ກອງປະຊຸມປຶກສາຫາລື ລະຫວ່າງ ລັດຖະມົນຕີເສດຖະກິດອາຊຽນ-ອົດສະຕາລີ ແລະ ນິວຊີແລນ ຄັ້ງທີ 29 ຈັດຂຶ້ນໃນວັນທີ 21 ກັນຍາ 2024 ທີ່ໂຮງແຮມ ແລນມາກ ນະະຄອນຫຼວງວຽງຈັນ, ສປປ ລາວ ເປັນປະທານຂອງ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ສປປລາວ ເຂົ້າຮ່ວມມີ ທ່ານ ທິມ ແອ(Tim Ayres) ຜູ້ຊ່ວຍລັດຖະມົນຕີ ກະຊວງການຄ້າຂອງອົດສະຕາລີ ແລະ ທ່ານ ນາງ ນິໂຄລາ ກຣິກ (Nicola Grigg) ລັດຖະມົນຕີ ກະຊວງການຄ້າ ຂອງນິວຊີແລນ ໃນນາມປະທານຮ່ວມບັນດາທ່ານ ລັດຖະມົນຕີເສດຖະກິດອາຊຽນ, ທ່ານ ເລຂາທິການໃຫຍ່ອາຊຽນ, ທ່ານລັດຖະມົນຕີ ກະຊວງການຄ້າ ແລະ ອຸດສາຫະກໍາ ຈາກປະເທດຕີມໍເລດສເຕ ແລະ ບັນດາຫົວໜ້າຄະນະຜູ້ແທນຈາກປະເທດສະມາຊິກອາຊຽນ
ທ່ານ ມະໄລທອງ ກົມມະສິດໄດ້ກ່າວວ່າ: ອາຊຽນ ແລະ ປະເທດ CER ເປັນຄູ່ຮ່ວມມືທາງເສດຖະກິດທີ່ຍາວນານ ແລະ ນັບມື້ນັບເຂັ້ມແຂງ. ໃນປີ 2023 ການຄ້າດ້ານສິນຄ້າ ລະຫວ່າງ ອາຊຽນ ແລະ ອົດສະຕາລີ ມີມູນຄ່າ 94,4 ຕື້ໂດລາສະຫະລັດ, ກວມເອົາ 2,7% ຂອງມູນຄ່າການຄ້າທັງໝົດຂອງອາຊຽນ, ການຄ້າດ້ານສິນຄ້າ ລະຫວ່າງ ອາຊຽນ ແລະ ນິວຊີແລນ ມີມູນຄ່າ 12,7 ຕື້ໂດລາສະຫະລັດ, ກວມເອົາ 0,4% ຂອງມູນຄ່າການຄ້າທັງໝົດຂອງອາຊຽນ.
ພ້ອມກັນນັ້ນ, ມູນຄ່າການລົງທຶນໂດຍກົງ (FDI) ຂອງນັກລົງທຶນ ຈາກ ປະເທດ ອົດສະຕາລີ ຢູ່ບັນດາປະເທດສະມາຊິກອາຊຽນ ບັນລຸໄດ້ 1,6 ຕື້ໂດລາສະຫະລັດ, ກວມເອົາ 0,7% ຂອງມູນຄ່າການລົງທຶນໂດຍກົງຈາກຕ່າງປະເທດ ຢູ່ໃນອາຊຽນ ໃນປີ 2023, ມູນຄ່າການລົງທຶນໂດຍກົງຂອງນັກລົງທຶນ ຈາກປະເທດນິວຊີແລນ ຢູ່ບັນດາປະເທດສະມາ ຊິກອາຊຽນ ບັນລຸໄດ້ 13,5 ລ້ານໂດລາສະຫະລັດ, ກວມເອົາ 0,01% ຂອງມູນຄ່າການລົງທຶນໂດຍກົງຈາກຕ່າງປະເທດ ຢູ່ໃນອາຊຽນ ໃນປີດຽວກັນ.
ທ່ານກ່າວວ່າ: ການເຊື່ອມໂຍງດ້ານການຄ້າ ແລະ ການລົງທຶນ ຂອງພວກເຮົາຈະຍິ່ງແໜ້ນແຟ້ນຂຶ້ນຕື່ມ ພາຍຫຼັງທີ່ພວກເຮົາ ຈັດຕັ້ງປະຕິບັດສັນຍາການຄ້າເສລີອາຊຽນ-ອົດສະຕາລີ-ນິວຊີແລນ ສະບັບປັບປຸງ.
ປີຜ່ານມາ ພວກເຮົາໄດ້ປຶກສາຫາລືຫຼາຍບັນຫາທີ່ຕິດພັນກັບການຮ່ວມມື ລະຫວ່າງ ອາຊຽນ, ອົດສະຕາລີ ແລະ ນິວຊີແລນ ເຊິ່ງໃນນັ້ນ ພວກເຮົາ ໄດ້ປຶກສາຫາລືກ່ຽວກັບ ການປັບປຸງສັນຍາການຄ້າເສລີອາຊຽນ-ອົດສະຕາລີ-ນິວຊີແລນ, ແນໃສ່ເພື່ອຍົກລະດັບສັນຍາດັ່ງກ່າວ ໃຫ້ມີຄວາມທັນສະໄໝ ແລະ ສາມາດເຊື່ອມໂຍງທັງສອງພາກພື້ນເຂົ້າໃນຕ່ອງໂສ້ການສະໜອງ ຫຼາຍຂຶ້ນ.
ນອກຈາກນັ້ນ, ພວກເຮົາ ໄດ້ແລກປ່ຽນທັດສະນະ ຕໍ່ກັບ ຜົນຂອງກອງປະຊຸມປຶກສາຫາລືການເຊື່ອມໂຍງເສດຖະກິດ ລະຫວ່າງພາກພື້ນຂອງພວກເຮົາ ໂດຍສະເພາະການຊຸກຍູ້ ແລະ ການອໍານວຍຄວາມສະດວກ ໃຫ້ແກ່ວິສາຫະກິດຂະໜາດນ້ອຍ ແລະ ກາງ ໃຫ້ມີສ່ວນຮ່ວມໃນການຄ້າ ແລະ ການລົງທຶນ ລະຫວ່າງສອງພາກພື້ນຂອງພວກເຮົາ ໃຫ້ນັບມື້ນັບເພີ່ມຂຶ້ນ.
ເພື່ອສືບຕໍ່ການຮ່ວມມືດັ່ງກ່າວ, ກອງປະຊຸມພວກເຮົາໃນມື້ນີ້ ຈະໄດ້ເນັ້ນໃສ່ ແລກປ່ຽນທັດສະນະ ກ່ຽວກັບ ການກະກຽມຈັດຕັ້ງປະຕິບັດສັນຍາການຄ້າເສລີອາຊຽນ-ອົດສະຕາລີ-ນິວຊີແລນ ສະບັບປັບປຸງ ເຊິ່ງເປັນໜຶ່ງໃນແຜນວຽກບູລິມະສິດ ສໍາລັບປີນີ້ ແລະ ການທົບທວນຄືນການຈັດຕັ້ງປະຕິບັດແຜນວຽກການຮ່ວມມືທາງເສດຖະກິດ ເພື່ອສະໜັບສະໜູນການຈັດຕັ້ງປະຕິບັດສັນຍາດັ່ງກ່າວ. ພ້ອມກັນນັ້ນ, ກອງປະຊຸມ ຈະໄດ້ຮັບຊາບ ຜົນຂອງກອງປະຊຸມປຶກສາຫາລືການເຊື່ອມໂຍງເສດຖະກິດ ລະຫວ່າງອາຊຽນ-ອົດສະຕາລີ ແລະ ນິວຊີແລນ ທີ່ໄດ້ຈັດຂຶ້ນໃນເດືອນພຶດສະພາ ປີນີ້ ທີ່ອົກແລນ ປະເທດນິວຊີແລນ.
