ຕອນເຊົ້າວັນທີ 18 ກັນຍາ 2024 ທີ່ແຂວງສາລະວັນ ໄດ້ມີພິທີປະກາດການແຕ່ງຕັ້ງຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງ ແຂວງສາລະວັນຂຶ້ນຢູ່ທີ່ສະໂມສອນຫ້ອງວ່າການປົກແຂວງ ສາລະວັນ ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ມີຕາງໜ້າຄະນະຈັດຕັ້ງສູນກາງພັກ, ກະຊວງແຮງງານ ແລະ ສະຫວັດດີການສັງຄົມ, ຄະນະປະຈໍາພັກແຂວງ, ກໍາມະການພັກແຂວງ ແລະ ພະນັກງານຫຼັກແຫຼ່ງເຂົ້າຮ່ວມ.
ສະຫາຍ ພູຂົງ ພິລາເພັດ ຫົວໜ້າກົມກໍ່ສ້າງພັກ ຄະນະຈັດຕັ້ງສູນກາງພັກ ໄດ້ຜ່ານຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍ ການຍົກຍ້າຍພະນັກງານໄປຮັບໜ້າທີ່ໃໝ່ຢູ່ ແຂວງສາລະວັນ, ຄຳສັ່ງຂອງນາຍົກລັດຖະມົນຕີ ວ່າດ້ວຍ ການຍົກຍ້າຍພະນັກງານໄປຮັບໜ້າທີ່ໃໝ່ ໂດຍໄດ້ຍົກຍ້າຍ ສະຫາຍ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄປຮັບໜ້າທີ່ໃໝ່ຢູ່ແຂວງ ສາລະວັນ ແລະ ມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງ ສະຫາຍ ປະເດີມພອນ ສົນທະນີ ເປັນກຳມະການບໍລິຫານງານພັກແຂວງ, ກຳມະການຄະນະປະຈຳພັກແຂວງ, ເປັນຮອງເລຂາຄະນະບໍລິຫານງານພັກແຂວງ. ຈາກນັ້ນ, ສະຫາຍ ນາງ ບຸນທະວີ ດວງລາສີ ຮອງເລຂາຄະນະບໍລິຫານງານພັກແຂວງ ຜູ້ຊີ້ນໍາວຽກງານພັກ-ພະນັກງານ ແຂວງສາລະວັນ ໄດ້ຜ່ານມະຕິຕົກລົງຂອງຄະນະປະຈໍາສະພາປະຊົນຊົນ ແຂວງສາລະວັນ ວ່າດ້ວຍ ການຮັບຮອງເອົາການແຕ່ງຕັ້ງ ສະຫາຍ ປະເດີມພອນ ສົນທະນີ ເປັນຮອງເຈົ້າແຂວງ ແຂວງສາລະວັນ.
ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ໂອ້ລົມຕໍ່ພິທີ ພ້ອມທັງໄດ້ກ່າວວ່າ: ການປະກາດການແຕ່ງຕັ້ງຄັ້ງນີ້ ແມ່ນບາດກ້າວອັນສຳຄັນໃນການແຕ່ງຕັ້ງ ພະນັກງານການນຳຂັ້ນຍຸດທະສາດ ເຊິ່ງ ສະຫາຍ ເປັນຜູ້ໜຶ່ງທີ່ມີຄວາມຮູ້, ຄວາມສາມາດ ໃນການນຳພາ-ຊີ້ນໍາ ວຽກງານປະກັນສັງຄົມ, ວຽກງານກໍ່ສ້າງພັກ-ພະນັກງານ ແລະ ວຽກງານການພົວຮ່ວມມືກັບຕ່າງປະເທດ ຂົງເຂດການເກັບກູ້ລະເບີດບໍ່ທັນແຕກ ເພື່ອຊ່ວຍ ແຂວງສາລະວັນ ວາງແຜນພັດທະນາເສດຖະກິດ-ສັງຄົມຂອງແຂວງ ໃນການຂຸດຄົ້ນທ່າແຮງບົ່ມຊ້ອນທີ່ມີຢູ່, ດຶງດູດເອົາການລົງທືນທັງພາຍໃນ ແລະ ຕ່າງປະເທດເພື່ອສ້າງແຫຼ່ງລາຍຮັບໃຫ້ເພີ່ມຂຶ້ນ.
ດັ່ງນັ້ນ, ຮຽກຮ້ອງມາຍັງບັນດາສະຫາຍໃນຄະນະບໍລິຫານງານພັກແຂວງ ແລະ ພະນັກງານຫຼັກແຫຼ່ງໃຫ້ການຊ່ວຍເຫຼືອ ສະຫາຍ ຮອງເລຂາຄະນະບໍລິຫານງານພັກແຂວງ ຮອງເຈົ້າແຂວງ ຜູ້ໃໝ່ ບົນພື້ນຖານເຮັດວຽກເປັນໝູ່ຄະນະ, ແບ່ງໃຫ້ບຸກຄົນຮັບຜິດຊອບ, ມີຄວາມເປັນເອກະພາບພາຍໃນຢ່າງໜັກ ແໜ້ນ ພ້ອມກັນພັດທະນາແຂວງສາລະວັນ ໃຫ້ຈະເລີນກ້າວໜ້າ ແລະ ເຕີບໃຫຍ່ເຂັ້ມແຂງ.
