ສປປ ລາວ ໄດ້ເປີດການແຂ່ງຂັນກີລາປິ່ງປ່ອງຊາວໜຸ່ມເຍົາວະຊົນໂລກ 2024 ຫຼື WTT youth contender 2024 ເປັນປີທີ 2 ຕິດຕໍ່ກັນ ຂຶ້ນຢ່າງເປັນທາງການໃນຕອນແລງຂອງວັນທີ 18 ກັນຍາ 2024 ແລະ ຈະດໍາເນີນໄປເຖິງວັນທີ 21 ກັນຍາ 2024 ທີ່ສູນການຄ້າ ລາວ-ໄອເຕັກ ໃນນະຄອນຫຼວງວຽງຈັນ ສປປ ລາວ ໂດຍມີເຖິງ 14 ປະເທດເຂົ້າຮ່ວມຊີງໄຊ
ພິທີເປີດການແຂ່ງຂັນດັ່ງກ່າວ ໃຫ້ກຽດເຂົ້າຮ່ວມໂດຍ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກີລາ, ປະທານຄະນະກຳມະການໂອແລມປິກແຫ່ງຊາດລາວ ທີ່ເຄົາລົບ ແລະ ນັບຖື, ທ່ານ ນາງ ແສງເດືອນ ຫຼ້າຈັນທະບູນ ປະທານສະຫະພັນກິລາປິ່ງປ່ອງແຫ່ງຊາດລາວ, ປະທານ ຄະນະກຳມະການຈັດງານແຂ່ງຂັນກິລາປິ່ງປ່ອງຊາວໜຸ່ມເຍົາວະຊົນໂລກ 2024 ແລະ ທ່ານ ປ້າ ວຽງເງິນ ໄຂຄໍາພິທູນ ພັນລະຍາທ່ານຮອງນາຍົກລັດຖະມົນຕີແຫ່ງ ສປປ ລາວ ທີ່ປຶກສາກິດຕະມາສັກຂອງການແຂ່ງຂັນລາຍການນີ້ ພ້ອມດ້ວຍຕາງໜ້າຜູ້ສະໜັບສະໜູນຫຼາຍພາກສ່ວນ, ຄະນະນໍາ, ຄູຝຶກ ແລະ ນັກກີລາ ຈາກບັນດາປະເທດຕ່າງໆ ຕະຫຼອດຮອດສື່ມວນຊົນເຂົ້າຮ່ວມຢ່າງພ້ອມພຽງ.
ທ່ານ ນາງ ແສງເດືອນ ຫຼ້າຈັນທະບູນ ປະທານສະຫະພັນກິລາປິ່ງປ່ອງແຫ່ງຊາດລາວ, ປະທານ ຄະນະກຳມະການຈັດງານແຂ່ງຂັນກີລາປິ່ງປ່ອງຊາວໜຸ່ມເຍົາວະຊົນໂລກ 2024 ຂຶ້ນກ່າວລາຍງານວ່າ: ການແຂ່ງຂັນກີລາປິ່ງປ່ອງຊາວໜຸ່ມເຍົາວະຊົນໂລກ 2024 ເປັນຄັ້ງທີ 2 ທີ່ ສປປ ລາວ ເປັນເຈົ້າພາບ ຕໍ່ຈາກປີ 2023 ເຊິ່ງຄັ້ງນີ້ມີທັງໝົດ 14 ປະເທດເຂົ້າຮ່ວມ ເຊິ່ງມາຈາກ ສປປ ລາວ, ໄທ, ສ.ສ ຫວຽດນາມ, ກໍາປູເຈຍ, ສ. ເກົາຫຼີ, ມາເລເຊຍ, ສິງກະໂປ, ຮົງກົງ, ໄຕຫວັນ, ອິນເດຍ, ມານດິວ, ອົດສະຕຣາລີ, ໂຄລົມບີ ແລະ ອິນໂດເນເຊຍ ໂດຍມີນັກກີລາທັງໝົດ 201 ຄົນ ( ຍິງ 80 ຄົນ ) ມີຕັ້ງແຕ່ອາຍຸ 11, 13, 15, 17 ແລະ 19 ປີ ຊີງໄຊລະຫວ່າງວັນທີ 18-21 ກັນຍາ 2024 ແນ່ນອນລາຍການນີ້ມີຄວາມໝາຍຄວາມສໍາຄັນຫຼາຍ ຍ້ອນເປັນການຮັດແໜ້ນຄວາມສາມັກຄີກັບບັນດາປະເທດຕ່າງໆໃນໂລກ ແລະ ເປັນໂອກາດທີ່ດີໃຫ້ແກ່ ການພັດທະນາບຸກຄະລາກອນທ້າງດ້ານກີລາ-ກາຍຍະກໍາ ທັງເປັນການຊຸກຍູ້ສົ່ງເສີມການທ່ອງທ່ຽວຂອງລາວເຮົາ.
ຂະນະດຽວກັນ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກີລາ ກ່າວວ່າ: ຂ້າພະເຈົ້າຮູ້ສຶກເປັນກຽດ ແລະ ພາກພູມໃຈທີ່ໄດ້ຮັບກຽດເຂົ້າຮ່ວມເປັນຄະນະປະທານ ແລະ ເປັນສັກຂີພິຍານ ໃນການຈັດການແຂ່ງຂັນກີລາປິ່ງປ່ອງຊາວໜຸ່ມເຍົາວະຊົນໂລກ ໃນຄັ້ງນີ້, ຕາງໜ້າໃຫ້ແກ່ຄະນະຮັບຜິດຊອບຈັດການແຂ່ງຂັນ ຂໍສະແດງຄວາມຂອບໃຈມາຍັງການນໍາທຸກຂັ້ນ, ຜູ້ໃຫ້ການສະໜັບສະໜູນ ແລະ ທຸກພາກສ່ວນທີ່ມີສ່ວນຮ່ວມ ທີ່ໄດ້ເສຍສະຫຼະເຫື່ອແຮງ ສະຕິປັນຍາ ພ້ອມທັງກໍາລັງຊັບ ເຮັດໃຫ້ການກະກຽມເປັນເຈົ້າພາບຈັດງານທີ່ມີຄວາມໝາຍ ຄວາມສໍາຄັນ ມາຮອດປັດຈຸບັນນີ້ ເຫັນວ່າພວກເຮົາມີຄວາມພ້ອມຮ້ອບດ້ານ ຈິ່ງເປີດງານຢ່າງເປັນທາງການ.
ຂ່າວ-ຮູບຈາກ: Larh Creators
