ທ່ານ ພັທ ສຸລິຍາ ດ້ວງໂພໄຊ ຮອງຫ້ອງສັນຕິບານ ກອງບັນຊາການປ້ອງກັນຄວາມສະຫງົບແຂວງ ຫົວໜ້າຄະນະຄຸ້ມຄອງດ່ານສາກົນປາກຕາພານ ແຂວງສາລະວັນ ໄດ້ເປີດເຜີຍຕໍ່ສື່ມວນຊົນແຂວງ ເມື່ອບໍ່ດົນມານີ້ວ່າ: ດ່ານສາກົນປາກຕາພານ ເປັນຈຸດຍຸດທະຍາດໜຶ່ງທີ່ມີຄວາມສຳຄັນໃນການບໍລິການຜູ້ໂດຍສານ, ນັກທ່ອງທ່ຽວທັງພາຍໃນ, ຕ່າງປະເທດ ແລະ ການຂົນສົ່ງສິນຄ້າລະຫວ່າງປະເທດ, ເຊິ່ງໄລຍະຜ່ານມາໄດ້ລົງເລີກຈັດຕັ້ງປະຕິບັດວຽກງານຢູ່ໃນ 2 ວຽກວິຊາສະເພາະເປັນຫຼັກຄື: ວຽກງານກວດຄົນເຂົ້າ-ອອກເມືອງ, ວຽກພາສີປະຈຳດ່ານ, ປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ຄວາມຮັບຜິດຊອບ ຢ່າງເປັນເຈົ້າການ.
ພາຍຫຼັງໄດ້ເປີດເປັນດ່ານສາກົນຢ່າງທາງການແລ້ວ ໃນວັນທີ 6 ກັນຍາຜ່ານມານີ້, ໄດ້ມີຄວາມພ້ອມໃຫ້ການບໍລິການ, ເອື້ອອໍານວຍຄວາມສະດວກຫຼາຍດ້ານ ຕາມມາດຖານເງື່ອນໄຂຂອງດ່ານສາກົນ ແລະ ສະພາບຄວາມເປັນຈິງຂອງທ້ອງຖິ່ນ ໂດຍສະເພາະດ້ານການປະກອບບຸກຄະລາກອນ, ເຈົ້າໜ້າທີ່ຮັບຜິດຊອບດ້ານເຕັກນິກຕ່າງໆ ແມ່ນໄດ້ຮັບການຝຶກອົບຮົມ, ດ້ານອາຄານສະຖານທີ່ກໍໄດ້ຮັບການກໍ່ສ້າງ ແລະ ປັບປຸງ. ອຸປະກອນເຕັກນິກຮັບໃຊ້ຕ່າງໆທີ່ຈະນໍາໃຊ້ເຂົ້າໃນການຄຸ້ມຄອງການເຂົ້າ-ອອກຂອງພົນລະເມືອງ, ຄຸ້ມຄອງການຂົນສົ່ງສິນຄ້າຜ່ານດ່ານ, ສາງຄຽນຖ່າຍສິນຄ້າ, ຄີວລົດໂດຍສານ, ຕິດຊັ່ງນ້ຳໜັກ, ເຄື່ອງກວດລັງສີ, ທ່າບັກ ແລະ ດ້ານອື່ນໆ ກໍກຽມພ້ອມຈັດຕັ້ງປະຕິບັດ. ໄລຍະຜ່ານມາ, ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ດ້ວຍຄວາມຮັບຜິດຊອບ ແລະຄວາມເປັນເຈົ້າການ ຕາມລະບຽບຫຼັກການ ໂດຍສະເພາະກົດໝາຍວ່າດ້ວຍການເຂົ້າອອກ ແລະ ຄຸ້ມຄອງຄົນຕ່າງປະເທດຢູ່ ສປປ ລາວ ເລກທີ 59/ສພຊ, ລົງວັນທີ 26 ທັນວາ 2014, ດໍາລັດເລກທີ 21/ລບ ແລະບັນດາຄໍາແນະນໍາ, ແຈ້ງການຕ່າງໆ ຂອງຂັ້ນເທິງ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານຢ່າງເຂັ້ມງວດ.
ທ່ານ ພັທ ສຸລິຍາ ດ້ວງໂພໄຊ ໄດ້ກ່າວຕີ່ມວ່າ: ໄລຍະ 1 ປີຜ່ານມານີ້ ສາມາດກວດຄົນເຂົ້າ-ອອກເມືອງ ທັງຄົນລາວ ແລະ ຕ່າງປະເທດ ຈໍານວນທັງໝົດ 51.608 ຄົນ, ຍິງ 27.601 ຄົນ, ເດັກ 820 ຄົນ, ວຽກພາສີປະຈຳດ່ານ ໄດ້ເອົາໃຈໃສ່ກວດກາການນໍາເຂົ້າ-ສົ່ງອອກສິນຄ້າປະເພດຕ່າງໆ. ມາຮອດປັດຈຸບັນ, ສາມາດເກັບລາຍຮັບໄດ້ທັງໝົດ 968 ລ້ານກວ່າກີບ ເທົ່າກັບ 48,41% ແຜນການປີ. ຕໍ່ກັບການນະໂຍບາຍ ໃຫ້ພໍ່ແມ່ປະຊາຊົນໃນເຂດດັ່ງກ່າວ ທີ່ມີຄວາມຈຳເປັນເຊັ່ນ: ໄປປິ່ນປົວພະຍາດ, ກວດພະຍາດ, ເຈັບເປັນກະທັນຫັນຢູ່ປະເທດໄທ ທັງຮີບດ່ວນ ແລະ ບໍ່ຮີບດ່ວນ ໂດຍບໍ່ໄດ້ຈຳກັດເວລາການເຂົ້າ-ອອກ ຕາມໂມງເວລາຂອງການເປີດ-ປິດ ແລະ ປະຕິບັດຕາມລະບຽບຫຼັກການທີ່ກໍານົດໄວ້ໃນນະໂຍບາຍ.
ປັດຈຸບັນນີ້, ດ່ານສາກົນປາກຕາພານ ເມືອງລະຄອນເພັງໄດ້ມີການຕິດຕັ້ງບັນດາອຸປະກອນທີ່ສໍາຄັນ ແລະ ທັນສະໄໝ ເປັນຕົ້ນ: ຕິດຕັ້ງລະບົບເອເລັກໂຕຣນິກ ບ53 ແບບໃໝ່ ເພື່ອຄຸ້ມຄອງພາຫະນະນໍາທ່ຽວ, ພາຫະນະຂົນສົ່ງສິນຄ້າ ລະບົບດັ່ງກ່າວ ຈະສະດວກ ວ່ອງໄວ, ໂປ່ງໃສ ສາມາດຄຸ້ມຄອງລາຍຮັບໃນຂະແໜງ ພາສີ ຈາກຄ່າທຳນຽມຕ່າງໆເປັນຕົ້ນ: ແມ່ນບັກສໍາລັບບໍລິການຂົນສົ່ງສິນຄ້າທາງນ້ຳ. ນອກນັ້ນ, ກໍໄດ້ມີການປະກອບດ້ານບຸກຄະລາກອນແຕ່ລະຂະແໜງການ ເປັນຕົ້ນ: ຂະແໜງການວິຊາສະເພາະຫຼັກ ແລະ ມີຂະແໜງ ການອື່ນໆ ໂດຍອິງໃສ່ຄວາມຈໍາເປັນໃນການຈັດຕັ້ງປະຕິບັດໜ້າທີ່ວິຊາສະເພາະປະຈຳດ່ານ, ມີພະນັກງານທັງໝົດ 55 ຄົນ.
ທ່ານຍັງໄດ້ກ່າວໃຫ້ຮູ້ອີກວ່າ: ເພື່ອຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ, ເຈົ້າໜ້າທີ່ປະຈໍາດ່ານກໍໄດ້ເອົາໃຈໃສ່ເຜີຍແຜ່ກົດໝາຍ, ລະບຽບຫຼັກການ, ການເຂົ້າ-ອອກເມືອງ ແລະ ຄຸ້ມຄອງຄົນຕ່າງປະເທດ ຢູ່ ສປປ ລາວ ແລະ ນິຕິກໍາອື່ນໆ ໃຫ້ພໍ່ແມ່ປະຊາຊົນທີ່ມາໃຊ້ບໍລິການ ໄດ້ຮັບຮູ້, ເຂົ້າໃຈຢ່າງທົ່ວເຖີງ ແນໃສ່ເພື່ອຄວາເປັນລະບຽບຮຽບຮ້ອຍ ແລະ ເຄົາລົບລະບຽບກົດໝາຍ, ທັງມີການຈັດຕັ້ງປ້ອງກັນ ເວນຍາມ, ປະຈຳການ ຈັດຕັ້ງປະຕິບັດເຄື່ອນໄຫວ ອອກກວດ, ລາດຕະເວນຕາມຂອບເຂດຊາຍແດນທີ່ຮັບຜິດຊອບ ສາມາດຮັກສາໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍ ໂດຍພື້ນຖານ.
(ຂ່າວ-ພາບ: ວິໄລວອນ ສິດທິໄຊ)
