ກອງປະຊຸມປຶກສາຫາລື ລະຫວ່າງ ລັດຖະມົນຕີເສດຖະກິດອາຊຽນ ແລະ ການາດາ ຄັ້ງທີ 13 ຈັດຂຶ້ນໃນວັນທີ 20 ກັນຍາ 2ນ24 ທີ່ນະະຄອນຫລວງວຽງຈັນ, ສປປ ລາວ ເປັນປະທານຂອງ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ສປປລາວ, ທ່ານ ເມຣີ ແອັງ ລັດຖະມົນຕີ ກະຊວງສົ່ງເສີມການສົ່ງອອກ, ການຄ້າ ແລະ ການພັດທະນາເສດຖະກິດ ຂອງການາດາ, ມີບັນດາທ່ານລັດຖະມົນຕີເສດຖະກິດອາຊຽນ, ທ່ານເລຂາທິການໃຫຍ່ອາຊຽນ, ທ່ານລັດຖະມົນຕີ ກະຊວງການຄ້າ ແລະ ອຸດສາຫະກໍາ ຈາກປະເທດຕີມໍເລດສເຕ ແລະ ບັນດາຜູ້ແທນທີ່ເຂົ້າຮ່ວມ.
ທ່ານ ມະໄລທອງ ກົມມະສິດກ່າວວ່າ: ອາຊຽນ ແລະ ການາດາ ເປັນຄູ່ຮ່ວມມືທາງດ້ານເສດຖະກິດທີ່ຍາວນານ ແລະ ນັບມື້ນັບເຂັ້ມແຂງ. ໃນປີ 2023, ການຄ້າດ້ານສິນຄ້າ ລະຫວ່າງ ອາຊຽນ ແລະ ການາດາ ມີມູນຄ່າ 20,3 ຕື້ໂດລາສະຫະລັດ, ກວມເອົາ 0,6% ຂອງມູນຄ່າການຄ້າທັງໝົດຂອງອາຊຽນ, ເຮັດໃຫ້ ການາດາ ເປັນຄູ່ຄ້າອັນດັບທີ 27 ຂອງອາຊຽນ. ພ້ອມກັນນັ້ນ, ມູນຄ່າການລົງທຶນໂດຍກົງ (FDI) ຂອງນັກລົງທຶນ ຈາກ ປະເທດການາດາ ຢູ່ບັນດາປະເທດສະມາຊິກອາຊຽນ ມີປະມານ 3,4 ຕື້ໂດລາສະຫະລັດ, ກວມເອົາ 1,5%ຂອງມູນຄ່າການລົງທຶນໂດຍກົງຈາກຕ່າງປະເທດ ຢູ່ໃນອາຊຽນ ໃນປີ 2023, ເຮັດໃຫ້ ການາດາ ເປັນອັນດັບທີ 14ຂອງບັນດາປະເທດທີ່ມີມູນຄ່າການລົງທຶນຫຼາຍຢູ່ໃນອາຊຽນ.
ທ່ານກ່າວວ່າ: ປີຜ່ານມາ ພວກເຮົາໄດ້ມີການປຶກສາຫາລື ໃນຫຼາຍບັນຫາທີ່ຕິດພັນກັບການຮ່ວມມື ລະຫວ່າງ ອາຊຽນ ແລະ ການາດາ ເຊິ່ງໃນນັ້ນ ພວກເຮົາ ໄດ້ປຶກສາຫາລືເນື້ອໃນສັນຍາການຄ້າເສລີອາຊຽນ-ການາດາ ເພື່ອໃຫ້ບັນລຸຕາມເປົ້າໝາຍ ໄລຍະເວລາທີ່ກໍານົດໄວ້ ແລະ ນໍາມາຊຶ່ງຜົນປະໂຫຍດທາງເສດຖະກິດໃຫ້ແກ່ທັງສອງພາກພື້ນ.ພວກເຮົາ ໄດ້ແລກປ່ຽນຄໍາເຫັນ ກ່ຽວກັບການຮັກສາລະບົບການຄ້າຫຼາຍຝ່າຍ ໃຫ້ດໍາເນີນໄປຕາມຫຼັກການ ເພື່ອສ້າງຕະຫຼາດທີ່ຍຸດຕິທໍາ ແລະ ເປີດກວ້າງ.
ນອກຈາກນັ້ນ, ພວກເຮົາ ໄດ້ຮັບຊາບ ຄວາມຄືບໜ້າຂອງການຈັດຕັ້ງປະຕິບັດແຜນວຽກຂອງກອງທຶນຮ່ວມອາຊຽນ-ການາດາ ໃນປີ 2023ເພື່ອເພີ່ມທະວີສາຍພົວພັນຂອງທັງສອງພາກພື້ນ ໃນ 03 ເສົາຄໍ້າປະຊາຄົມອາຊຽນ ທີ່ໄດ້ກໍານົດໄວ້ໃນແຜນຮ່ວມມືຂອງພວກເຮົາ.
5. ສະນັ້ນ, ເພື່ອສືບຕໍ່ການຮ່ວມມືດັ່ງກ່າວ, ກອງປະຊຸມພວກເຮົາໃນມື້ນີ້ ຈະໄດ້ເນັ້ນໃສ່ ແລກປ່ຽນທັດສະນະ ກ່ຽວກັບ ການພັດທະນາເສດຖະກິດໃນພາກພື້ນ ແລະ ສາກົນ, ທົບທວນຄືນຄວາມຄືບໜ້າ ຂອງການຈັດຕັ້ງປະຕິບັດຖະແຫຼງການຮ່ວມອາຊຽນ-ການາດາ ກ່ຽວກັບການຄ້າ ແລະ ການລົງທຶນ ພ້ອມທັງຮັບຊາບຄວາມຄືບໜ້າຂອງການຈັດຕັ້ງປະຕິບັດໂຄງການສ້າງຂີດຄວາມສາມາດອາຊຽນ-ການາດາ ແລະ ຄວາມຄືບໜ້າການເຈລະຈາສັນຍາການຄ້າເສລີອາຊຽນ-ການາດາ.
