຈຸດ.
ນອກນີ້, ຍັງມີລະບົບໂທລະຄົມ, ອາຄານສໍານັກງານຫ້ອງການຂອງລັດ – ເອກະຊົນ, ຮ້ານຄ້າ, ໂຮງງານ, ຕະຫຼາດ ແລະ ພາຫະນະ ກໍໄດ້ຮັບຜົນກະທົບຫຼາຍສົມຄວນ, ຄາດຄະເນມູນຄ່າຜົນເສຍຫາຍເບື້ອງຕົ້ນ 720,2 ຕື້ກີບ. ສໍາລັບແຂວງທີ່ໄດ້ຮັບຜົນກະທົບຫຼາຍກວ່າໝູ່ແມ່ນແຂວງ ຫຼວງນໍ້າທາ ແລະ ນະຄອນຫຼວງວຽງຈັນ.
ພ້ອມດຽວກັນນີ້, ໃນພິທີຍັງໄດ້ລາຍງານກ່ຽວກັບການຊ່ວຍເຫຼືອສຸກເສີນ, ແຜນການຟື້ນຟູໃນໄລຍະຮີບດ່ວນຂັ້ນສູງກາງ, ຂັ້ນແຂວງ, ການຊ່ວຍເຫຼືອຈາກພາຍໃນ ແລະ ຕ່າງປະເທດ, ພ້ອມທັງໄດ້ປຶກສາຫາລື ແລະ ເອກະພາບຕໍ່ແຜນຈຸດສຸມໃນການນໍາໃຊ້ກອງທຶນຄຸ້ມຄອງໄພພິບັດ, ແກ້ໄຂໄພພິບັດ, ແຜນການຟື້ນຟູຮີບດ່ວນ ແລະ ແຜນການຈຸດສຸມໃນຕໍ່ໜ້າຕື່ມອີກ.
ໂອກາດນີ້, ທ່ານ ພົນເອກ ຈັນສະໝອນ ຈັນຍາລາດ ຍັງໄດ້ໃຫ້ທິດຊີ້ນຳ, ພ້ອມທັງເນັ້ນໜັກຫຼາຍບັນຫາຕໍ່ຄະນະກໍາມະການຄຸ້ມຄອງໄພພິບັດ ແລະ ພາກສ່ວນທີ່ກ່ຽວຂ້ອງຕ່າງໆ ເອົາໃຈໃສ່ຕໍ່ ຄວາມຮັບຜິດຊອບຂອງຕົນເປັນໜ້າທີ່ສຳຄັນ ມີແບບແຜນ, ມີການປະສານສົມທົບກັນຢ່າງລະອຽດໃນແຕ່ລະຂັ້ນ ເພື່ອແກ້ໄຂໃຫ້ຖ່ວງທັນເວລາ, ສືບຕໍ່ໂຄສະນາຕິດຕາມການປ່ຽນແປງຂອງສະພາບອາກາດ ເພື່ອແຈ້ງເຕືອນປະຊາຊົນໃຫ້ມີສະຕິລະວັງຕົວປ້ອງກັນລ່ວງໜ້າ ຢ່າງເປັນເຈົ້າການ, ຄະນະກຳມະການຄຸ້ມຄອງໄພພິບັດແຕ່ລະຂັ້ນ ນັບແຕ່ຂັ້ນສູນກາງຮອດຂັ້ນທ້ອງຖິ່ນ ຕ້ອງກຽມຄວາມພ້ອມຮອບດ້ານ ເພື່ອຮັບມື ແລະ ແກ້ໄຂຟື້ນຟູ, ສ້ອມແປງຢ່າງຮີບດ່ວນ ໃນການຊ່ວຍເຫຼືອດ້ານຕ່າງໆຕໍ່ກັບບັນດາແຂວງທີ່ໄດ້ຖືກຜົນກະທົບໃນລາວ ໃຫ້ກັບມາສູ່ສະພາບປົກກະຕິໃຫ້ໄດ້ໄວທີ່ສຸດ.
[ ທີ່ມາ: ໜັງສືພິມກອງທັບປະຊາຊົນລາວ ]
