ກອງປະຊຸມປຶກສາຫາລື ລະຫວ່າງ ລັດຖະມົນຕີເສດຖະກິດອາຊຽນ ແລະ ຮົງກົງ ຄັ້ງທີ 8 ຈັດຂຶ້ນໃນວັນທີ 20 ກັນຍາ 2024 ທີ່ນະຄອນຫຼວງວຽງຈັນ ສປປ ລາວ ເປັນປະທານຮ່ວມຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ທ່ານ Algernon Yau ລັດຖະມົນຕີກະຊວງພັດທະນາເສດຖະກິດ ແລະ ການຄ້າ ຮົງກົງ ມີບັນດາທ່ານລັດຖະມົນຕີເສດຖະກິດອາຊຽນ ທ່ານເລຂາທິ ການໃຫຍ່ອາຊຽນ ທ່ານລັດຖະມົນຕີການຄ້າ ແລະ ອຸດສາຫະກໍາ ຕິມໍເລສເຕ ບັນດາທ່ານຫົວໜ້າຄະນະຜູ້ແທນຂອງປະເທດສະມາຊິກອາຊຽນ ເຂົ້າຮ່ວມ.
ໂອກາດນີ້ ທ່ານ ມະໄລທອງ ກົມມະສິດ ກ່າວວ່າ: ອາຊຽນ ແລະ ຮົງກົງ ເປັນຄູ່ຮ່ວມມືທາງດ້ານເສດຖະກິດທີ່ຍາວນານ ແລະ ມີການເຊື່ອມໂຍງທາງການຄ້າ ແລະ ການລົງທຶນທີ່ເຂັ້ມແຂງ ໃນປີ 2023 ການຄ້າດ້ານສິນຄ້າ ລະຫວ່າງ ອາຊຽນ ແລະ ຮົງກົງ ມີມູນຄ່າ 117,4 ຕື້ໂດລາສະຫະລັດ ກວມເອົາ 3,3% ຂອງມູນຄ່າການຄ້າທັງໝົດຂອງອາຊຽນ ເຮັດໃຫ້ ຮົງກົງ ເປັນຄູ່ຄ້າອັນດັບທີ 11 ຂອງອາຊຽນ ພ້ອມກັນນັ້ນ ມູນຄ່າການລົງທຶນໂດຍກົງ (FDI) ຂອງນັກລົງທຶນ ຈາກຮົງກົງ ຢູ່ບັນດາປະເທດສະມາຊິກອາຊຽນ ມີປະມານ 15,0 ຕື້ໂດລາ ກວມເອົາ 6,5% ຂອງມູນຄ່າການລົງທຶນໂດຍກົງຈາກຕ່າງປະເທດ ຢູ່ໃນອາຊຽນ ໃນປີ 2023 ເຮັດໃຫ້ຮົງກົງ ເປັນອັນດັບທີ 4 ຂອງບັນດາປະເທດທີ່ມີມູນຄ່າການລົງທຶນຫຼາຍຢູ່ໃນອາຊຽນ.
ປີຜ່ານມາ ພວກເຮົາໄດ້ປຶກສາຫາລືກັນ ຫຼາຍບັນຫາທີ່ຕິດພັນກັບການຮ່ວມມື ລະຫວ່າງ ອາຊຽນ ແລະ ຮົງກົງ ເປັນຕົ້ນ ການຫຼຸດຜ່ອນຜົນກະທົບຂອງບັນດາສິ່ງທ້າທາຍຈາກສາກົນ ການພັດທະນາເສດຖະກິດແບບຍືນຍົງ ການນໍາໃຊ້ເຕັກໂນໂລຊີເຂົ້າໃນວຽກງານການຄ້າ ແລະ ການລົງທຶນ ແລະ ການສ້າງຄວາມເຂັ້ມແຂງແກ່ຕ່ອງໂສ້ການສະໜອງ ພ້ອມຊົມເຊີຍຜົນສໍາເລັດຂອງການຮ່າງອະນຸສັນຍາ ເພື່ອປັບປຸງສັນຍາການຄ້າເສລີ ອາຊຽນ-ຮົງກົງ ນອກນັ້ນ ພວກເຮົາໄດ້ຕົກລົງກັນ ທີ່ຈະເພີ່ມທະວີການຮ່ວມມືທາງເສດຖະກິດ ລະຫວ່າງສອງພາກພື້ນ ໃນຫຼາຍດ້ານ ເຊັ່ນ: ການທ່ອງທ່ຽວ ເຕັກໂນໂລຊີດີຈີຕອນ ການສົ່ງເສີມການລົງທຶນ ແລະ ການພັດທະນາຈຸລະວິສາຫະກິດ ວິສາຫະກິດຂະໜາດນ້ອຍ ແລະ ກາງ.
ເພື່ອສືບຕໍ່ການຮ່ວມມື ກອງປະຊຸມຄັ້ງນີ້ຈະໄດ້ເນັ້ນໃສ່ແລກປ່ຽນທັດສະນະ ກ່ຽວກັບ ການພັດທະນາເສດຖະກິດໃນພາກພື້ນ ແລະ ສາກົນ ທົບທວນຄືນຄວາມຄືບໜ້າ ຂອງການຈັດຕັ້ງປະຕິບັດສັນຍາການຄ້າ ແລະ ການລົງທຶນ ແລະ ແຜນການຮ່ວມມືທາງເສດຖະກິດ ລະຫວ່າງສອງພາກພື້ນ ພ້ອມທັງພິຈາລະນາຮັບຮອງເອົາຖະແຫຼງການຮ່ວມ ຂອງກອງປະຊຸມປຶກສາຫາລື ລະຫວ່າງ ລັດຖະມົນຕີເສດຖະກິດອາຊຽນ ແລະ ຮົງກົງ ຄັ້ງທີ 8 ຕື່ມອີກ.
