ກອງປະຊຸມປຶກສາຫາລື ລະຫວ່າງ ລັດຖະມົນຕີອາຊຽນ ແລະ ປະເທດບວກສາມ ຄັ້ງທີ 27 ໄດ້ຈັດຂຶ້ນໃນວັນທີ 22 ກັນຍາ 2024 ທີ່ນະຄອນຫຼວງວຽງຈັນ ສປປ ລາວ ເປັນປະທານຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ແລະ ທ່ານ ລີເຝີຍ ຮອງລັດຖະມົນຕີກະຊວງການຄ້າ ແຫ່ງ ສປ ຈີນ ທ່ານ ໂຢຊິດະ ໂນບຸຈິໂລ ຮອງລັດຖະມົນຕີ ກະຊວງເສດຖະກິດ ການຄ້າ ແລະ ອຸດສາຫະກໍາ ຂອງປະເທດຍີ່ປຸ່ນ ແລະ ທ່ານ ອິງຄຽວ ຊອງ ລັດຖະມົນຕີກະຊວງການຄ້າ ອຸດສາຫະກໍາ ແລະ ພະລັງງານ ແຫ່ງ ສ.ເກົາຫຼີ ມີບັນດາທ່ານລັດຖະມົນຕີອາຊຽນ ທ່ານເລຂາທິການໃຫຍ່ອາຊຽນ ທ່ານລັດຖະມົນຕີກະຊວງການຄ້າ ແລະ ອຸດສາຫະກໍາ ຈາກປະເທດຕີມໍເລສເຕ ແລະ ບັນດາຫົວໜ້າຄະນະຜູ້ແທນຈາກປະເທດສະມາຊິກອາຊຽນ ເຂົ້າຮ່ວມ.
ໂອກາດນີ້ ທ່ານ ມະໄລທອງ ກົມມະສິດ ໄດ້ກ່າວວ່າ: ອາຊຽນ ແລະ ປະເທດບວກສາມ ເປັນຄູ່ຮ່ວມມືທາງດ້ານເສດຖະກິດທີ່ຍາວນານ ແລະ ມີການເຊື່ອມໂຍງທາງການຄ້າ ແລະ ການລົງທຶນທີ່ເຂັ້ມແຂງ ໃນປີ 2023 ການຄ້າດ້ານສິນຄ້າ ລະຫວ່າງ ອາຊຽນ ແລະ ປະເທດບວກສາມ ມີມູນຄ່າ 1.132,8 ຕື້ໂດລາສະຫະລັດ ກວມເອົາ 32,1% ຂອງມູນຄ່າການຄ້າທັງໝົດຂອງອາຊຽນ ເຮັດໃຫ້ປະເທດບວກສາມ ເປັນຄູ່ຄ້າອັນດັບທີ 1 ຂອງອາຊຽນ
ພ້ອມກັນນັ້ນ ມູນຄ່າການລົງທຶນໂດຍກົງ (FDI) ຂອງນັກລົງທຶນ ຈາກປະ ເທດບວກສາມ ຢູ່ບັນດາປະເທດສະມາຊິກອາຊຽນ ມີ 42,8 ຕື້ໂດລາ ກວມເອົາ 18,6% ຂອງມູນຄ່າການລົງທຶນໂດຍກົງຈາກຕ່າງປະເທດ ຢູ່ໃນອາຊຽນ ໃນປີ 2023 ເຮັດໃຫ້ປະເທດບວກສາມ ເປັນອັນດັບທີ 2 ຂອງບັນດາປະເທດທີ່ມີມູນຄ່າການລົງທຶນຫຼາຍຢູ່ໃນອາຊຽນ ຂ້າພະເຈົ້າຫວັງຢ່າງຍິ່ງວ່າ ການເຊື່ອມໂຍງດ້ານການຄ້າ ແລະ ການລົງທຶນ ຂອງພວກເຮົາ ຈະຍິ່ງແໜ້ນແຟ້ນຂຶ້ນຕື່ມ ພາຍຫຼັງທີ່ພວກເຮົາ ຈັດຕັ້ງປະຕິ ບັດບັນດາແຜນການຮ່ວມມືທາງດ້ານເສດຖະກິດ ການຄ້າ ແລະ ການລົງທຶນ ໃນພາກພື້ນຂອງພວກເຮົາ.
ປີຜ່ານມາ ພວກເຮົາໄດ້ມີການປຶກສາຫາລື ໃນຫຼາຍບັນຫາທີ່ຕິດພັນກັບການຮ່ວມມື ລະຫວ່າງ ອາຊຽນ ແລະ ປະເທດບວກສາມ ໃນນັ້ນ ພວກເຮົາໄດ້ປຶກສາຫາລື ກ່ຽວກັບ ແຜນການຮ່ວມມື ເພື່ອສົ່ງເສີມການພັດທະນາເສດຖະກິດ ໃຫ້ມີຄວາມເຂັ້ມແຂງ ແລະ ຍືນຍົງ ມີການນໍາໃຊ້ເຕັກໂນໂລຊີຢ່າງກວ້າງຂວາງ ເຂົ້າໃນວຽກງານການຄ້າ ແລະ ການລົງທຶນ ພ້ອມທັງຂະຫຍາຍຖານການຜະລິດເຂົ້າໃນຕ່ອງໂສ້ການສະໜອງຂອງພາກພື້ນ ແລະ ສາກົນ ນອກຈາກນັ້ນ ພວກເຮົາຍັງຢຶດໝັ້ນ ໃນການຮັກສາລະບົບການຄ້າຫຼາຍຝ່າຍ ໃຫ້ດໍາເນີນໄປຕາມຫຼັກການ ບໍ່ຈໍາແນກ ເປີດກວ້າງ ສະເໝີພາບ ແລະ ໂປ່ງໃສ ເພື່ອບັນລຸເປົ້າໝາຍພື້ນ ຖານຫຼັກການຂອງອົງການການຄ້າໂລກ.
ສະນັ້ນ ເພື່ອສືບຕໍ່ການຮ່ວມມືດັ່ງກ່າວ ກອງປະຊຸມພວກເຮົາໃນມື້ນີ້ ຈະໄດ້ຮັບຟັງການລາຍງານຄວາມຄືບໜ້າຜົນການຈັດຕັ້ງປະຕິບັດແຜນການຮ່ວມມືດ້ານເສດຖະກິດ ໄລຍະປີ 2023-2024 ແລະ ຮັບ ຮອງເອົາແຜນການຮ່ວມມືດ້ານເສດຖະກິດ ໄລຍະປີ 2025-2026. ພ້ອມກັນນັ້ນ, ກອງປະຊຸມ ຈະໄດ້ຮັບຊາບຄວາມຄືບໜ້າຂອງ ການກະກຽມຈັດກອງປະຊຸມຈັບຄູ່ທຸລະກິດຂອງອາຊຽນ ແລະ ປະເທດບວກສາມ ແລະ ການກະກຽມຈັດກອງປະຊຸມສຸດຍອດອາຊຽນ ແລະ ປະເທດບວກສາມ ຄັ້ງທີ 27.
