ວັນທີ 24 ກັນຍາ 2024, ພິທີເປີດຫ້ອງວາງສະແດງ ຕົວເມືອງແຫ່ງສະເໜ່ ຂອງ ສປປ ລາວ ໄດ້ຈັດຂຶ້ນຢ່າງຄຶກຄື້ນ ທ່າມກາງບັນຍາກາດໃນງານວາງສະແດງສິນຄ້າ ຈີນ-ອາຊຽນ ຄັ້ງທີ 21 ຢູ່ ນະຄອນໜານໜິງ ເຂດປົກຄອງຕົນເອງເຜົ່າຈ້ວງກວ້າງຊີ, ສປ ຈີນ ໂດຍມີການນຳ ສປ ຈີນ ແລະ ປະເທດສະມາຊິກອາຊຽນ, ເຈົ້າໜ້າທີ່ລັດຖະບານ, ນັກທຸລະກິດ, ນັກວິຊາການ, ແລະ ຜູ້ຕາງໜ້າຈາກອົງການຈັດຕັ້ງສາກົນ ເຂົ້າຮ່ວມຫຼາຍກວ່າ 1.000 ຄົນ. ໃນນັ້ນ, ແຂວງຫົວພັນໄດ້ຮັບກຽດເປັນຕົວແທນຕົວເມືອງແຫ່ງສະເໜ່ ຂອງ ສປປ ລາວ ເຂົ້າຮ່ວມ.
ໃຫ້ກຽດເປີດຫ້ອງວາງສະແດງ ຕົວເມືອງແຫ່ງສະເໜ່ ໂດຍແມ່ນ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສະຫະກຳ ແລະ ການຄ້າ, ທ່ານ ພຸດພັນ ແກ້ວວົງໄຊ ຮອງເຈົ້າແຂວງຫົວພັນ, ທ່ານ ຫຼຽງ ຍີ່ກວາງ ຮອງເລຂາທິການ ກອງເລຂາງານວາງສະແດງ ຈີນ-ອາຊຽນ, ທ່ານ ປອ ມະໂນທອງ ວົງໄຊ ຮອງລັດຖະມົນຕີກະຊວງອຸດສະຫະກຳ ແລະ ການຄ້າ ແລະ ທ່ານ ໄຊຊະນະ ສິດທິພອນ ຮອງເລຂາທິການຄະນະກຳມະການຮ່ວມມືລາວ-ຈີນ ກະຊວງແຜນການ ແລະ ການລົງທຶນ.
ຈາກນັ້ນ, ບັນດາທ່ານແຂກໄດ້ພ້ອມກັນຢ້ຽມຊົມຫ້ອງວາງສະແດງ. ເຊິ່ງຈຸດເດັ່ນພາຍໃນຫ້ອງວາງສະແດງປະກອບດ້ວຍການຈຳລອງພູຜາຫີນປູນ, ຖ້ຳທ່ານຜູ້ນຳ, ໜ່ວຍແກ້ວຫຼັກເມືອງ, ຫີນຕັ້ງ ແລະ ບັນດາກິດຈະກຳຕ່າງໆ ເປັນຕົ້ນແມ່ນການສະແດງສີລະປະວັນນະຄະດີ, ສາທິດການຕໍ່າຫູກ… ເຊິ່ງສ້າງຄວາມປະທັບໃຈໃຫ້ແກ່ບັນດາແຂກທີ່ເຂົ້າມາຮ່ວມງານ.
ໃນຕອນທ່ຽງຂອງວັນດຽວກັນໄດ້ມີພິທີເຊັນບົດບັນທຶກຄວາມເຂົົ້າໃຈ MOU ແລະ ສັນຍາການຮ່ວມມື ຂອງບັນດາບໍລິສັດ ລາວ-ຈີນ ເພືີ່ອລົງນາມລະຫວ່າງບັນດາຄູ່ສັນຍາຮ່ວມມື ແລະ ເພືີ່ອເປັນການເພີ່ມທະວີສາຍພົວພັນດ້ານເສດຖະກິດ – ການຄ້າ, ການລົງທຶນ ລະຫວ່າງ ບັນດາຫົວໜ່ວຍທຸລະກິດ ລາວ-ຈີນ. ໂດຍມີການລົງນາມ 5 ໂຄງການຄື:
– ໂຄງການຮ່ວມມືພັດທະນາໂຮງແຮມ, ສູນການຄ້າ ແລະ ບໍລິການ ຕິດພັນກັບການທ່ອງທ່ຽວ.
– ໂຄງການພັດທະນາ ແລະ ສົ່ງເສີມການທ່ອງທ່ຽວ.
– ໂຄງການສົ່ງເສີມການຮ່ວມມືດ້ານກະສິກໍາເພື່ອສົ່ງອອກ ສປ ຈີນ.
– ສັນຍາ ຊື້-ຂາຍ ສິນຄ້າກະສິກໍາ ແລະ ພືດທີ່ເປັນຢາ.
– ບົດບັນທຶກຄວາມເຂົົ້າໃຈ MOU ກ່ຽວກັບການ ຊື້-ຂາຍ ສິນຄ້າກະສິກໍາ ແລະ ພືດທີ່ເປັນຢາ.
ຂໍ້ມູນ: ໄອແກ້ວ
