ພິທີເປີດໂຕດັດຊະນີນະໂຍບາຍ ທຸລະກິດຂະໜາດກາງ ແລະ ຂະ ໜາດນ້ອຍ (SME) 2024ມີຂຶ້ນໃນວັນທີ 20 ກັນຍາ 2024 ທີ່ໂຮງແຮມຄາວພາຊ້າ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ມະໄລທອງ ກົມມະສິດ ລັດຖະມົນຕີກະ ຊວງອຸດສາຫະກຳແລະການຄ້າ (ອຄ), ມີລັດຖະມົນຕີເສດຖະກິດອາຊຽນ, ທ່ານ Satvinder Singh ຮອງເລຂາທິການໃຫຍ່ອາຊຽນ ເພື່ອປະຊາຄົມເສດຖະກິດອາຊຽນ, ທ່ານ ສຈ. Tetsuya Watanabe ປະທານສະຖາບັນຄົ້ນຄວ້າເສດຖະກິດອາຊຽນ ແລະ ອາຊີຕາ ເວັນອອກ (ERIA) ແລະ ບັນດາຜູ້ ແທນຈາກພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ມະໄລທອງ ກົມມະສິດ ກ່າວວ່າ: ການເປີດໂຕດັດຊະນີນະໂຍບາຍ ທຸລະກິດ SMEs ອາຊຽນ 2024ນີ້ແມ່ນເຫດການສໍາຄັນ ທີ່ໄດ້ຈັດຂຶ້ນຂ້າງຄຽງຄູ່ກັບກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 55ເພື່ອເປັນຂີດໝາຍສະເຫຼີມສະຫຼອງຄວາມສຳຄັນ ຂອງການສະໜັບສະໜຸນ SME ໃຫ້ແກ່ເສດຖະກິດພາກພື້ນອາຊຽນ. ດັດຊະນີນະໂຍບາຍ ທຸລະກິດ SMEs ຫຼື MSMEs ແມ່ນກະດູກສັນຫຼັງຂອງເສດຖະກິດອາຊຽນ. ໃນພາກພື້ນອາຊຽນມີ SMEs 70ລ້ານກວ່າແຫ່ງ, ກວມເອົາ 97-99% ຂອງການປະກອບການທັງໝົດ, ສ້າງລາຍຮັບໄດ້ ປະມານເຄິ່ງໜຶ່ງຂອງ GDP ຂອງອາຊຽນ, ກວມເອົາ 20% ຂອງການສົ່ງອອກທັງໝົດ ແລະ ສ້າງວຽກເຮັດງານທຳໃຫ້ຫຼາຍກວ່າ 80% ຂອງ 180 ລ້ານຕໍາແໜ່ງ. ສະແດງໃຫ້ເຫັນເຖິງບົດບາດສຳຄັນຂອງ SME ໃນການປະກອບສະໜັບສະໜຸນຄວາມນະເລີນຮຸ່ງເຮືອງຂອງອາຊຽນ.
ເພື່ອເສີມຂະຫຍາຍບົດບາດດັ່ງກ່າວ, ແຜນປະຕິບັດງານຍຸດທະສາດ ກ່ຽວກັບການພັດ ທະນາ SME (SAPSMED) 2016-2025 ໄດ້ຮັບການພັດທະນາ. ໂຄງການສໍາຄັນຕ່າງໆໄດ້ຖືກຈັດຕັ້ງປະຕິບັດ ພາຍໃຕ້ການຮ່ວມ ມື ແລະ ການສະຫນັບສະໜູນຈາກຄູ່ຮ່ວມຍຸດທະສາດຂອງພວກເຮົາ ເພື່ອແນໃສ່ສ້າງຄວາມເຂັ້ມແຂງໃຫ້ແກ່ SMEs ຂອງອາຊຽນນັບແຕ່ການເຂົ້າເຖິງດ້ານການເງິນ, ການເຂົ້າເຖິງຕະຫຼາດ ແລະການເປັນສາກົນ, ການຍົກ ສູງປະສິດທິຜົນ, ການພັດທະນາຜູ້ປະກອບການ ລວມເຖິງມຸມມອງຂອງການເປັນມິດຕໍ່ສິ່ງແວດລ້ອມ ແລະ ການຮ່ວມກຸ່ມ.
ສື່ສິ່ງພິມນີ້ ເຮັດໃຫ້ເຮົາຮູ້ເຖິງເຫດການສໍາຄັນ ທີ່ບັນລຸໄດ້ໃນການສົ່ງເສີມ SME ໃນຊ່ວງ 6 ປີຜ່ານມາ ແລະ ບາງຊ່ອງວ່າງ ທີ່ຕ້ອງໄດ້ຮັບການປັບປຸງເພີ່ມຕື່ມ ໂດຍສະເພາະຢ່າງຍິ່ງ ການອໍານວຍຄວາມສະດວກໃນການຟື້ນຕົວຈາກໂລກລະບາດແລະ ການປັບ ປຸງປະສິດທິພາບທາງທຸລະກິດໃນຊ່ວງເສດ ຖະກິດໂລກມີຄວາມສັບສົນ, ລະບົບຕ່ອງໂສ້ການສະໜອງທົ່ວໂລກ ແລະ ຄວາມເຄັ່ງຕຶງທາງດ້ານພູມສາດ.
ຈາກການປະເມີນທີ່ລະອຽດຢູ່ໃນ ASPI, ຄະນະກຳມາທິການອາຊຽນ, ພາກສ່ວນກ່ຽວ ຂ້ອງ ແລະ ບັນດາຄູ່ຮ່ວມພັດທະນາ ສາມາດສ້າງນະໂຍບາຍ ທີ່ຄົບຖ້ວນ ແລະ ມີປະສິດ ທິພາບຫຼາຍຂຶ້ນ ທີ່ກ່ຽວຂ້ອງກັບການເພີ່ມປະສິດທິພາບຂອງການນຳໃຊ້ພື້ນຖານໂຄງລ່າງທີ່ມີຢູ່, ລວມທັງປະສົບການ, ຄວາມຮູ້ດ້ານການຜະລິດ ແລະ ລະບົບການຂົນສົ່ງສຳເລັດຮູບ ເພື່ອຮັບປະກັນຄວາມເຂັ້ມແຂງຂອງ SME.
ຫວັງຢ່າງຍິ່ງວ່າ ASPI 2024 ຈະຖືກນຳໃຊ້ເປັນເອກະສານອ້າງອີງ ທີ່ເປັນຮູບປະທໍາ ເພື່ອແນໃສ່ສ້າງນະໂຍບາຍສົ່ງເສີມ SME ທັງໃນລະດັບຊາດ ແລະ ພາກພື້ນ ແລະ ຫວັງວ່າ ຈະໄດ້ຮັບຮູ້ຜົນສຳເລັດອັນໃຫຍ່ຫຼວງຂອງການສົ່ງເສີມ SME ໃນອາຊຽນ ໃນ ASPI ສະບັບຕໍ່ໄປ.
