ສະພາການຄ້າ ແລະ ອຸດສາຫະກໍາແຫ່ງຊາດລາວ(ສຄອຊ) ຮ່ວມກັບ ອົງການແຮງງານສາກົນ (ILO) ປະຈໍາ ສປປ ລາວ ຈັດກອງປະຊຸມ ປືກສາຫາລື ກ່ຽວກັບການພັດທະນາຕົວແບບທຸລະກິດທີ່ມີຜົນປະໂຫຍດຮ່ວມກັນໃນຂະແໜງລ້ຽງສັດ ໃນວັນທີ 18 ກັນຍາ 2024 ທີ່ໂຮງແຮມແລນມາກ ເປັນປະທານ ຂອງ ທ່ານ ປອ ໄຊບັນດິດ ຣາຊະພົນ, ຮອງປະທານ ສຄອຊ ແລະ ທ່ານ ໂມຮາມມັດ ໄຄຣູ ອີສລາມ, ຜູ້ຈັດການໂຄງການສົ່ງເສີມວຽກເຮັດງານໃນຊົນນະບົດ ຢູ່ ສປປ ລາວ ມີຜູ້ປະກອບການ ຂະແໜງລ້ຽງສັດເຂົ້າຮ່ວມ.
ສຄອຊ ເປັນອົງກອນສູງສຸດຂອງພາກທຸລະກິດ ແລະ ໃນນາມຕາງໜ້າຜູ້ໃຊ້ແຮງງານ ເຫັນໄດ້ເຖິງຄວາມສໍາຄັນ ຂອງການເຜີຍແຜ່ຂໍ້ມູນຂ່າວສານ ແລະ ປະສານງານກັບບັນດາຄູ່ຮ່ວມງານທັງພາກທຸລະກິດ ໂດຍສະເພາະໃນຂະແໜງ ການລ້ຽງສັດ ທີ່ເຂົ້າຮ່ວມກອງປະຊຸມໃນຄັ້ງນີ້ ເພື່ອຮ່ວມກັນປືກສາຫາລື ກ່ຽວກັບການພັດທະນາຕົວແບບທຸລະກິດ ເຊິ່ງກອງປະຊຸມໃນຄັ້ງນີ້ ຈະໄດ້ສົນທະນາ, ປືກສາຫາລືສີ່ງທ້າທາຍ, ໂອກາດໃນການເຮັດທຸລະກິດ, ວີທີທາງສົ່ງເສີມຕົວແບບທຸລະກິດ ໂດຍຜ່ານບໍລິສັດໃຫຍ່ໄປສູ່ຜູ້ຜະລິດ, ຫົວໜ່ວຍ, ວິສາຫະກິດໃນຕົວເມືອງ ແລະ ໃນເຂດຊົນນະບົດ. ນອກນັ້ນ, ຍັງຈະໄດ້ປືກສາຫາລື ຮ່ວມກັບບັນດາບໍລິສັດຕ່າງໆ ແລະ ອົງການແຮງງານສາກົນ ເພື່ອຈັດຕັ້ງປະຕິບັດວຽກງານໃຫ້ບັນລຸຜົນໃນຂະແໜງການລ້ຽງສັດ.
ທ່ານ ປອ ໄຊບັນດິດ ຣາຊະພົນ ກ່າວວ່າ: ກອງປະຊຸມດັ່ງກ່າວມີຄວາມສໍາຄັນ ເພື່ອເປັນເວທີໃນການພົບປະແລກປ່ຽນ ລະຫວ່າງເຈົ້າຂອງໂຄງການ ແລະ ຜູ້ປະກອບການໃນຂະແໜງການລ້ຽງສັດ ທັງນີ້ເພື່ອໃຫ້ໄດ້ ຄໍາຄິດຄໍາເຫັນ ແລະ ຜົນການຫາລືຮ່ວມກັນ ເພື່ອເຮັດໃຫ້ໂຄງການ ສາມາດເອົາໄປຈັດຕັ້ງປະຕິບັດ ໂດຍສະເພາະແມ່ນການສົ່ງເສີມ ໃຫ້ປະຊາຊົນ ໃນການລ້ຽງສັດ ໃຫ້ເປັນເສດຖະກິດ ພ້ອມດຽວກັນນັ້ນກໍເປັນການກະຕຸກຊຸກຍູ້ພາກທຸລະກິດຂະແໜງການລ້ຽງສັດໄດ້ມີໂອກາດພົບປະແລກປ່ຽນກັນເພື່ອພ້ອມກັນກ້າວໄປສູ່ການປັບປຸງຄຸນນະພາບ ປັບປຸງຂອດການຜະລິດ, ປຸງແຕ່ງ ເປັນຜະລິດຕະພັນກ້າວສູ່ການສົ່ງອອກໄປຕ່າງປະເທດ.
ທ່ານ ໂມຮາມມັດ ໄຄຣູ ອີສລາມ ກ່າວວ່າ: ການສົ່ງເສີມໃຫ້ມີວຽກເຮັດງານທໍາໃນຊົນນະບົດ ແມ່ນເປັນທ່າແຮງສໍາຄັນ ໃນການປົກລັອກເສດຖະກິດ ໂດຍໃຫ້ປະຊາຊົນຜູ້ເຮັດການຜະລິດເຂົາໄປມີສ່ວນຮ່ວມໃນຕ່ອງໂສ້ການຜະລິດ ແນ່ນອນວ່າຜູ້ເຮັດທຸລະກິດ ກໍຢາກເຮັດທຸລະກິດໃຫ້ມີການເຕີບໃຫຍ່ຂະຫຍາຍຕົວ ໃນເວລາດຽວກັນ ຊຸມຊົນໃນທ້ອງຖິ່ນ ຫຼື ຊາວກະສິກອນ ກໍຕ້ອງໄດ້ຮັບຜົນປະໂຫຍດ ຫຼື ມີສ່ວນຮ່ວມໃນຕ່ອງໂສ້ດັ່ງກ່າວ ສະນັ້ນ ໂຄງການ ສົ່ງເສີມການມີວຽກເຮັດງານທໍາໃນຊົນນະບົດຂອງລາວ ຈຶ່ງຕ້ອງການຕົວແບບໃນການຜະລິດທີ່ມີສ່ວນຮ່ວມ ຈຶ່ງເກີດມີກອງປະຊຸມປຶກສາຫາລືກັນໃນຄັ້ງນີ້ ເພື່ອນໍາຜົນການປະຊຸມປຶກສາຫາລື ໄປເປັນຂໍ້ເຍືອງທາງໃນການຈັດຕັ້ງປະຕິບັດ ແລະ ສົ່ງເສີມປະຊາຊົນໃນຂັ້ນຕໍ່ໄປ.
