ໃນວັນທີ 18 ກັນຍາ 2024, ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ໄດ້ຈັດພິທີລົງນາມສັນຍາການຮ່ວມມືລະຫວ່າງ ກະຊວງອຸດສາຫະກໍາ ແລະ ການຄ້າ ແລະ ອົງການຊັບສິນທາງປັນຍາໂລກ ກ່ຽວກັບການພັດທະນາການໃຫ້ບໍລິການບໍລິຫານຊັບສິນທາງປັນຍາ ໂດຍການລົງນາມຂອງ ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ ແລະ ທ່ານ ດາເຣັນຕັງ ຜູ້ອໍານວຍການໃຫຍ່ ອົງການຊັບສິນທາງປັນຍາໂລກ ມີຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ຮອງຜູ້ອໍານວຍການໃຫຍ່ ອົງການຊັບສິນທາງປັນຍາໂລກ, ມີຜູ້ແທນຈາກອົງການຊັບສິນທາງປັນຍາໂລກ ແລະ ຄະນະກົມ, ພ້ອມດ້ວຍພະນັກງານກົມຊັບສິນທາງປັນຍາ ເຂົ້າຮ່ວມເປັນສັກຂີພິຍານ.
ສັນຍາການຮ່ວມມື ດັ່ງກ່າວ ແມ່ນມີຄວາມໝາຍສໍາຄັນ ເພື່ອຮ່ວມກັນ ປັບປຸງລະບົບ ການບໍລິຫານວຽກງານຊັບສິນທາງປັນຍາ ຊື່ງອົງການຊັບສິນທາງປັນຍາໂລກ (WIPO) ຈະຊ່ວຍ ປັບປຸງລະບົບການຄຸ້ມຄອງສິດຊັບສິນທາງປັນຍາ, ການຄຸ້ມຄອງເອກະສານ, ການບໍລິການອອນໄລນ໌, ແລະ ການຄົ້ນຫາຂໍ້ມູນ ໃຫ້ກັບກະຊວງ ອຸດສາຫະກໍາ ແລະ ການຄ້າ.
ໃຫ້ຊ່ວຍເຫຼືອໃນການພັດທະນາ ລະບົບແລະເຕັກໂນໂລຊີທີ່ທັນສະໄໝ ເພື່ອປັບປຸງຫລຸດຜ່ອນຂັ້ນຕອນການດໍາເນີນງານອອກສິດທິບັດຕ່າງໆ, ພັດທະນາຄວາມອາດສາມາດ ທາງດ້ານທັກສະ ແລະ ຖ່າຍທອດຄວາມຮູ້ ໃຫ້ພະນັກງານ ເພື່ອເສີມສ້າງຄວາມເປັນມືອາຊີບ ແລະ ມີຄຸນນະພາບ ໃນການພັດທະນາ ແລະ ຄຸ້ມຄອງວຽກງານຊັບສີນທາງປັນຍາ, ສົ່ງເສີມນະວັດຕະກຳ ແລະ ແນວຄິດປະດິດສ້າງ ໂດຍການເຮັດວຽກຮ່ວມກັນ ແລະ ສ້າງຄວາມຮັບຮູ້ວຽກງານ ແລະ ຄວາມສຳຄັນ ຂອງສິດທິວຽກງານຊັບສີນທາງປັນຍາ ເພື່ອເປັນຕົວຂັບເຄື່ອນການຂະຫຍາຍຕົວທາງດ້ານເສດຖະກິດ, ເສີມຂະຫຍາຍຄວາມເຂັ້ມແຂງການຮ່ວມມືກັບສາກົນ, ການແລກປ່ຽນຂໍ້ມູນ ແລະ ການເຜີຍແຜ່ຂໍ້ມູນ ຊຶ່ງ ກະຊວງ ອຸດສາຫະກໍາ ແລະ ການຄ້າ ກໍຄື ກົມຊັບສິນທາງປັນຍາ ສາມາດ ແລກປ່ຽນຂໍ້ມູນ ຊັບສີນທາງປັນຍາ ກັບ ອົງການຊັບສິນທາງປັນຍາໂລກ (WIPO) ແລະ ກັບບັນດາປະເທດຕ່າງໆເພື່ອ ສົ່ງເສີມ ແລະ ເຊື່ອມໂຍງຂໍ້ມູນ ໃນການຈັດຕັ້ງປະຕິບັດ.
ພ້ອນນີ້, ຍັງເປັນການຮ່ວມມື ທາງດ້ານ ພື້ນຖານໂຄງລ່າງ ແລະ ເທັກໂນໂລຊີ ຊື່ງ ອົງການຊັບສິນທາງປັນຍາໂລກ (WIPO) ຈະສະຫນອງແຜນແນະນຳ ກ່ຽວກັບ ພື້ນຖານໂຄງລ່າງ ເຕັກໂນໂລຊີຂໍ້ມູນຂ່າວສານ ແລະ ແນະນຳເທັກໂນໂລຊີທີ່ເຫມາະສົມ ໃຫ້ຖືກກັບຄວາມຕ້ອງການຂອງກະຊວງ ກໍຄື ກົມຊັບສິນທາງປັນຍາ.
