ການແຂ່ງຂັນປິ່ງປ່ອງເຍົາວະຊົນ-ຊາວໜຸ່ມໂລກ 2024 ຫຼື WTT youth contender 2024 ຈັດຂຶ້ນເປັນປີທີ 2 ຕິດຕໍ່ກັນ ທີ່ສູນການຄ້າ ລາວ-ໄອເຕັກ ໃນນະຄອນຫຼວງວຽງຈັນ ສປປ ລາວ ໂດຍປີນີ້ມີເຖິງ 14 ປະເທດເຂົ້າຮ່ວມຊີງໄຊ ປາກົດວ່າ: ໄຕ້ຫວັນ ຄວ້າແຊັມ 9 ລາຍການ ຄອງແຊັມໄດ້ຫຼາຍລາຍການທີ່ສຸດ ເປັນສະໄໝທີ 2 ຕິດຕໍ່ກັນ.
ເມື່ອວັນທີ 21 ກັນຍາ 2024 ເປັນມື້ສຸດທ້າຍຂອງການແຂ່ງຂັນ ຫຼັງຈາກໄດ້ດໍາເນີນການແຂ່ງຂັນມາຕັ້ງແຕ່ວັນທີ 18 ກັນຍາ 2024 ໃຫ້ກຽດເຂົ້າຮ່ວມມອບລາງວັນມີ ທ່ານ ນາງ ວຽງເງິນ ໄຂຄຳພິທູນ ພັນລະຍາ ຮອງນາຍົກລັດຖະມົນຕີ, ທີ່ປຶກສາກິຕິມະສັກຂອງງານຄັ້ງນີ້, ທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ນາງ ແສງເດືອນ ຫລ້າຈັນທະບູນ ປະທານສະຫະພັນກີລາປິ່ງປ່ອງແຫ່ງຊາດ, ພ້ອມດ້ວຍຄະນະຮັບຜິດຊອບຈັດການແຂ່ງຂັນ ແລະ ຜູ້ໃຫ້ການສະໜັບສະໜູນ ຕະຫຼອດຮອດສື່ມວນຊົນ, ຄູຝຶກ ແລະ ນັກກີລາເຂົ້າຮ່ວມຢ່າງພ້ອມພຽງ.
ຜ່ານການແຂ່ງຂັນມື້ສຸດທ້າຍປາກົດວ່າ:
-ປະເພດຍິງດ່ຽວ ອາຍຸບໍ່ເກີນ 11 ປີ ແຊັມໄດ້ແກ່ Liao Yu Ching ຈາກໄຕ້ຫວັນ ຊະນະ Wang Yu Ching ຈາກທີມດຽວກັນ 3-1 ເກມ: 11-5, 11-9, 10-12, 11-7, ອັນດັບ 3 ຮ່ວມ: ນັກກີລາຈາກອິນເດຍ ແລະ ມາເລເຊຍ. ສ່ວນນັກກີລາລາວ 4 ຄົນບໍ່ຜ່ານຮອບແບ່ງກຸ່ມ.
-ປະເພດຊາຍດ່ຽວ ອາຍຸບໍ່ເກີນ 11 ປີ ແຊັມເປັນຂອງ Wen Han Sen ຈາກໄຕ້ຫວັນ ຊະນະ Neo Cheng Ming ຈາກສິງກະໂປ 3-1 ເກມ: 11-8, 11-5, 8-11, 11-4, ທີ 3 ຮ່ວມ: ນັກກີລາຈາກສິງກະໂປ ແລະ ໄທ. ສ່ວນນັກກີລາລາວ 7 ຄົນບໍ່ຜ່ານຮອບແບ່ງກຸ່ມ.
-ປະເພດຍິງດ່ຽວ ອາຍຸບໍ່ເກີນ 15 ປີ ຊະນະເລີດ Liao Yixuan ຈາກໄຕ້ຫວັນ ຊະນະ Fong Tsz Kiu ຈາກຮົງກົງ 3-1 ເກມ: 11-9, 3-11, 11-5, 12-10, ອັນດັບ 3 ຮ່ວມ: ນັກກີລາຈາກໄຕ້ຫວັນ ແລະ ຮົງກົງ. ສ່ວນນັກກີລາລາວ 7 ຄົນ ດີສຸດແມ່ນ ເພັດສະໄໝ ກິຍະວົງ ເຂົ້າຮອບ 16 ຄົນສຸດທ້າຍ ແຕ່ເສຍໃຫ້ນັກກີລາຫວຽດນາມ 0-3 ເກມ: 9-11, 9-11, 8-11.
-ປະເພດຊາຍດ່ຽວ ອາຍຸບໍ່ເກີນ 15 ປີ ແຊັມເປັນຂອງ Huang Pei-Yu ຈາກໄຕ້ຫວັນ ຊະນະ Chuang Chung Yen ຈາກທີມດຽວກັນ 3-0 ເກມ: 11-8, 11-7, 11-6, ອັນດັບ 3 ຮ່ວມ: ນັກກີລາຈາກໄຕ້ຫວັນ. ສຳລັບນັກກີລາລາວ 10 ກວ່າຄົນ ດີສຸດເຂົ້າຮອບ 32 ຄົນສຸດທ້າຍ 2 ຄົນຄື: ສຸກພະໂຊກ ສຸພາວົງ ເສຍໃຫ້ນັກກີລາຫວຽດນາມ 1-3 ເກມ ແລະ ສູນທະລາ ດວງເດດມີໄຊ ເສຍໃຫ້ນັກກີລາຈາກຫວຽດນາມ 0-3 ເກມ.
-ປະເພດຍິງດ່ຽວ ອາຍຸບໍ່ເກີນ 19 ປີ ແຊັມແມ່ນ Wu Jia En ຈາກໄຕ້ຫວັນ ຊະນະ Su Tsz Tung ຈາກຮົງກົງ 3-0 ເກມ: 11-9, 12-10, 11-8, ທີ 3 ຮ່ວມ: ນັກກີລາຈາກໄຕ້ຫວັນ. ນັກກີລາລາວ 3 ຄົນ ບໍ່ຜ່ານຮອບແບ່ງກຸ່ມ.
-ປະເພດຊາຍດ່ຽວ ອາຍຸບໍ່ເກີນ 19 ປີ ແຊັມເປັນຂອງ Kwon Hyuk ຈາກສາທາລະນະລັດເກົາຫລີ ຊະນະ Hung Jia kai ຈາກໄຕ້ຫວັນ 3-0 ເກມ: 11-5, 11-8, 11-8, ອັນດັບ 3 ຮ່ວມ: ນັກກີລາຈາກສາທາລະນະລັດເກົາຫລີ ແລະ ໂຄລົມເບຍ (ໂຄໂລມບີ). ສຳລັບນັກກີລາລາວ 5 ຄົນ ບໍ່ຜ່ານຮອບແບ່ງກຸ່ມ.
ສະຫລຸບການແຂ່ງຂັນ 4 ວັນ ຊິງໄຊ 12 ລາຍການ: ຍິງດ່ຽວ-ຊາຍດ່ຽວ ອາຍຸບໍ່ເກີນ 11 ປີ, ບໍ່ເກີນ 13 ປີ, ບໍ່ເກີນ 15 ປີ, ບໍ່ເກີນ 17 ປີ, ບໍ່ເກີນ 19 ປີ, ຄູ່ປະສົມ ອາຍຸບໍ່ເກີນ 15 ປີ ແລະ ບໍ່ເກີນ 19 ປີ. ນັກກີລາໄຕ້ຫວັນໄດ້ແຊັມ 9 ລາຍການ ຮອງແຊັມ 3 ລາຍການ ແລະ ອັນດັບສາມ 9 ລາຍການ ຄອງອັນດັບ 1 ເປັນປີທີ 2 ຕິດຕໍ່ກັນ.
ຂະນະທີ່ ອັນດັບທີ 2 ສາທາລະນະລັດເກົາຫລີ ໄດ້ແຊັມ 2 ລາຍການ, ອັນດັບສາມ 3 ລາຍການ, ທີ 3 ຮົງກົງ ໄດ້ແຊັມ 1 ລາຍການ ຮອງແຊັມ 2 ລາຍການ ແລະ ອັນດັບສາມ 5 ລາຍການ, ທີ 4 ສິງກະໂປ ໄດ້ທີສອງ 1 ລາຍການ ແລະ ທີສາມ 1 ລາຍການ ແລະ ທີ 5 ຫວຽດນາມ ໄດ້ອັນດັບສາມ 2 ລາຍການ ແລະ ທີ 6 ຮ່ວມ : ໂຄລົມບີ, ອິນເດຍ, ມາເລເຊຍ ແລະ ໄທ ໄດ້ທີ 3 ຊາດລະ 1 ລາຍການ.
ຫຼັງຈົບການແຂ່ງຂັນ ນາງ ແສງເດືອນ ຫຼ້າຈັນທະບູນ ປະທານສະຫະພັນກີລາປິ່ງປ່ອງແຫ່ງຊາດ, ປະທານ ຄະນະກຳມະການຈັດງານແຂ່ງຂັນກີລາປິ່ງປ່ອງຊາວໜຸ່ມເຍົາວະຊົນໂລກ 2024 ໃຫ້ສໍາພາດວ່າ: ຕ້ອງຂໍຂອບໃຈຫຼາຍພາກສ່ວນ ແລະ ຜູ້ສະໜັບສະໜູນຕ່າງທີ່ເຮັດໃຫ້ການແຂ່ງຂັນໃນປີນີ້ສໍາເລັດໄປຢ່າງຈົບງາມ ແລະ ດີກວ່າປີທີ່ຜ່ານມາ ຈົນເຮັດໃຫ້ສະຫະພັນກີລາປິ່ງປ່ອງໂລກ ທາບທາມມາໃຫ້ເປັນເຈົ້າພາບໃນປີ 2025 ຕໍ່ ແນ່ນອນພວກເຮົາຈະນໍາເອົາໄປພິຈາລະນາກ່ອນ ວ່າຈະສາມາດຈັດໃນປີໜ້າໄດ້ຫຼືບໍ?.
ຂ່າວ-ຮູບຈາກ: Larh Creators
