ທີມຊາດລາວ ຮຸ່ນອາຍຸບໍ່ເກີນ 20 ປີ ລົງສະໜາມນັດທໍາອິດໃນການແຂ່ງຂັນບານເຕະ ຊີງແຊັມອາຊີ U20 ຮອບຄັດເລືອກ 2025 ( AFC U20 ASIAN CUP 2025 Qualifiers ) ກຸ່ມ G ເມື່ອວັນທີ 25 ກັນຍາ 2024 ທີ່ສະໜາມກີລາແຫ່ງຊາດ ຫຼັກ 16 ນະຄອນຫຼວງວຽງຈັນ ສປປ ລາວ ບໍ່ສາມາດຕ້ານທ້ານຄວາມແຂງແກ່ນຂອງ ອີຣານ ໄດ້ກ່ອນເສຍໄປຂາດລອຍ 0-8.
ສປປ ລາວ ໄດ້ຮັບສິດເປັນເຈົ້າພາບກຸ່ມ G ປະກອບມີ : ອີຣານ, ມົງໂກລີ, ອິນເດຍ ແລະ ສປປ ລາວ ( ເຈົ້າພາບ ) ເຊິ່ງເມື່ອວັນທີ 25 ກັນຍາ 2024 ເປັນການແຂ່ງຂັນມື້ທໍາອິດ ທີ່ສະໜາມກີລາແຫ່ງຊາດ ຫຼັກ 16 ປາກົດວ່າ: ຄູ່ທໍາອິດ ອິນເດຍ ສາມາດເອົາຊະນະ ມົງໂກລີ 4-1 ເກັບ 3 ຄະແນນທໍາອິດ.
ສ່ວນຄູ່ທີ 2 ທີມຊາດລາວ ເຈົ້າພາບ ລົງສະໜາມພົບກັບ ອີຣານ ປາກົດວ່າ: ນັດນີ້ ອີຣານ ຄຸມເກມໄດ້ທັງໝົດ ໄລ່ເຈາະກອງຫຼັງຂອງທີມຊາດລາວ ຢ່າງຕໍ່ເນື່ອງ ໂດຍເຄິ່ງເວລາທໍາອິດຈິງໄປ 5 ປະຕູ ແລະ ເຄິ່ງເວລາທີ 2 ມາໄດ້ເພີ່ມອີກ 3 ປະຕູເອົາຊະນະ ທີມຊາດລາວ ໄປຂາດລອຍ 8-0 ເຊິ່ງອີຣານ ໄດ້ປະຕູຈາກ Farhan Bozorgianasl ນາທີໆ 8, Amirmohammad Razaghinia ນາທີໆ 29, Yaghoob Barajeh ຍິງ 2 ປະຕູນາທີໆ 31 ແລະ 88 ( ຈຸດໂທດ ), Esmaeil Gholizadeh ນາທີໆ 36, Kasra Taheri ຍິງ 2 ປະຕູນາທີໆ 41 ກັບ 90+2 ( ຈຸດໂທດ ) ແລະ Abbas Kahrizi ນາທີໆ 63.
ຈາກຜົນນັດທໍາອິດເຮັດໃຫ້ ອີຣານ ຢຶດທີມກຸ່ມ G ຈາກການມີ 3 ຄະແນນເທົ່າກັບ ອິນເດຍ, ສ່ວນ ມົງໂກລີ ຢູ່ອັນດັບທີ 3 ຍັງບໍ່ມີຈັກຄະແນນ ແລະ ທີມຊາດລາວ ຍັງບໍ່ມີຈັກຄະແນນຢູ່ອັນດັບສຸດທ້າຍຂອງກຸ່ມ ພ້ອມເຮັດໃຫ້ ທີມຊາດລາວ ກັບໂອກາດໄປຕໍ່ຮິບຮີ່ ເນື່ອງຈາກລາຍການນີ້ຈະຄັດເອົາອັນດັບທີ 1 ຂອງແຕ່ລະກຸ່ມ A-J ຜ່ານເຂົ້າຮອບສຸດທ້າຍໄປ, ສ່ວນອັນດັບທີ 2 ຂອງກຸ່ມຈະເອົາພຽງ 5 ທີມທີ່ດີທີ່ສຸດ.
ຫຼັງຈັບການແຂ່ງຂັນ ປີເຕີ ພັນທະວົງ ຫົວໜ້າທີມຊາດລາວ ຮຸ່ນອາຍຸບໍ່ເກີນ 20 ປີ ໃຫ້ສໍາພາດວ່າ: ນັດນີ້ພວກເຮົາໄດ້ແຂ່ງຂັນກັນທີມທີ່ແຂງແກ່ນຫຼາຍ ກໍຄື ອີຣານ ພວກເຮົາມີນັກເຕະທີ່ຮູບຮ່າງສູງໃຫຍ່ ແລະ ທັກສະການຫຼິ້ນທີ່ເໜືອພວກເຮົາທຸກຢ່າງ. ຢ່າງໃດກໍຕາມ ພວກເຮົາຂໍໂທດແຟນບານ ແລະ ຂອບໃຈທີ່ເຊຍພວກເຮົາມາໂດຍຕະຫຼອດ ແນ່ນອນພວກເຮົາຍັງອີກ 2 ນັດພວກເຮົາຈະກັບໄປປັບປຸງແກ້ໄຂ ແລະ ກັບມາສູ້ອີກຄັ້ງ.
ສໍາລັບ ທີມຊາດລາວ ຍັງມີຕາຕະລາງລົງສະໜາມອີກ 2 ນັດສຸດທ້າຍທີ່ສະໜາມກີລາແຫ່ງຊາດ ຫຼັກ 16 ນະຄອນຫຼວງວຽງຈັນ ສປປ ລາວ ດັ່ງນີ້:
– ວັນທີ 27/09/2024 ເວລາ 19:00 ໂມງ ລາວ ພົບ ມົງໂກລີ
– ວັນທີ 29/09/2024 ເວລາ 19:00 ໂມງ ອິນເດຍ ພົບ ລາວ
ຂ່າວ-ຮູບ: Larh Creators
