ນັບແຕ່ວັນທີ 18 ກໍລະກົດ 2024 ຮອດປັດຈຸບັນ, ສປປ ລາວ ໄດ້ຮັບຜົນກະທົບຈາກອຸທົກກະໄພ ກວມເອົາ 15 ແຂວງ ມີ 100 ເມືອງ 1.144 ບ້ານ, ມີຜູ້ເສຍຊີວິດ 5 ຄົນ, ເຮືອນເປ່ເພ 169 ຫຼັງ, ເນື້ອທີ່ທໍາການຜະລິດເສຍຫາຍຫຼາຍກວ່າ 13 ພັນເຮັກຕາ; ຕໍ່ສະພາບດັ່ງກ່າວ ທ່ານນາຍົກລັດຖະມົນຕີ ໄດ້ເນັ້ນໜັກໃຫ້ເອົາໃຈໃສ່ໃຫ້ການຊ່ວຍເຫຼືອຜູ້ປະສົບໄພ ກໍຄືຜູ້ໄດ້ຮັບຜົນກະທົບ; ຮີບຮ້ອນປັບປຸງພື້ນຖານໂຄງລ່າງຕ່າງໆ ທີ່ໄດ້ຮັບຜົນກະທົບເສຍຫາຍໃຫ້ນໍາໃຊ້ໄດ້ໂດຍໄວ.
ກອງປະຊຸມລາຍງານຜົນກະທົບຕໍ່ສະພາບໄພນໍ້າຖ້ວມ ແລະ ແຜນການຟື້ນຟູຊ່ວຍເຫຼືອຢູ່ບັນດາແຂວງ ແລະ ບາງແຜນຈຸດສຸມໃນຕໍ່ໜ້າ ຈັດຂຶ້ນໃນວັນທີ 16 ກັນຍາ 2024 ໂດຍການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ.
ມີທ່ານຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນປະເທດ, ປະທານຄະນະກຳມະການຄຸ້ມຄອງໄພພິບັດຂັ້ນສູນກາງ, ບັນດາທ່ານລັດຖະມົນຕີ, ຮອງລັດຖະມົນ ຕີ, ຮອງເຈົ້າຄອງນະຄອນຫຼວງວຽງຈັນ ແລະ ຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ພາກສ່ວນກ່ຽວຂ້ອງເຂົ້າຮ່ວມ ໂດຍທ່ານນາຍົກລັດຖະມົນຕີໄດ້ຊີ້ນໍາຫຼາຍບັນຫາ ເພື່ອຮັບມື ແລະ ແກ້ໄຂສະພາບໄພນໍ້າຖ້ວມ.
ໂອກາດນີ້, ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍຕໍ່ຄວາມເອົາໃຈໃສ່ຂອງຄະນະຄຸ້ມຄອງໄພພິບັດທຸກຂັ້ນ ( ສູນກາງ, ຂັ້ນແຂວງ, ຂັ້ນເມືອງ ); ອົງການປົກຄອງທ້ອງຖິ່ນ ລວມທັງພາກສ່ວນຕ່າງໆທີ່ໄດ້ໃຫ້ການຊ່ວຍເຫຼືອຜູ້ປະສົບໄພນ້ຳຖ້ວມໄດ້ຢ່າງທັນການ.
ພ້ອມນີ້, ທ່ານກໍໄດ້ເນັ້ນໃຫ້ຄະນະຄຸ້ມຄອງໄພພິບັດທຸກຂັ້ນ ສືບຕໍ່ຈັດຕັ້ງປະຕິບັດຕາມກົນໄກການເຮັດວຽກຂອງຄະນະຄຸ້ມຄອງໄພພິບັດ; ເອົາໃຈໃສ່ໃຫ້ການຊ່ວຍເຫຼືອຜູ້ປະສົບໄພ ກໍຄືຜູ້ໄດ້ຮັບຜົນກະທົບ, ຕິດຕາມ ໃຫ້ການຊ່ວຍເຫຼືອເບິ່ງແຍງສຸຂະພາບ, ສຸຂະນາໄມ ຂອງຜູ້ປະສົບໄພໃຫ້ດີ; ຮີບຮ້ອນປັບປຸງພື້ນຖານໂຄງລ່າງຕ່າງໆທີ່ໄດ້ຮັບຜົນກະທົບເສຍຫາຍໃຫ້ນໍາໃຊ້ໂດຍໄວ ເພື່ອເປັນເງື່ອນໄຂອໍານວຍຄວາມສະດວກ ໃຫ້ແກ່ການດໍາລົງຊີວິດຂອງປະຊາຊົນ; ສືບຕໍ່ຕິດຕາມສະພາບດິນຟ້າອາກາດ ເພື່ອສືບຕໍ່ຮັບມືກັບໄພພິບັດທີ່ອາດຈະເກີດຂຶ້ນອີກໃນຕໍ່ໜ້າໃຫ້ກໍານົດແຜນລະອຽດ ເພື່ອກະກຽມຄວາມພ້ອມການຊ່ວຍເຫຼືອທາງດ້ານກໍາລັງ, ອຸປະກອນຊ່ວຍເຫຼືອ ແລະ ເຄື່ອງອຸປະໂພກ – ບໍລິໂພກຕ່າງໆ ຕ້ອງຮອດເປົ້າໝາຍຜູ້ປະສົບໄພຢ່າງວ່ອງໄວທັນການ.
ເອົາໃຈໃສ່ຍົກຍ້າຍປະຊາຊົນທີ່ມີຄວາມສ່ຽງ ແລະ ວັດຖຸສິ່ງຂອງທີ່ຈຳເປັນ ໄປຢູ່ບ່ອນທີ່ປອດໄພ; ການແກ້ໄຂໄພພິບັດ ຕ້ອງເຝົ້າຕິດຕາມລະວັງ ໂດຍມີການຈັດຕັ້ງບັນຊາ, ແບ່ງຄວາມຮັບຜິດຊອບລະອຽດຈະແຈ້ງ, ລົງເລິກຊີ້ນໍາໃຫ້ແທດຕົວຈິງ, ມີລະບົບການປະສານງານທີ່ສະດວກ, ວ່ອງໄວ, ມີແຜນການແກ້ໄຂທີ່ດີ, ມີການຕິດຕາມ – ກວດກາຢ່າງເປັນປົກກະຕິ ເມື່ອພົບບັນຫາຍຸ້ງຍາກໃຫ້ມີການປຶກສາຫາລືກັນ ຫຼື ຂໍທິດຊີ້ນຳຈາກຂັ້ນເທິງຢ່າງທັນການ, ເດັດຂາດບໍ່ໃຫ້ຊັກຊ້າແກ່ຍາວ.
ໃນກອງປະຊຸມ, ທ່ານ ນາງ ໃບຄໍາ ຂັດຕິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ຮອງປະທານຜູ້ປະຈໍາການຄະນະກຳມະການຄຸ້ມຄອງໄພພິບັດຂັ້ນສູນກາງ ໄດ້ໃຫ້ຮູ້ວ່າ: ນັບແຕ່ວັນທີ 18 ກໍລະກົດ 2024 ຮອດປັດຈຸບັນ ສປປ ລາວ ໄດ້ຮັບຜົນກະທົບ ແລະ ຜົນເສຍຫາຍຈາກພາຍຸດີເປຼຊັນ ( Depression ), ພາຍຸໝຸນເຂດຮ້ອນພຣະພິຣູນ ( Prapiroon ) ແລະ ລົມພາຍຸໄຕ້ຝຸ່ນຢາກິ ( YAKI ) ຕາມການເກັບກຳຂໍ້ມູນ ແລະ ປະເມີນເບື້ອງຕົ້ນມີທັງໝົດ 15 ແຂວງ ກວມເອົາ 100 ເມືອງ, 1.144 ບ້ານ, 45.661 ຄອບຄົວ ຈໍານວນພົນ 176 ພັນກວ່າຄົນ ( ຍິງ 75.054 ຄົນ ), ເສຍຊີວິດ 5 ຄົນ ແລະ ສູນຫາຍ 1 ຄົນ, ຄອບຄົວຖືກຍົກຍ້າຍຊົ່ວຄາວ 182 ຄອບຄົວ, ເຮືອນເປ່ເພ 169 ຫຼັງ, ເນື້ອທີ່ທໍາການຜະລິດເສຍຫາຍ 13 ພັນກວ່າເຮັກຕາ, ເສັ້ນທາງ 262 ເສັ້ນ, ຂົວ 12 ແຫ່ງ, ຊົນລະປະທານ 87 ແຫ່ງ, ສຸກສາລາ 5 ແຫ່ງ, ນໍ້າລິນ 30 ແຫ່ງ, ໜອງປາ 334 ໜອງ, ສັດໃຫຍ່ ແລະ ສັດປີກ ລວມຈໍານວນ 13 ພັນກວ່າໂຕ.
ປັດຈຸບັນ, ພາກສ່ວນກ່ຽວຂ້ອງຍັງສືບຕໍ່ເກັບຂໍ້ມູນຄວາມເສຍຫາຍໃຫ້ລະອຽດ ເພື່ອເປັນຂໍ້ມູນໃນການກຳນົດແຜນຊ່ວຍເຫຼືອ ແລະ ຟື້ນຟູ.
