ພາຍຫຼັງເປີດໃຫ້ບໍລິການ ຫ້ອງວາງສະແດງບັນດາເຜົ່າ 50 ຊົນເຜົ່າໃນລາວ ທ່ຽວຊົມເຮືອນຊົນເຜົ່າ ກໍໄດ້ຮັບຄວາມສົນໃຈ ຈາກນັກທ່ອງທ່ຽວທັງພາຍໃນ ແລະ ຕ່າງປະເທດ ສະນັ້ນ ການນໍາ ເມືອງນາຊາຍທອງ ໂດຍສະເພາະແມ່ນຫ້ອງການອຸດສາຫະກໍາ ແລະ ການຄ້າເມືອງ ເຫັນໄດ້ຄວາມໝາຍຄວາມສໍາຄັນ ແລະ ໄດ້ເງື່ອນໄຂ ຮັບອະນຸຍາດ ຮັບໃບ ຢັ້ງຢືນຜະລິດຕະພັນສິນຄ້າໜຶ່ງເມືອງໜຶ່ງຜະລິດຕະພັນ ແຫ່ງຊາດ ທີ່ຈັບບາຍບໍ່ໄດ້ໃຫ້ສວນພຶກສາ ເພື່ອສົ່ງເສີມການທ່ອງທ່ຽວທາງດ້ານວັດຖະນະທໍາໃຫ້ຢືນຍົງ.
ໃນວັນທີ 16 ກັນຍາ 2024 ຜ່ານມາ ທ່ານ ພູວົງ ພະມີສິດ ປະທານສວນພຶກສາ ໄດ້ຂຶ້ນຮັບໃບອະນຸຍາດນຳໃຊ້ກາໝາຍ ຜະລິດຕະພັນສິນຄ້າໜຶ່ງເມືອງໜຶ່ງຜະລິດຕະພັນ ແຫ່ງຊາດ ທີ່ຈັບບາຍບໍ່ໄດ້ ໂດຍການມອບຂອງທ່ານ ວິທູນ ສິດທິມໍລະດາ ຫົວໜ້າ ກົມສົ່ງເສີມການຄ້າ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ ເຊິ່ງພິທີໄດ້ຈັດຂຶ້ນໃນງານວາງສະແດງ ແລະ ຈຳໜ່າຍສິນຄ້າ ໜຶ່ງເມືອງ ໜຶ່ງຜະລິດຕະພັນ ແລະ ສິນຄ້າຄອບຄົວຕົວແບບຂອງນະຄອນຫຼວງວຽງຈັນ ຄັ້ງທີ X ປະຈຳປີ 2024 ທີ່ສູນການຄ້າລາວ-ໄອເຕັກ ໃນລະຫວ່າງ ວັນທີ 14-22 ກັນຍາ 2024
ສວນພຶກສາ ເປັນສະຖານທີທ່ອງທ່ຽວທາງທຳມະຊາດ ແລະ ວັດທະນະທຳບັນດາເຜົ່າ ເປີດໃຫ້ບໍລິການຫຼາກຫຼາຍກິດຈະກຳການທ່ອງທ່ຽວບໍ່ວ່າຈະເປັນ ທ່ຽວຊົມຫ້ອງວາງສະແດງບັນດາເຜົ່າ, ທ່ຽວຊົມເຮືອນຊົນເຜົ່າ, ທ່ຽວຊົມວັງພະຍານາກ ພ້ອມກາບໄຫ້ວອົງປູ່ສີສຸດໂທ ແລະ ອົງປູ່ສີສັດຕະນາກ, ທ່ຽວຊົມສວນສັດນ້ອຍ ແລະ ສວນນ້ຳຕົກ
ທ່ຽວຊົມສວນແບ້ຄຳນຳໂຊກ, ມ່ວນຊື່ນກັບ ສະໄລເດີນ້ຳ, ພ້ອມນັ້ນ ພວກເຮົາ ຍັງມີຮ້ານອາຫານ ພ້ອມອາຫານແຊບ ແລະ ມີຣີສອດໄວ້ໃຫ້ນັກທ່ອງທ່ຽວໄດ້ພັກແຮມແບບຫລາຍວັນຕື່ມອີກ.
ປະຈຸບັນ ສວນພຶກສາ ໂດຍເຫັນໄດ້ເຖິງຄວາມຫມາຍຄວາມສຳຄັນຂອງວັດທະນະທຳຮີດຄອງປະເພນີອັນດີງາມຂອງຊາດ ທັງເປັນການອະນຸລັກຮັກສາ ບໍ່ໃຫ້ຫຼົງລືມໄປຕາມການເວລາ. ດັ່ງນັ້ນ ສວນພຶກສາ ໂດຍປະທານ ພູວົງ ພະມີສິດ ຈຶ່ງໄດ້ສ້າງສວນພຶກສາ ສະຖານທີ່ທ່ອງທ່ຽວທາງທຳມະຊາດ ແລະ ວັດທະນະທຳບັນດາເຜົ່າ ໂດຍສະເພາະທາງດ້ານວັດທະນະທໍາ ເຊິ່ງມີເອກະລັກພິເສດ ແລະ ແຕກຕ່າງຈາກສະຖານທີ່ທ່ອງທ່ຽວອື່ນໆ. ໃນນັ້ນ ຈະມີຫ້ອງວາງສະແດງບັນດາເຜົ່າ ແລະ ໝູ່ບ້ານຊົນເຜົ່າ ອັນເປັນແຫຼ່ງຮວບຮວມປະຫວັດຄວາມເປັນມາ ກໍຄືວິຖີຊີວິດ ຮີດຄອງປະເພນີ ແລະ ວັດທະນະທຳອັນດີງາມ ຂອງ 50 ຊົນເຜົ່າໃນລາວມາໄວ້ໃນສະຖານທີ່ແຫ່ງນີ້. ເພື່ອເປີດໂອກາດໃຫ້ບັນດານັກຄົ້ນຄວ້າທັງພາຍໃນ ແລະ ຕ່າງປະເທດ, ນັກຮຽນ, ນັກສຶກສາ ທີ່ມີຄວາມສົນໃຈ ມາທັດສະນະສຶກສາ ຮຽນຮູ້ຄວາມເປັນມາບັນດາຊົນເຜົ່າຕ່າງໆໃນ ສປປ ລາວ.
ສໍາລັບການຈັດງານໃນຄັ້ງນີ້ມີ 2 ຫົວໜ່ວຍທຸລະກິດ ທີ່ໄດ້ຮັບອະນຸຍາດນໍາໃຊ້ກາໝາຍໜຶ່ງເມືອງໜຶ່ງຜະລິດຕະພັນ ແຫ່ງຊາດ. ໂດຍລວມແລ້ວແມ່ນມີການຊຸກຍູ້ ສົ່ງເສີມປະຊາຊົນພາຍໃນຂົງເຂດເມືອງຂອງຕົນທໍາການຜະລິດຕິດພັນກັບພູມປັນຍາຂອງພໍ່ແມ່ປະຊາຊົນທີ່ມີ, ດ້ານແຮງງານກໍເຫັນວ່າມີການນໍາໃຊ້ແຮງງານທີ່ມີພາຍໃນຂົງ ເຂດບ້ານ ແລະ ເທດສະບານຂອງບັນດາເມືອງດັ່ງກ່າວ. ສະເລ່ຍແລ້ວແຮງງານທັງ 2 ຫົວໜ່ວຍທຸລະກິດ ທີ່ໄດ້ຮັບອະນຸຍາດນໍາໃຊ້ກາໜາຍ ມີທັງໝົດຈໍານວນ 25 ຄົນ. ອັນນີ້ກໍເປັນປັດໄຈໜຶ່ງທີ່ສໍາຄັນ ແລະ ສ່ອງແສງໃຫ້ເຫັນວ່າບັນດາຫົວໜ່ວຍທຸລະກິດ ທີ່ໄດ້ຮັບອະນຸຍາດນໍາໃຊ້ກາໜາຍສິນຄ້າ “ໜຶ່ງເມືອງ ໜຶ່ງຜະລິດຕະພັນ” ແຫ່ງຊາດ ຂອງນະຄອນຫຼວງວຽງຈັນເວົ້າລວມ, ເວົ້າສະເພາະ 2 ຫົວໜ່ວຍທີ່ໄດ້ຮັບອະນຸຍາດຂອງ 2 ເມືອງໃນມື້ນີ້ ແມ່ນມີການປະກອບສ່ວນເຂົ້າໃນການສ້າງວຽກເຮັດງານທໍາທີ່ໝັ້ນຄົງ,ສ້າງລາຍຮັບທີ່ຖາວອນໃຫ້ພໍ່ແມ່ປະຊາຊົນໃນຂັ້ນພື້ນຖານ ພ້ອມດຽວກັນນັ້ນ, ກໍເປັນການປົກປັກຮັກສາອາຊີບອັນດັ່ງເດີມທີ່ສືບທອດກັນມາຫຼາຍຊົ່ວຄົນ ໃຫ້ມີຄວາມຍືນຍົງ.
ສະຖານທີ່ສວນພຶກສາ ຫໍວັດທະນະທໍາບັນດາເຜົ່າ ໄດ້ຮັບການຮັບຮອງ ແລະ ຢັ້ງຢືນ ເປັນຜະລິດຕະພັນສິນຄ້າໜຶ່ງເມືອງໜື່ງຜະລິດຕະພັນ ແຫ່ງຊາດ ທີ່ຈັບບາຍບໍ່ໄດ້ ຂອງເມືອງ ນາຊາຍທອງ ແມ່ນຫົວໜ່ວຍລໍາດັບທີ່ 7 ຂອງເມືອງນາຊາຍທອງ ແລະ ເປັນລໍາດັບທີ 69 ຂອງນະຄອນຫຼວງວຽງຈັນ. ນອກຈາກນັ້ນ ວິສາຫະກິດ ກຸ່ມຫັດຖະກໍາຫຼໍ່ຈອງ ບ້ານ ໜອງດົງ ກໍ່ໄດ້ຮັບກາໝາຍສິນຄ້າໜຶ່ງເມືອງໜຶ່ງຜະລິດຕະພັນ ເຊິ່ງເປັນຜະລິດຕະພັນ ຈອງແບບທໍາມະດາ, ຈອງໂອ, ຈອງຕີນມ້າ ແລະ ຕະຫຼີວ ຂອງເມືອງປາກງື່ມ ແມ່ນຫົວໜ່ວຍລໍາດັບທີ 6 ຂອງເມືອງ ແລະ ເປັນລໍາດັບທີ 70 ຂອງນະຄອນຫຼວງວຽງຈັນ.
