ອ້ຽງ ມະຫາໄຊ ນັກສອຍຄິວຊາວໄທ ເອົາຊະນະ ນັກກີລາເພື່ອນຮ່ວມຊາດກໍຄື ໂອ໋ ທ່າຂ້າມ ຈາກແຂວງອຸດອນທານີ ໄປຂາດລອຍ 4-0 ເຟຣມ ໃນນັດຊີງຊະນະເລີດ ຄວ້າແຊັມການແຂ່ງຂັນສະນຸກເກີ 6 ແດງ ລາຍການ ແຮນດີ້ແຄັບ ໂອເພັນ 2024 ຫຼື “Snooker Dengnoy All Star OPEN 2024”.
ເມື່ອວັນທີ 22 ກັນຍາ 2024 ທີ່ໂຕະສະນຸກເກີ ແດງນ້ອຍ ໄດ້ມີການແຂ່ງຂັນຄູ່ຊີງຊະນະເລີດ ການແຂ່ງຂັນ ສະນຸກເກີ 6 ແດງ ລາຍການ ແຮນດີ້ແຄັບ ໂອເພັນ 2024 ຫຼື “Snooker Dengnoy All Star OPEN 2024” ຊີງເງິນລາງວັນລວມ 100 ລ້ານກີບ ພາຍຫຼັງດຳເນີນແຂ່ງຂັນມາແຕ່ວັນທີ 15 ກັນຍາ 2024.
ໂດຍໃຫ້ກຽດເຂົ້າຮ່ວມ ແລະ ມອບລາງວັນມີທ່ານ ສີຈັນ ຈິດຕະປັນຍາ ຮອງຫົວໜ້າກົມກີລາລະດັບສູງ ກະຊວງສຶກສາທິການ ແລະ ກີລາ, ທ່ານ ບຸນມາ ທຳມະວົງ ຫົວໜ້າພະແນກຈັດການແຂ່ງຂັນ ກົມກີລາລະດັບສູງ, ທ່ານ ລິຄິດ ອິນທະວົງ ຮັກສາການສະຫະພັນສະນຸກເກີ-ບິລຽດແຫ່ງຊາດລາວ ແລະ ທ່ານ ຄຳຫຼ້າ ຍົດລືໄຊ ເຈົ້່າຂອງໂຕະ ສະນຸກເກີ ແດງນ້ອຍ ພ້ອມດ້ວຍແຂກຖືກເຊີນ, ຄູຝຶກ ແລະ ນັກກີລາ ຕະຫຼອດຮອດກອງເຊຍເຂົ້າຮ່ວມ.
ລາຍການດັ່ງກ່າວ ຈັດຂຶ້ນ ລະຫວ່າງວັນທີ 15-21 ກັນຍາ 2024 ມີນັກກີລາເຂົ້າຮ່ວມ 120 ກວ່າຄົນ, ໃນນັ້ນ ສະເພາະນັກກີລາຈາກສປປ ລາວ ຫຼາຍກວ່າ 50 ຄົນເຂົ້າຮ່ວມຊີງໄຊ ສຳລັບຄູ່ຊີງຊະນະເລີດ ເປັນການພົບກັນລະຫວ່າງ ອ້ຽງ ມະຫາໄຊ ຈາກນະຄອນຫຼວງບາງກອກ ຣາຊະອານາຈັກໄທ ພົບກັບ ນັກກີລາເພື່ອນຮ່ວມຊາດ ໂອ໋ ທ່າຂ້າມ ຈາກແຂວງອຸດອນທານີ ຜ່ານການແຂ່ງຂັນປະກົດວ່າ ອ້ຽງ ມະຫາໄຊ ອອກຄິວໄດ້ແມ້ນກວ່າໄລ່ເອົາຊະນະ ໂອ໋ ທ່າຂ້າມ ໄປແບບຂາດຮອຍ 4-0 ເຟຣມ ຄວ້າແຊັມ ການແຂ່ງຂັນລາຍການດັ່ງກ່າວໄປຄອງ.
ສົ່ງຜົນໃຫ້ ອ້ຽງ ມະຫາໄຊ ໄດ້ຮັບຂັນແຊັມ ພ້ອມເງິນສົດ 40 ລ້ານກີບ ສ່ວນໂອ໋ ທ່າຂ້າມ ຈາກໄທ ກໍໄດ້ຮັບຂັນ ແລະ ເງິນສົດ 15 ລ້ານກີບ ຂະນະທີ່ ອັນດັບທີ 3 ຮ່ວມ ເປັນຂອງ ເກົາ ສາກົນ ຈາກໄທ ແລະ ເຫຼືອງ ປາກເຊ ຈາກແຂວງຈຳປາສັກ ໄດ້ຮັບເງິນລາງວັນຜູ້ລະ 7 ລ້ານກີບ. ຂະນະທີ່ຜົນງານຂອງມືອັນດັບທ໋ອບ ຂອງລາວ ເປັນຕົ້ນແມ່ນ ສິດທິເດດ ສັກບ່ຽງ ຫຼື ໜຶ່ງເມືອງລາວ ແມ່ນຕົກຮອບ 16 ຄົນສຸດທ້າຍ ໂດຍ ໜຶ່ງ ໃນຖານະເປັນມືວາງອັນດັບທີ 1 ຕ້ອງມີຕໍ່ຄະແນນຄູ່ແຂ່ງຂັນເຖິງ 14 ຄະແນນ.
ພາບ-ຂ່າວ ໂດຍ ສົງການ ພັນແພງດີ
