ພິທີເຜີຍແຜ່ເອກະສານ ວຽກງານກ່ຽວກັບການເກັບອາກອນທີ່ດິນເຂົ້າໃນລະບົບ TaxRIS ໄດ້ຈັດຂຶ້ນໃນວັນທີ 23 ກັນຍາ 2024 ນີ້ ຢູ່ຫ້ອງປະຊູມຫ້ອງວ່າການແຂວງ, ເປັນປະທານໂດຍທ່ານ ບູນລ້ຽງ ດວງສະເພົາທອງ ກຳມະການພັກແຂວງ ຫົວໜ້າພະແນກການເງິນແຂວງ, ທ່ານ ສາຍທອງ ອູ້ຍພິລາວົງ ຮອງຫົວໜ້າກົມເຕັກໂນໂລຊີ່ຂໍ້ມູນຂ່າວສານ ກະຊວງການເງິນ, ມີບັນດາຫົວໜ້າ, ຮອງຫົວໜ້າພະແນກ, ເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງຫົວໜ້າສ່ວຍສາອາກອນແຂວງ ແລະ ເມືອງ, ຫົວໜ້າ-ຮອງຫົວໜ້າຂະແໜງ ແລະ ພະນັກງານເຂົ້າຮ່ວມ.
ທ່ານ ນາງ ລາຕີ ໄຊຍະວົງ ຮອງຫົວໜ້າພະແນກນິຕິກຳ ກົມສ່ວຍສາອາກອນ ໄດ້ເຜີຍແຜ່ກົດໝາຍວ່າດ້ວຍການເກັບອາກອນທີ່ດິນ, ລະບົບການປ້ອນຂໍ້ມູນຕອນດິນ, ການແຈ້ງ-ມອບອາກອນທີ່ດິນ ແລະ ການແບ່ງປັນຜົນປະໂຫຍດ (ບຳເນັດ) ບ້ານ ເຊິ່ງກົດໝາຍດັ່ງກ່າວໄດ້ກຳນົດຫຼັກການ, ລະບຽບການ, ວິທີການ ແລະ ມາດຕະການກ່ຽວກັບການຄຸ້ມຄອງ ແລະ ຕິດຕາມ ກວດກາວຽກງານອາກອນທີ່ດິນ ເພື່ອເຮັດໃຫ້ວຽກງານດັ່ງກ່າວມີປະສິດທິພາບ ແລະ ປະສິດທີຜົນ ແນໃສ່ຮັບປະກັນເກັບລາຍຮັບເຂົ້າງົບປະມານແຫ່ງລັດໃຫ້ຖືກຕ້ອງ, ຄົບຖ້ວນ, ຍຸຕິທຳ ແລະ ໂປ່ງໃສ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ເຊິ່ງກົດໝາຍສະບັບດັ່ງກ່າວປະກອບມີ 4 ພາກ 47 ມາດຕາ ມີຜົນສັກສິດນັບແຕ່ວັນທີ 1 ມັງກອນ 2024 ເປັນຕົ້ນໄປ ມາດຕະການຕໍ່ຜູ້ລະເມີດບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ລະເມີດ ກົດໝາຍ ແລະ ລະບຽບການ ກ່ຽວກັບວຽກງານອາກອນທີ່ດິນ ຈະຖືກສຶກສາອົບຮົມ, ກ່າວເຕືອນ, ລົງວິໄນ, ປັບໃໝ່, ໃຊ້ ແທນຄ່າເສຍຫາຍທາງແພ່ງທີ່ຕົນໄດ້ກໍຂຶ້ນ ຫຼື ຖືກລົງໂທດ ທາງອາຍາ ຕາມກົດໝາຍ. ມາດຕະການປັບໃໝ ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ລະເມີດກົດໝາຍ ແລະ ລະບຽບການ ກ່ຽວກັບການເສຍອາກອນທີ່ດິນ ພາຍຫຼັງໄດ້ມີການກ່າວເຕືອນ ຫຼື ແຈ້ງເຕືອນ ນອກຈາກໃຫ້ເສຍ ອາກອນທີ່ດິນຄົບຖ້ວນ ຍັງຈະຖືກປັບໃໝ ຕາມແຕ່ລະກໍລະນີດັ່ງນີ້: ບໍ່ເສຍອາກອນທີ່ດິນໜຶ່ງປີຜ່ານມາ ຈະຖືກປັບໃໝ ສາມສິບສ່ວນຮ້ອຍ (30%) ຂອງຈໍານວນອາກອນ ທີ່ຕ້ອງເສຍໃນປີນັ້ນ; ບໍ່ເສຍອາກອນທີ່ດິນ ສອງປີຜ່ານມາ ຈະຖືກປັບໃໝ ຫ້າສິບສ່ວນຮ້ອຍ (50%) ຂອງຈໍານວນອາກອນທີ່ຕ້ອງເສຍໃນປີທີ່ສອງນັ້ນ.
ຂ່າວ-ພາບ: ວຽງສະຫວັນ
