ໃນວັນທີ 20 ກັນຍາ 2024, ກົມແຜນການ ແລະ ການຮ່ວມມື, ກະຊວງກະສິກໍາ ແລະ ປ່າໄມ້ ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ເພື່ອກະກຽມ ຂໍສ້າງຕັ້ງໂຄງການລົງທຶນທຸລະກິດຮ່ວມຕາມສັນຍາ ພັດທະນາກະສິກໍາ ແລະ ສະບຽງອາຫານ ລະຫວ່າງ ກົມແຜນການ ແລະ ການຮ່ວມມື, ກະຊວງກະສິກໍາ ແລະ ປ່າໄມ້ ແລະ ບໍລິສັດ 3 ບີ ຈະເລີນຟາມ ຈໍາກັດຜູ້ດຽວ ຂຶ້ນ, ທີ່ນະຄອນຫຼວງວຽງຈັນ.
ຕາງໜ້າກະຊວງກະສິກໍາ ແລະ ປ່າໄມ້ ລົງນາມ ໂດຍ ທ່ານ ປອ. ບຸນເດດ ສຸດທະວິໄລ ຫົວໜ້າກົມແຜນການ ແລະ ຮ່ວມມື,, ທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ, ທ່ານ ປອ. ກາວີພອນ ພຸດທະວົງ ຫົວໜ້າກົມລ້ຽງສັດ ແລະ ການປະມົງ; ຕາງໜ້າ ບໍລິສັດ 3 ບີ ຈະເລີນຟາມ ຈໍາກັດຜູ້ດຽວ ລົງນາມໂດຍ ທ່ານ ຄໍາຫຼວງ ແກ້ວມະນີໄຊ ອໍານວຍການບໍລິສັດ, ທ່ານ ສີສຸພັນ ແສງສະຫວັນ ທີ່ປຶກສາບໍລິສັດ, ທ່ານ ພຸດທະສອນ ວົງມົນຕີ ທີ່ປຶກສາບໍລິສັດ. ຊຶ່ງມີ ທ່ານ ຮສ. ປອ. ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້, ພາກສ່ວນທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມເປັນສັກຂີພິຍານ.
ເປົ້າໝາຍຂອງການເຊັນບົດບັນທຶກໃນຄັ້ງນີ້: ເພື່ອສ້າງຕັ້ງບໍລິສັດຮ່ວມ ລະຫວ່າງ ກະຊວງກະສິກໍາ ແລະ ປ່າໄມ້ ແລະ ບໍລິສັດເອກະຊົນ ເພື່ອເປັນການປະກອບສ່ວນໃນການຈັດຕັ້ງປະຕິບັດນະໂຍບາຍ ເສດຖະກິດເອກະລາດເປັນເຈົ້າຕົນເອງ ຂອງຂະແໜງກະສິກໍາ ແລະ ປ່າໄມ້ ຕາມແຜນງານຄໍ້າປະກັນສະບຽງອາຫານຜະລິດພາຍໃນ ແລະ ທົດແທນການ ນໍາເຂົ້າ ແລະ ສົ່ງອອກສິນຄ້າກະສິກໍາ ສ້າງລາຍຮັບທີ່ເປັນເງິນຕາເຂົ້າປະເທດ ປະກອບສ່ວນເຂົ້າໃນການແກ້ໄຂຄວາມຫຍຸ້ງ ຍາກ ທາງດ້ານເສດຖະກິດ-ການເງິນ; ເພື່ອຮ່ວມມືໃນການພັດທະນາ ແລະ ຈັດສັນພື້ນທີ່ ເຂດກະສິກໍາ-ອຸດສາຫະກໍາ ເພື່ອດຶງດູດ ແລະ ຕອບສະໜອງ ຕໍ່ຄວາມຕ້ອງການຂອງການລົງທຶນພາຍໃນ ແລະ ຕ່າງປະເທດ ໃນການຜະລິດ ແລະ ສົ່ງອອກສິນຄ້າກະສິກໍາ ແລະ ຮ່ວມມືກັບບັຍດາສູນຄົ້ນຄວ້າກະສິກໍາໃນການຜະລິດພັນພືດ, ສັດ ແລະ ພັດທະນາເຕັກນິກກະສິກໍາ; ຮ່ວມມືໃນການພັດທະນາ ແລະ ຈັດສັນທີ່ດິນກະສິກໍາ; ຮ່ວມມືຮອບດ້ານໃນການຜະລິດກະ ສິກໍາໃຫ້ເປັນສິນ ຄ້າຄຸນນະພາບ ເພື່ອຈໍາໜ່າຍພາຍໃນ ແລະ ສົ່ງອອກຕ່າງປະເທດ; ຮ່ວມມືກັບໂຮງຮຽນເຕັກນິກກະສິກໍາ ໃນການພັດທະ ນາບຸກຄະລາກອນກະສິກໍາ ແລະ ຮ່ວມມືຮອບດ້ານໃນການພັດທະນາກະສິກໍາຄົງວົງຈອນ.
ທີ່ມາ:ຂ່າວສານກະສິກຳ,ປ່າໄມ້ ແລະ ພັດທະນາ ຊົນນະບົດ
