ພິທີເຊັນບົດບັນທຶກຄວາມເຂົ້າໃຈ ( MOU ) ເພື່ອກະກຽມຂໍສ້າງຕັ້ງໂຄງການລົງທຶນທຸລະກິດຮ່ວມຕາມສັນຍາ ພັດທະນາກະສິກໍາ ແລະ ສະບຽງອາຫານ ລະຫວ່າງ ກົມແຜນການ ແລະ ການຮ່ວມມື ກະຊວງກະສິກໍາ ແລະ ປ່າໄມ້ ແລະ ບໍລິສັດ 3 ບີ ຈະເລີນຟາມ ຈໍາກັດຜູ້ດຽວ ມີຂຶ້ນໃນວັນທີ 20 ກັນຍາ ທີ່ນະຄອນຫຼວງວຽງຈັນ.
ຕາງໜ້າກະຊວງກະສິກໍາ ແລະ ປ່າໄມ້ ລົງນາມໂດຍ ທ່ານ ບຸນເດດ ສຸດທະວິໄລ ຫົວໜ້າກົມແຜນການ ແລະ ຮ່ວມມື, ທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ, ທ່ານ ກາວີພອນ ພຸດທະວົງ ຫົວໜ້າກົມລ້ຽງສັດ ແລະ ການປະມົງ; ຕາງໜ້າ ບໍລິສັດ 3 ບີ ຈະເລີນຟາມ ຈໍາກັດຜູ້ດຽວ ລົງນາມໂດຍ ທ່ານ ຄໍາຫຼວງ ແກ້ວມະນີໄຊ ອໍານວຍການບໍລິສັດ, ທ່ານ ສີສຸພັນ ແສງສະຫວັນ ທີ່ປຶກສາບໍລິສັດ, ທ່ານ ພຸດທະສອນ ວົງມົນຕີ ທີ່ປຶກສາບໍລິສັດ ເຊິ່ງມີ ທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້, ພາກສ່ວນທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມເປັນສັກຂີພິຍານ.
ເປົ້າໝາຍຂອງການເຊັນບົດບັນທຶກໃນຄັ້ງນີ້ ເພື່ອສ້າງຕັ້ງບໍລິສັດຮ່ວມ ລະຫວ່າງ ກະຊວງກະສິກໍາ ແລະ ປ່າໄມ້ ແລະ ບໍລິສັດເອກະຊົນ ເພື່ອເປັນການປະກອບສ່ວນໃນການຈັດຕັ້ງປະຕິບັດນະໂຍບາຍເສດຖະກິດເອກະລາດເປັນເຈົ້າຕົນເອງ ຂອງຂະແໜງກະສິກໍາ ແລະ ປ່າໄມ້ ຕາມແຜນງານຄໍ້າປະກັນສະບຽງອາຫານຜະລິດພາຍໃນ ແລະ ທົດແທນການນໍາເຂົ້າ ແລະ ສົ່ງອອກສິນຄ້າກະສິກໍາ ສ້າງລາຍຮັບທີ່ເປັນເງິນຕາເຂົ້າປະເທດ ປະກອບສ່ວນເຂົ້າໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ.
ເພື່ອຮ່ວມມືໃນການພັດທະນາ ແລະ ຈັດສັນພື້ນທີ່ເຂດກະສິກໍາ – ອຸດສາຫະກໍາ ເພື່ອດຶງດູດ ແລະ ຕອບສະໜອງຕໍ່ຄວາມຕ້ອງການຂອງການລົງທຶນພາຍໃນ ແລະ ຕ່າງປະເທດ ໃນການຜະລິດ ແລະ ສົ່ງອອກສິນຄ້າກະສິກໍາ ແລະ ຮ່ວມມືກັບບັນດາສູນຄົ້ນຄວ້າກະສິກໍາໃນການຜະລິດພັນພືດ, ສັດ ແລະ ພັດທະນາເຕັກນິກກະສິກໍາ; ຮ່ວມມືໃນການພັດທະນາ ແລະ ຈັດສັນທີ່ດິນກະສິກໍາ; ຮ່ວມມືຮອບດ້ານໃນການຜະລິດກະສິກໍາໃຫ້ເປັນສິນຄ້າຄຸນນະພາບ ເພື່ອຈໍາໜ່າຍພາຍໃນ ແລະ ສົ່ງອອກຕ່າງປະເທດ; ຮ່ວມມືກັບໂຮງຮຽນເຕັກນິກກະສິກໍາ ໃນການພັດທະນາບຸກຄະລາກອນກະສິກໍາ ແລະ ຮ່ວມມືຮອບດ້ານໃນການພັດທະນາກະສິກໍາຄົງວົງຈອນ.
