ອົງການຊັບສິນທາງປັນຍາໂລກ ສະໜັບສະໜູນ ສ້າງສູນສົ່ງເສີມເຕັກໂນໂລຊີ ແລະ ນະວັດຕະກໍາ

ທ່ານ ມະໄລທອງ ກົມມະສິດ ໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບ ທ່ານ ຜູ້ອໍານວຍການໃຫຍ່ ອົງການຊັບສິນທາງປັນຍາໂລກ ພ້ອມດ້ວຍຄະນະ ທີ່ເດີນທາງມາ ສປປ ລາວ ເປັນຄັ້ງທີ 2 ໃນຮອບຫລາຍປີ ເພື່ອພົບປະສອງຝ່າຍ ແລະ ເຂົ້າຮ່ວມກອງປະຊຸມລັດຖະມົນຕີເສດຖະກິດອາຊຽນ-ອົງການຊັບສິນທາງປັນຍາໂລກ (AEM-WIPO) ທີ່ນະຄອນຫລວງວຽງຈັນ, ພ້ອມສະແດງຄວາມຂອບໃຈມາຍັງ WIPO ທີ່ໃຫ້ການສະໜັບສະໜູນ ແລະ ຊ່ວຍເຫລືອດ້ານເຕັກນິກ ແລະ ວິຊາການ ເປັນຕົ້ນ ການພັດທະນາລະບົບຖານຂໍ້ມູນຊັບສິນທາງປັນຍາ ເພື່ອຊ່ວຍໃນການຄຸ້ມຄອງ ແລະ ປົກປ້ອງຊັບສິນທາງປັນຍາ ການພັດທະນາລະບົບການຈົດທະບຽນຊັບສິນທາງປັນຍາ ແບບອອນລາຍ, ການກະກຽມເຂົ້າເປັນພາຄີຂອງສົນທິສັນຍາສາກົນຕ່າງໆ ເຊັ່ນ: Madrid Protocol, Geneva Act on Lisbon agreement, PCT ລວມທັງການສ້າງຂີດຄວາມສາມາດບຸກຄະລາກອນ ເຊັ່ນ: ການຝຶກງານ, ຝຶກອົບຮົມ, ສໍາມະນາ, ທັດສະນະສຶກສາ ແລະ ອື່ນໆ; ການຊ່ວຍເຫລືອໂຄງການປະເທດດ້ອຍພັດທະນາ ເພື່ອກຽມຄວາມພ້ອມໃຫ້ແກ່ ສປປ ລາວ ຫລຸດພົ້ນອອກຈາກປະເທດດ້ອຍພັດທະນາ ເຊັ່ນ: ການປັບປຸງລະບົບຖານຂໍ້ມູນຊັບສິນທາງປັນຍາໃຫ້ທັນສະໄໝ ວ່ອງໄວ ການສ້າງວິດີໂອສາທິດຂັ້ນຕອນ ແລະ ລະບຽບການຈົດທະບຽນເຄື່ອງໝາຍການຄ້າ, ສິດທິບັດແບບອຸດສາຫະກໍາ, ຊ່ວຍຜະລິດ ຕະພັນທ່ອງຖິ່ນ. ນອກຈາກນີ້, ຍັງຊ່ວຍເຫລືອໃນການສ້າງຍີ່ຫໍ້, ອອກແບບສິ່ງຫຸ້ມຫໍ່ ໃຫ້ 10 ບໍລິສັດວິສາຫະກິດຂະໜາດນ້ອຍ ແລະ ກາງ ຢູ່ນະຄອນຫລວງວຽງຈັນ 22 ບໍລິສັດ ຢູ່ແຂວງຫລວງພະບາງ ແລະ ກໍາລັງດໍາເນີນໂຄງການນັກປະດິດສ້າງໄວໜຸ່ມ ແລະ ໂຄງການແຂ່ງຂັນຕິກຕ໋ອກ ຕື່ມອີກ.

ໂອກາດນີ້, ທ່ານ ມະໄລທອງ ກົມມະສິດ ຍັງໄດ້ສະເໜີແລກປ່ຽນຫລາຍບັນຫາສໍາຄັນ ເຊັ່ນ: ເພີ່ມທະວີການສ້າງນັກກວດສອບລາວ, ສ້າງຂີດຄວາມສາມາດໃຫ້ແກ່ບຸກຄະລາກອນຂອງລາວ ໃຫ້ກາຍເປັນຜູ້ຊ່ຽວຊານທີ່ມີຄວາມຮູ້ ຄວາມສາມາດ ດ້ານການກວດສອບເຄື່ອງໝາຍການຄ້າ, ສິດທິບັດ, ອະນຸສິດທິບັດ ແບບອຸດສາຫະກໍາທ້ອງຖິ່ນ, ປົກປ້ອງພັນພືດ, ລິຂະສິດ, ແກ້ໄຂຂໍ້ຂັດແຍ່ງ, ອົງການລິຂະສິດແບບລວມໝູ່ ແລະ ສົ່ງເສີມອຸດສາຫະກໍາສ້າງສັນ; ສະເໜີໃຫ້ຊ່ວຍເຫລືອໃນການກະກຽມຄວາມພ້ອມ ເພື່ອເຂົ້າເປັນພາຄີຂອງສົນທິສັນຍາສາກົນບັນດາຂົງເຂດຕ່າງໆ; ສືບຕໍ່ສະໜັບສະໜູນການສ້າງສູນສົ່ງເສີມເຕັກໂນໂລຊີ ແລະ ນະວັດຕະກໍາ ເຊິ່ງມີແຜນສ້າງໃນປີນີ້ 2 ແຫ່ງຄື: ຢູ່ມະຫາວິທະຍາໄລແຫ່ງຊາດ ແລະ ສະຖາບັນ ອຸດສາຫະກຳ ແລະ ການຄ້າ ແລະ ວຽກງານອື່ນທີ່ກ່ຽວຂ້ອງ.